மத்திய கிழக்கில் அமெரிக்கா-இஸ்ரேல் இணைந்து ஈரான் மீது நடத்திய வான்வழித் தாக்குதல்கள் தொடர்ந்து வரும் நிலையில், ஈரான் பதிலடியாக அமெரிக்காவின் நட்பு நாடுகள் மீது ஏவுகணை, ட்ரோன் தாக்குதல்களை நடத்தி வருகிறது. இதனால் பிராந்தியம் முழுவதும் பதற்றம் உச்சத்தை எட்டியுள்ளது. வான்வெளி மூடல், விமானங்கள் ரத்து, எண்ணெய் விலை உயர்வு ஆகியவை ஏற்பட்டுள்ளன.

இந்நிலையில், அமெரிக்க வெளியுறவுத்துறை தீவிர எச்சரிக்கை விடுத்துள்ளது. பஹ்ரைன், எகிப்து, ஈரான், ஈராக், இஸ்ரேல் (வெஸ்ட் பேங்க் & காசா உட்பட), ஜோர்டான், குவைத், லெபனான், ஓமன், கத்தார், சவுதி அரேபியா, சிரியா, ஐக்கிய அரபு எமிரேட்ஸ் (UAE), ஏமன் ஆகிய 14 நாடுகளில் வசிக்கும் அல்லது பயணிக்கும் அமெரிக்கர்கள் உடனடியாக வெளியேற வேண்டும் என்று அறிவுறுத்தியுள்ளது.

"DEPART NOW" என்று வலியுறுத்தி, கிடைக்கும் வணிக விமானங்கள் மூலம் வெளியேறுமாறு கூறியுள்ளது. பாதுகாப்பு அச்சுறுத்தல் மிக அதிகம் என்பதால் இந்த அறிவுறுத்தல் வந்துள்ளது.

இதையும் படிங்க: எனது சிறந்த நண்பர் மோடி!! புகழ்ந்து தள்ளும் நெதன்யாகு! இந்தியா ஆதரவு? இஸ்ரேல் பாராட்டு?

உதவி தேவைப்படும் அமெரிக்கர்கள் +1-202-501-4444 அல்லது +1-888-407-4747 என்ற எண்களை 24 மணி நேரமும் தொடர்பு கொள்ளலாம் என்று தெரிவிக்கப்பட்டுள்ளது. பல நாடுகளில் விமான நிலையங்கள் மூடப்பட்டுள்ளதால், வெளியேறுவது சவாலாக உள்ளது. அமெரிக்க தூதரகங்கள், தூதரகங்கள் சில இடங்களில் மூடப்பட்டுள்ளன.

இதற்கிடையே, அமெரிக்க வெளியுறவுத்துறை அமைச்சர் மார்கோ ரூபியோ, ஈரானின் பாலிஸ்டிக் ஏவுகணை திறன்கள் மற்றும் ட்ரோன் தாக்குதல் திறன்களை முழுமையாக ஒழிக்கும் வரை தாக்குதல்கள் தொடரும் என்று திட்டவட்டமாக கூறியுள்ளார். "ஒரு வருடம் கழித்து ஈரானை யார் ஆட்சி செய்தாலும், அவர்களிடம் இந்த ஏவுகணைகளும் ட்ரோன்களும் இருக்காது" என்று அவர் வலியுறுத்தினார். ஈரானின் அணு திட்டங்கள், ஏவுகணை உற்பத்தி ஆகியவற்றை அழிக்கும் நோக்கில் அமெரிக்க ராணுவ நடவடிக்கைகள் தீவிரப்படுத்தப்படும் என தெரிவித்துள்ளார்.

அதிபர் டொனால்ட் டிரம்ப், ஈரானுக்கு எதிரான தாக்குதல்களை அதிகரிக்கும் என்றும், புதிய ஆட்சி விரும்பினாலும் முக்கிய இலக்கு ஏவுகணை அச்சுறுத்தலை முடிவுக்குக் கொண்டுவருவது என்றும் கூறியுள்ளார். இந்த சூழலில், மத்திய கிழக்கில் உள்ள இந்தியர்கள், தமிழகத்தினர் உள்ளிட்டோர் பாதுகாப்பாக இருக்க வேண்டும் என இந்திய அரசு தொடர்ந்து எச்சரிக்கை விடுத்து வருகிறது. உலக நாடுகள் அமைதி பேச்சுவார்த்தைக்கு அழைப்பு விடுத்து வரும் நிலையில், போர் மேலும் விரிவடையும் அபாயம் உள்ளது.

இதையும் படிங்க: ஈரான் போரில் அடுத்த இழப்பு!! கமேனி மனைவியும் உயிரிழப்பு!! விரட்டி விரட்டி வேட்டையாடும் அமெரிக்க, இஸ்ரேல் படைகள்!!