அமெரிக்கா மற்றும் ஈரான் இடையே நடைபெற்று வந்த பதற்றத்துக்கு முற்றுப்புள்ளி வைக்கும் வகையில் அமைதி ஒப்பந்தம் நேற்று கையெழுத்தானது. 14 அம்சங்கள் கொண்ட இந்த ஒப்பந்தம் உடனடியாக அமலுக்கு வந்துள்ளது.

ஒப்பந்தத்தின் முக்கிய அம்சமாக, ஹார்முஸ் ஜலசந்தியில் ஈரான் துறைமுகங்கள் மற்றும் கடலோரப் பகுதிகளுக்கு எதிரான அமெரிக்க கடற்படை முற்றுகை முழுமையாக திரும்பப் பெறப்பட்டுள்ளது. அமெரிக்க ராணுவத்தின் மத்திய கட்டளைப் பிரிவு (CENTCOM) இதை அதிகாரப்பூர்வமாக அறிவித்தது. 

அமெரிக்க அதிபர் டொனால்ட் டிரம்பின் உத்தரவின்படி, ஈரான் துறைமுகங்களுக்கு செல்லும் மற்றும் அங்கிருந்து வரும் அனைத்து கப்பல் போக்குவரத்துக்கும் எதிரான முற்றுகை நீக்கப்பட்டுள்ளதாக அமெரிக்க ராணுவம் தெரிவித்துள்ளது. அரேபிய வளைகுடா மற்றும் ஓமன் வளைகுடா பகுதிகளில் உள்ள ஈரான் துறைமுகங்களுக்கு கப்பல்கள் தடையின்றி செல்லலாம். முற்றுகை தொடர்பான அனைத்து நடவடிக்கைகளும் நிறுத்தப்பட்டுள்ளன.

இதையும் படிங்க: ஈரான் - அமெரிக்கா போர்! குட் நியூஸ் சொன்னார் ட்ரம்ப்! இந்த வார இறுதியில் அமைதி ஒப்பந்தம் கையெழுத்து?!

ஈரான் தரப்பில், ஹார்முஸ் ஜலசந்தியில் அடுத்த 60 நாட்களுக்கு கப்பல் போக்குவரத்துக்கு கட்டணம் வசூலிக்காமல் அனுமதிக்க ஒப்புக்கொள்ளப்பட்டுள்ளது. இதனால் ஜலசந்தி பழைய இயல்பு நிலைக்கு திரும்பியுள்ளது. கச்சா எண்ணெய் மற்றும் எரிவாயு ஏற்றிய கப்பல்கள் தடையின்றி போக்குவரத்தை தொடங்கியுள்ளன.

அமெரிக்க அதிபர் டிரம்ப் இந்த ஒப்பந்தத்தை “அமெரிக்காவுக்கு கிடைத்த தீர்க்கமான வெற்றி” எனப் புகழ்ந்தார். “மத்திய கிழக்கு போர் உலகப் பொருளாதார மந்த நிலைக்கு வழிவகுக்காமல் தடுக்க இந்த ஒப்பந்தம் அவசியம். இது ஈரானின் நிபந்தனையற்ற சரணடைவை பிரதிபலிக்கிறது” என்றார்.

ஈரான் உச்ச தலைவர் மொஜ்தபா கமெனி, “ஒப்பந்தத்தில் ஆரம்பத்தில் தயக்கம் இருந்தது. ஆனால் அதிபர் மசூத் பெசேஷ்கியன் மற்றும் உயர் அதிகாரிகளின் உறுதியின் அடிப்படையில் ஒப்புதல் அளித்தேன். எதிர்கால பேச்சுவார்த்தைகளில் அமெரிக்காவின் அதிகப்படியான கோரிக்கைகளுக்கு ஈரான் அடிபணியாது” எனத் தெரிவித்தார்.

இரு நாடுகும் இந்த ஒப்பந்தத்தை தங்கள் தரப்பு வெற்றியாக முன்வைத்துள்ளன. மத்திய கிழக்கு பதற்றம் குறையும் என எதிர்பார்க்கப்படும் நிலையில், உலக சந்தையில் எண்ணெய் விலை நிலைப்படுத்தப்படும் என வல்லுநர்கள் கருதுகின்றனர். 

இதையும் படிங்க: ஹார்முஸில் கட்டணமின்றி கப்பல்களுக்கு அனுமதி! அமெரிக்கா - ஈரான் அமைதி ஒப்பந்தத்தில் 14 முக்கிய அம்சங்கள்!