ரஷ்யாவிடமிருந்து தொடர்ந்து கச்சா எண்ணெய் மற்றும் இயற்கை எரிவாயுவை இறக்குமதி செய்யும் இந்தியா உள்ளிட்ட நாடுகள் மீது 100 சதவீதம் வர்த்தக வரி விதிக்க அமெரிக்க அதிபருக்கு அதிகாரம் வழங்கும் புதிய மசோதாவை அமெரிக்க நாடாளுமன்றம் நிறைவேற்றியுள்ளதற்கு இந்தியா மிகக் கடுமையான எதிர்ப்பைப் பதிவு செய்துள்ளதுடன், இத்தகைய தன்னிச்சையான போக்கு இருநாடுகளுக்கு இடையிலான உறவுகளைக் கடுமையாகப் பாதிக்கும் என்று இந்திய வெளியுறவு அமைச்சகம் திட்டவட்டமாக எச்சரித்துள்ளது.
ரஷ்யாவிடமிருந்து மலிவு விலையில் கச்சா எண்ணெய் மற்றும் எரிவாயுவை வாங்கி வரும் இந்தியா, சீனா, ஸ்லோவாக்கியா, ஹங்கேரி மற்றும் அஜர்பைஜான் ஆகிய நாடுகள் மீது கடுமையான பொருளாதார அழுத்தத்தை ஏற்படுத்தும் நோக்கில், அமெரிக்க நாடாளுமன்றத்தில் புதிய வர்த்தக மசோதா ஒன்று அதிரடியாக நிறைவேற்றப்பட்டுள்ளது.
இந்த மசோதாவின்படி, குறிப்பிட்ட நாடுகளிலிருந்து அமெரிக்காவிற்கு ஏற்றுமதி செய்யப்படும் பொருட்கள் மீது 100 சதவீதம் வரை வரி விதிக்கும் அதிகாரத்தை அந்நாட்டு அதிபருக்கு வழங்க வழிவகை செய்யப்பட்டுள்ளது. இந்த மசோதாவில் அமெரிக்க அதிபர் டொனால்ட் ட்ரம்ப் கையெழுத்திட்டால் அது அதிகாரப்பூர்வ சட்டமாக அமலுக்கு வரும் என்ற சூழல் சர்வதேச வர்த்தக அரங்கில் பெரும் அதிர்வலைகளை ஏற்படுத்தியுள்ளது.
இதையும் படிங்க: உலகின் மிக இளைய மன்னர் ஓயோ நிம்பா மறைவு: உகாண்டா மக்கள் ஆழ்ந்த சோகம்!
அமெரிக்காவின் இந்த ஒருதலைப்பட்ச நடவடிக்கைக்கு உடனடி கண்டனம் தெரிவித்துள்ள இந்திய வெளியுறவுத்துறை அமைச்சகம், நாட்டின் 140 கோடி இந்திய மக்களின் எரிசக்திப் பாதுகாப்பை எவ்வித சமரசமுமின்றி உறுதி செய்வதற்காக, உலக சந்தை நிலவரங்கள் மற்றும் நமது நாட்டின் நலன்களுக்கு ஏற்ப கச்சா எண்ணெயை இந்தியா தொடர்ந்து தடையின்றிக் கொள்முதல் செய்யும் என்று தெரிவித்துள்ளது.
மேலும் அமெரிக்காவின் இந்த அணுகுமுறையை விமர்சித்துள்ள வெளியுறவுத்துறை, இத்தகைய ஒருதலைப்பட்ச வர்த்தக நடவடிக்கைகள் பல ஆண்டுகளாகப் பேணி வளர்க்கப்பட்ட இந்தியா - அமெரிக்கா இடையிலான இருதரப்பு நல்லுறவுகளை ஆழமாகப் பாதிக்கும். அத்துடன், உலகளாவிய எரிசக்தி சந்தையில் தேவையற்ற ஸ்திரமின்மையையும் பெரும் குழப்பத்தையும் ஏற்படுத்தும். இந்த வர்த்தக மசோதாவினால் எழும் எத்தகைய சவால்களையும் விளைவுகளையும் துணிவுடன் எதிர்கொண்டு சமாளிக்க இந்தியா முழுமையான தயார் நிலையில் உள்ளது என்று உறுதியுடன் தெரிவித்துள்ளது.
இதையும் படிங்க: பீரங்கிகளை வேட்டையாடும் அதிநவீன ஜேவலின் ஏவுகணை! அமெரிக்காவுடன் இந்தியா மெகா ஒப்பந்தம்!