மேற்காசியாவில் ஈரான் - அமெரிக்கா - இஸ்ரேல் இடையேயான போர் பதற்றம் உச்சக்கட்டத்தை எட்டியுள்ள நிலையில், அமெரிக்காவின் அதிநவீன போர்க்கப்பலான யு.எஸ்.எஸ். திரிபோலி 2,000க்கும் மேற்பட்ட கடற்படை வீரர்களுடன் ஈரானை நோக்கி வேகமாக சென்று கொண்டிருக்கிறது.
உலகின் 20 சதவீத கச்சா எண்ணெய் போக்குவரத்து நடைபெறும் ஹார்முஸ் ஜலசந்தியை ஈரான் மூடியுள்ளதால், உலகம் முழுவதும் எரிபொருள் தட்டுப்பாடு ஏற்படும் அபாயம் உருவாகியுள்ளது. இந்த நெருக்கடியை உடைக்கும் வகையில் அமெரிக்கா தனது ராணுவ நடவடிக்கையை அடுத்த கட்டத்துக்கு எடுத்துச் செல்லத் தயாராகி வருகிறது.
ஜப்பானின் ஒகினாவாவை தளமாகக் கொண்ட அமெரிக்காவின் 31வது எக்ஸ்பெடிஷனரி யூனிட் (MEU) வீரர்கள் இந்தக் கப்பலில் உள்ளனர். இவர்கள் வான்வழி தாக்குதல், தரைவழி தாக்குதல், ஹெலிகாப்டர் தாக்குதல் உள்ளிட்ட எந்தவிதமான நடவடிக்கையையும் உடனடியாக மேற்கொள்ளும் திறன் கொண்ட சிறப்புப் படையினர். கடந்த 15ம் தேதி சீனக் கடற்பகுதியில் காணப்பட்ட இந்தப் பிரம்மாண்டக் கப்பல் விரைவில் அரபிக் கடலை அடையும் என எதிர்பார்க்கப்படுகிறது.
இதையும் படிங்க: ஈரான் தாக்குதலில் மேலும் ஒரு இந்தியர் மரணம்!! சவுதியில் அரங்கேறிய சோகம்! பலி எண்ணிக்கை 6ஆக உயர்வு!
இதுவரை வான்வழித் தாக்குதல்களை மட்டுமே நடத்தி வந்த அமெரிக்கா, தற்போது தரைப்படை வீரர்களை அனுப்புவதன் மூலம் போரை முழு அளவில் தீவிரப்படுத்த உள்ளது. குறிப்பாக, ஈரானின் முக்கிய எண்ணெய் ஏற்றுமதி தளமான கார்க் தீவை கைப்பற்றும் திட்டமும் அமெரிக்காவிடம் உள்ளதாகக் கூறப்படுகிறது. இதன் மூலம் ஹார்முஸ் ஜலசந்தியில் ஏற்பட்டுள்ள போக்குவரத்து முட்டுக்கட்டையை உடைத்து, உலகளாவிய எண்ணெய் விநியோகத்தை சீர்படுத்த அமெரிக்கா முயற்சி செய்யும் என தெரிகிறது.
இந்தப் போர்க்கப்பலின் வருகை மத்திய கிழக்கு பதற்றத்தை மேலும் அதிகரிக்கும் என உலக நாடுகள் கவலை தெரிவித்துள்ளன. ஏற்கனவே எரிபொருள் விலை உயர்ந்து வரும் நிலையில், போர் அடுத்த கட்டத்துக்கு சென்றால் உலகப் பொருளாதாரம் பெரும் அதிர்ச்சியை சந்திக்கும் என எச்சரிக்கை எழுந்துள்ளது.
இந்தியா உள்ளிட்ட பல நாடுகள் இந்த சூழலை உன்னிப்பாக கவனித்து வருகின்றன.
இதையும் படிங்க: ஹார்முஸ் ஜலசந்திக்கு மாற்றுபாதை வேண்டும்! இஸ்ரேல் வலியுறுத்தல்! ஈரானுக்கு நெருக்கடி தர நெதன்யாகு திட்டம்!