ஈரான் உச்சத் தலைவர் முஜ்தபா கமேனி மருத்துவமனையில் இருந்தபோது நடைபெற்ற தாக்குதலில், இடிபாடுகளுக்கு இடையே இருந்து அவர் பத்திரமாக மீட்கப்பட்டதாக செய்திகள் வெளியாகியுள்ளன.

கடந்த பிப்ரவரி மாத இறுதியில் அமெரிக்காவும் இஸ்ரேலும் இணைந்து ஈரான் மீது போரைத் தொடங்கியபோது நடைபெற்ற தாக்குதலில், அந்நாட்டின் உச்சத் தலைவர் கமேனியும் அவரது குடும்பத்தினரும் கொல்லப்பட்டனர். அதைத் தொடர்ந்து, அந்தத் தாக்குதலில் உயிர் தப்பிய அவரது மூத்த மகன் முஜ்தபா கமேனி, ஈரானின் புதிய உச்சத் தலைவராகத் தேர்வு செய்யப்பட்டார்.

ஆனால், அவர் தொடர்ந்து பொதுவெளியில் தோன்றாமல் இருப்பதால், முஜ்தபா உயிருடன் இருக்கிறாரா, இல்லையா என்ற விவாதங்கள் நீடித்து வருகின்றன. அதுமட்டுமின்றி, முதல்முறை நடைபெற்ற தாக்குதலில் முஜ்தபா தனது தந்தையுடன் சிக்கினாரா, இல்லையா என்ற கேள்விகளும் தொடர்ந்து எழுந்து வருகின்றன.

இதையும் படிங்க: ஒழுங்காக நடந்து கொள்ளுங்கள்!! முழு நாட்டையும் தகர்ப்பேன்! ஈரானுக்கு டிரம்ப் விடுத்த எச்சரிக்கை!

இந்நிலையில், ஈரான் உச்சத் தலைவரைத் தேர்வு செய்யும் அந்நாட்டின் மிக உயர்ந்த அமைப்பான நிபுணர்கள் சபையின் உறுப்பினரும் மத அறிஞருமான மொக்சன் ஹைதாரி, போர் தொடங்கியபோது கமேனி கொல்லப்படுவதற்குக் காரணமான தாக்குதலில் முஜ்தபாவும் படுகாயம் அடைந்ததாகத் தெரிவித்துள்ளார்.

கத்தார் நாட்டுத் தொலைக்காட்சியான அல் அரபிக்கு அவர் அளித்த நேர்காணலில், படுகாயம் அடைந்த நிலையில் முஜ்தபா அடுத்தடுத்து மூன்று மருத்துவமனைகளுக்குக் கொண்டு செல்லப்பட்டதாகவும், மூன்றாவது மருத்துவமனையில் அவருக்குச் சிகிச்சை வழங்கப்பட்டுக் கொண்டிருந்தபோது அந்த மருத்துவமனையின் மீதும் குண்டுவீச்சு நடத்தப்பட்டதாகவும் தெரிவித்துள்ளார்.

இந்தத் தாக்குதலில் அந்த மருத்துவமனை முழுமையாகச் சேதமடைந்த நிலையில், இடிபாடுகளுக்கு நடுவில் இருந்து முஜ்தபா கமேனியை மீட்டு, அவரை பத்திரமாக உடனடியாக அங்கிருந்து வெளியேற்றியதாகவும் மொக்சன் ஹைதாரி கூறியுள்ளார்.

ஈரானின் புதிய உச்சத் தலைவராக தான் தேர்வு செய்யப்பட்டிருப்பது தொலைக்காட்சியில் அறிவிக்கப்படும் வரை முஜ்தபாவுக்கே தெரியாது என்றும் அவர் தெரிவித்துள்ளார்.

முஜ்தபா கமேனி தற்போது நல்ல உடல் நலத்துடன் இருப்பதாகவும், நாட்டை வழிநடத்தும் அபார திறனுடன் செயல்பட்டு வருவதாகவும் மத அறிஞர் மொக்சன் ஹைதாரி தெரிவித்துள்ளார்.

அதுவரை எந்தப் பதவியையும் வகிக்காதவராக இருந்தாலும், தனது தந்தையுடன் நிழல் மனிதராக இருந்த காலத்திலேயே ஆட்சியைத் திறம்பட நடத்துவது குறித்து முஜ்தபா கமேனி நன்கு அறிந்திருந்ததாகவும் அவர் தெரிவித்துள்ளார்.

இதையும் படிங்க: டிரம்புக்கு ஈரான் வைத்த செக்! பேச்சுவார்த்தைக்கு 7 நிபந்தனைகள்! ஏற்காவிட்டால் போர் என அறிவிப்பு!