இந்தியாவின் டிஜிட்டல் வளர்ச்சிக்கு மிகப்பெரிய ஊக்கமாக, உலகளாவிய தரவு மைய நிறுவனமான ஏர் டிரங்க், நாட்டில் சுமார் ரூ.3 லட்சம் கோடி முதலீடு செய்ய உள்ளதாக அறிவித்துள்ளது. இதனுடன் 5 ஜிகாவாட் திறன் கொண்ட மிகப்பெரிய தரவு மையத் திட்டத்தையும் நிறுவனம் செயல்படுத்த உள்ளது.
இந்த முக்கிய அறிவிப்பை பிரதமர் நரேந்திர மோடி தனது சமூக வலைதளப் பதிவின் மூலம் பகிர்ந்துள்ளார். இந்தியாவின் டிஜிட்டல் உள்கட்டமைப்பு துறை வேகமாக வளர்ச்சி அடைந்து வரும் நிலையில், ஏர் டிரங்க் நிறுவனத்தின் இந்த முதலீடு நாட்டின் தொழில்நுட்ப வளர்ச்சியில் புதிய அத்தியாயத்தை உருவாக்கும் என அவர் தெரிவித்துள்ளார்.
இந்தியாவில் இதுவரை அறிவிக்கப்பட்டுள்ள டிஜிட்டல் உள்கட்டமைப்பு முதலீடுகளில் இதுவே மிகப்பெரிய முதலீடாக கருதப்படுகிறது. 5 ஜிகாவாட் திறன் கொண்ட தரவு மையம் உருவானால், கிளவுட் கம்ப்யூட்டிங், செயற்கை நுண்ணறிவு (AI), தரவு சேமிப்பு மற்றும் டிஜிட்டல் சேவைகள் போன்ற துறைகளில் இந்தியா உலகளாவிய மையமாக உருவெடுக்கும் வாய்ப்பு அதிகரிக்கும்.
இதையும் படிங்க: பிரதமர் மோடியை மிரட்டுறதுல பயன் இல்ல!! இந்தியா - அமெரிக்கா உறவு ரஷ்யாவை பாதிக்காது - புடின் திட்டவட்டம்!
மேலும், இந்த முதலீட்டின் மூலம் ஆயிரக்கணக்கான புதிய வேலைவாய்ப்புகள் உருவாகும் என எதிர்பார்க்கப்படுகிறது. தகவல் தொழில்நுட்பம், கட்டுமானம், மின்சாரம், பராமரிப்பு மற்றும் துணைத் தொழில்கள் உள்ளிட்ட பல துறைகள் இதன் மூலம் பயனடையும். அதேபோல், உள்ளூர் விநியோக சங்கிலி வலுப்பெறுவதோடு, புதிய கண்டுபிடிப்புகள் மற்றும் தொழில்நுட்ப புதுமைகளுக்கும் இது வழிவகுக்கும் என்று கூறப்படுகிறது.
இந்தியா தற்போது உலகின் மிக வேகமாக வளர்ந்து வரும் டிஜிட்டல் பொருளாதார நாடுகளில் ஒன்றாக திகழ்கிறது. டிஜிட்டல் சேவைகள், தரவு பயன்பாடு மற்றும் செயற்கை நுண்ணறிவு துறைகளில் இந்தியாவின் பங்கு தொடர்ந்து அதிகரித்து வருகிறது.
உலகின் டிஜிட்டல் பொருளாதாரத்தின் எதிர்காலம் இந்தியாவில் உருவாகி வருவது தெளிவாக தெரிகிறது என்று பிரதமர் மோடி குறிப்பிட்டுள்ளார். ஏர் டிரங்க் நிறுவனத்தின் இந்த மாபெரும் முதலீட்டு அறிவிப்பு, இந்தியாவின் டிஜிட்டல் கனவுகளை மேலும் வலுப்படுத்தும் முக்கிய முன்னேற்றமாக பார்க்கப்படுகிறது.
இதையும் படிங்க: எனக்கு மோடியை ரொம்ப புடிக்கும்! நல்ல நண்பர்! விரைவில் ஒப்பந்தம் கையெழுத்தாகும் என அதிபர் ட்ரம்ப் நம்பிக்கை!