திருப்பூர் மாவட்டம் தாராபுரம் (தனி) சட்டமன்றத் தொகுதி இடைத்தேர்தலில் தமிழக வெற்றிக் கழகம் சார்பில் போட்டியிடும் வேட்பாளர் சத்யபாமாவுக்கு ஆதரவு திரட்டும் வகையில், முதலமைச்சரும் தவெக தலைவருமான விஜய் இன்று பிரசாரத்தில் களமிறங்கினார். அக்டோபர் 6ஆம் தேதி நடைபெறவுள்ள இந்த இடைத்தேர்தல், முன்னாள் அதிமுக எம்.எல்.ஏ. சத்யபாமா பதவி ராஜினாமா செய்து தவெகவில் இணைந்ததைத் தொடர்ந்து ஏற்பட்டது. 

மதுராந்தகம் தொகுதியுடன் இணைந்து நடைபெறும் இந்தத் தேர்தலில் தவெக, திமுக, அதிமுக உள்ளிட்ட கட்சிகள் கடும் போட்டியில் ஈடுபட்டுள்ளன. இன்று காலை சென்னையிலிருந்து தனி விமானம் மூலம் கோவை விமான நிலையம் வந்தடைந்த விஜய், அங்கிருந்து சாலை வழியாக தாராபுரம் தொகுதிக்குச் சென்றார். மாருதி நகரில் அமைக்கப்பட்டிருந்த பிரமாண்ட பொதுக்கூட்ட மேடைக்கு மதியம் 3.40 மணியளவில் அவர் வந்து சேர்ந்தார். 

கோவையிலிருந்து திருப்பூர் வரையிலான பாதையில் பொதுமக்கள் பெருமளவில் குழுமியிருந்து அவருக்கு வரவேற்பு அளித்தனர். கூட்ட இடத்திலும் அமைச்சர்கள் மற்றும் தவெக தலைவர்கள் அவரை வரவேற்றனர். நிகழ்ச்சியின் போது, அதிமுகவிலிருந்து விலகி தவெகவில் இணைந்த செம்மலைக்கு விஜய் கட்சி துண்டு அணிவித்து கட்சியில் இணைத்துக் கொண்டார். அமமுகவின் மன்னார்குடி எம்.எல்.ஏ. காமராஜ் உள்ளிட்டோரும், சமீபத்தில் அதிமுகவிலிருந்து தவெகவுக்கு மாறிய தலைவர்களும் அவரை வரவேற்றனர்.

இதையும் படிங்க: தாராபுரத்தில் தவெகவின் கணக்கு தப்பியதா? அருண்ராஜ் vs செங்கோட்டையன்.. கள நிலவரம் என்ன??

மாலை 4 மணியளவில் மேடை ஏறிய விஜய், கூடியிருந்த மக்களைப் பார்த்து கையசைத்தார். தமிழ்த்தாய் வாழ்த்துடன் நிகழ்ச்சி தொடங்கியது. தவெக பொதுச் செயலாளர் என். ஆனந்த் வரவேற்புரை வழங்கினார். அதைத் தொடர்ந்து அமைச்சர் செங்கோட்டையன் பேசுகையில், தாராபுரம் தேர்தல் பிரசாரம் வரலாற்றுச் சிறப்புமிக்கது என்றும், வெற்றித் தளபதி விஜயின் கைகளில் தமிழகத்தின் எதிர்காலத்தை மக்கள் ஒப்படைத்துள்ளனர் என்றும் குறிப்பிட்டார். 

உச்சநீதிமன்ற நீதிபதிகளும் அவரது செயல்களைப் பாராட்டியுள்ளதாகக் கூறிய அவர், அக்டோபர் 6ஆம் தேதி தாராபுரம் விஜயின் கோட்டையாக மாறும் என நம்பிக்கை தெரிவித்தார். ஆனைமலையாறு நல்லாறு திட்டத்தை நிறைவேற்ற வேண்டும் என்ற மக்கள் வேண்டுகோளையும், 147 கோடி ரூபாய் மதிப்பிலான குடிநீர் திட்டத்திற்கான ஆணை இன்று வழங்கப்படும் என்றும் அவர் தெரிவித்தார். 

இரு தொகுதிகளின் தீர்ப்பும் இந்தியாவையே வியக்கச் செய்யும் எனக் கூறி, வெற்றியை வெற்றித் தளபதியிடம் ஒப்படைப்போம் என்று கூறினார். இந்தப் பிரசாரக் கூட்டம் தவெகவின் இறுதிகட்ட முயற்சிகளில் ஒன்றாக அமைந்துள்ளது.

இதையும் படிங்க: அதிமுகவில் இருந்து 20 எம்எல்ஏக்கள் தவெகவுக்கு வர ரெடி! தாராபுரத்தில் செங்கோட்டையன் பேச்சால் பரபரப்பு!