நேபாளத்தில் கடந்த ஆகஸ்ட் 26ம் தேதி அன்று நேபாள-திபெத் எல்லை அருகே பனிப்பாறை மற்றும் பாறைகள் இடிந்து விழுந்ததால் ஏற்பட்ட திடீர் வெள்ளப்பெருக்கு நாட்டின் வடக்கு மற்றும் மத்திய பகுதிகளில் பேரழிவை உண்டாக்கியுள்ளது. ஆறுகள் கரைபுரண்டு ஓடியதால் நூற்றுக்கணக்கான வீடுகள் அடித்துச் செல்லப்பட்டு, பல குடும்பங்கள் தங்கள் வாழ்வாதாரத்தை இழந்து தவிக்கின்றன. இதுவரை சுமார் 962 பேர் உயிரிழந்துள்ளதாக அதிகாரப்பூர்வ தகவல்கள் தெரிவிக்கின்றன. 

ஏறத்தாழ 4,000 பேர் காணாமல் போயுள்ளனர். இந்த இயற்கைச் சீற்றத்தில் மனிதர்களுடன் வாழ்ந்த வளர்ப்புப் பிராணிகளும் பெரும் பாதிப்புக்குள்ளாகி உள்ளன. முற்றிலும் சேதமடைந்த வீடுகளின் இடிபாடுகளுக்கு இடையே, காணாமல் போன உரிமையாளர்களுக்காக செல்லப்பிராணிகள் காத்திருக்கும் காட்சிகள் சமூக வலைத்தளங்களில் பரவி நெஞ்சை நெகிழ வைக்கின்றன. 

துங்கே பகுதியில் ‘லில்லி’ என்ற நாய், தன் கழுத்தில் பட்டை மாறாமல், வீடு இருந்த இடத்திலேயே அமர்ந்து தன் குடும்பத்தினருக்காக மணிக்கணக்காகக் காத்திருக்கிறது. சுற்றிலும் சகதியும் இடிபாடுகளும் நிறைந்திருந்தாலும், மீட்புக் குழுவினர் வந்த பின்னரும் அந்த இடத்தை விட்டு நகர மறுக்கும் லில்லியின் வீடியோக்கள் பரவலாகப் பகிரப்பட்டுள்ளன. உள்ளூர் மக்கள் அதற்கு உணவு கொடுத்து பராமரித்து வருகின்றனர். ஆனால் அந்த நாய் தொடர்ந்து தன் பழைய உரிமையாளரைத் தேடுவதாகக் கூறுகின்றனர்.

இதையும் படிங்க: நேபாள வெள்ளப் பேரழிவு: உடல்களை அடையாளம் காண DNA சோதனை.. தீவிர முயற்சி!!

வெள்ளத்தால் அடித்து வரப்பட்ட தடிமனான சேற்றுச் சகதிக்குள் புதைந்து உயிருக்குப் போராடிய பல நாய்களை உள்ளூர் மக்களும் மீட்புக் குழுவினரும் தீவிரமாக மீட்டுள்ளனர். கழுத்துவரை சேற்றில் மூழ்கிய நிலையிலும் நம்பிக்கையுடன் காத்திருந்த நாய்களை வெளியேற்றி, தண்ணீரில் கழுவி பராமரிக்கும் காட்சிகள் மனிதநேயம் இன்னும் உயிர்ப்புடன் இருப்பதை உணர்த்துகின்றன. சில இடங்களில் பிரிந்துபோன செல்லப்பிராணிகளும் உரிமையாளர்களும் மீண்டும் ஒன்றிணைந்த உருக்கமான நிகழ்வுகளும் பதிவாகியுள்ளன. 

வெள்ளத்தில் சிக்கி மீண்ட நாய் ஒன்றை அதன் உரிமையாளர் கட்டியணைத்து அழும் காட்சிகள் மீட்பு முகாம்களில் உணர்ச்சிப்பூர்வமான சூழலை உருவாக்கியுள்ளன. மனித உயிர்களைக் காப்பாற்றும் அதே வேளையில், அன்பிற்குரிய செல்லப்பிராணிகளையும் மீட்க வேண்டும் என்ற நேபாள மக்களின் கோரிக்கை தீவிரமடைந்துள்ளது. இயற்கைப் பேரிடர்களில் பிராணிகளின் பாதுகாப்பும் முக்கியமானது என்பதை இந்த நிகழ்வுகள் மீண்டும் நினைவூட்டுகின்றன.

இதையும் படிங்க: பெருவெள்ளத்தின் அடுத்த அதிர்ச்சி... உடல்களை அடையாளம் காண்பதில் சிக்கல்... கண்ணீரில் மிதக்கும் நேபாளம்...!