சென்னை: தமிழக பாஜகவில் இருந்து விலகி ‘வீ தி லீடர்’ அமைப்பைத் தொடங்கிய அண்ணாமலையுடன் இணைந்த நிர்வாகிகள் யார் என மத்திய நிதியமைச்சர் நிர்மலா சீதாராமன் தமிழக பாஜக நிர்வாகிகளிடம் கேட்டறிந்தார்.

சட்டசபைத் தேர்தலுக்குப் பிறகு அண்ணாமலை பாஜகவில் இருந்து விலகி புதிய அமைப்பைத் தொடங்கினார். இதைத் தொடர்ந்து தமிழக பாஜக துணைத் தலைவர் கரு.நாகராஜன், மாநில செயலர் சுமதி வெங்கடேசன், கோவை தெற்கு மாவட்ட முன்னாள் தலைவர் வசந்தராஜன் உள்ளிட்ட பலர் அவருடன் இணைந்தனர். இந்த நிலையில், சமீபத்தில் சென்னை வந்த நிர்மலா சீதாராமன், தமிழக பாஜக நிர்வாகிகளை தனித்தனியே சந்தித்து ஆலோசனை நடத்தினார்.

அப்போது “அண்ணாமலை பற்றி பேச வேண்டாம். ஆனால் அவர் தனி அமைப்பு தொடங்கிய பிறகு பல ஆண்டுகளாக பாஜகவில் பணியாற்றிய நிர்வாகிகள் ஏன் அவருடன் சென்றனர்?” என விபரங்களை கேட்டறிந்தார். நிர்வாகிகள் சிலர், “அண்ணாமலையின் செயல்பாடுகள் பிடித்ததால் இணைந்தோம். சிலர் கட்சித் தலைமை மீதான அதிருப்தியால் சென்றனர்” என பதிலளித்ததாகக் கூறப்படுகிறது.

இதையும் படிங்க: "சமாதானம்"...! அண்ணாமலை மீதான அவதூறு வழக்கு வாபஸ்..! டி.ஆர். பாலு எடுத்த முக்கிய முடிவு..!!

மேலும் தங்களுக்கு உள்ள சிரமங்கள் மற்றும் கோரிக்கைகளையும் அவரிடம் எடுத்துரைத்தனர். இந்த விவரங்களை பாஜக தேசிய தலைமைக்கு நிர்மலா சீதாராமன் தெரிவிப்பார் என எதிர்பார்க்கப்படுகிறது. விரைவில் தமிழக பாஜகவில் அமைப்பு ரீதியான மாற்றங்கள் வரலாம் எனக் கூறப்படுகிறது.

இதனிடையே, பாஜக தேசிய பொதுச் செயலர் பி.எல்.சந்தோஷ் அண்ணாமலையுடன் தொலைபேசியில் பேசி சமரசம் முயன்றார். “நீங்கள் திரும்பி வந்தால் தலைமையிடம் பேசுகிறேன்” என அழைப்பு விடுத்ததாகக் கூறப்படுகிறது. ஆனால் அண்ணாமலை “இனி திரும்பி வர முடியாது” என மறுப்புத் தெரிவித்துள்ளார்.

இந்நிலையில், அண்ணாமலை நாளை அமெரிக்கா செல்ல உள்ளார். நியூ ஜெர்சியில் நடக்கும் தமிழ் விழாவில் சிறப்பு விருந்தினராக பங்கேற்கிறார். அமெரிக்கப் பயணத்துக்குப் பிறகு ‘வீ தி லீடர்’ அமைப்பின் மொபைல் செயலியை வெளியிட உள்ளார்.

தமிழக பாஜகவில் தொடரும் அதிருப்தி மற்றும் அண்ணாமலையின் அடுத்த நகர்வுகள் அரசியல் களத்தில் புதிய எதிர்பார்ப்பை ஏற்படுத்தியுள்ளன.

இதையும் படிங்க: அரசியல் ஆட்டத்தை ஆரம்பித்த அண்ணாமலை! We the Leaders அமைப்பின் தலைவராக முதல் குரல்!!