இறைவனின் தூதரான ஹஹ்ரத் இப்ராஹீம் நபியின் அளவற்ற தியாகத்தை நினைவுகூரும் வகையில் உலகெங்கிலும் உள்ள இஸ்லாமிய சமூகத்தினர் ஆண்டுதோறும் பக்ரீத் (ஈதுல் அழ்ஹா) பண்டிகையை மிகுந்த பக்தியுடன் கொண்டாடி வருகின்றனர். தியாகத்தின் மகிமையை உணர்த்தும் இந்தப் பெருநாள், உறவுகளை வலுப்படுத்துவதோடு, ஏழை எளியோருக்கு உதவும் பண்பையும் வளர்க்கிறது. இந்த ஆண்டு ஜூன் 28-ம் தேதி பக்ரீத் கொண்டாடப்படவுள்ள நிலையில், சென்னையில் ஆடு விற்பனை சந்தைகள் உற்சாகமாகக் களைகட்டத் தொடங்கியுள்ளன.

குறிப்பாக, சென்னை புளியந்தோப்பு ஆட்டு தொட்டியில் காலை முதல் இரவு வரை பரபரப்பான சூழல் நிலவுகிறது. ஏராளமான ஆடுகள் வரிசையாகக் கட்டப்பட்டு விற்பனைக்குக் காட்சியளிக்கின்றன. பண்டிகை நெருங்கும் வேளையில், குர்பானி செய்ய ஆடுகளை வாங்குவதற்காக பொதுமக்களும், வியாபாரிகளும் பெருந்திரளாகக் குவிந்து வருகின்றனர். சிலர் குடும்பத்துடன் வந்து தங்களுக்குப் பிடித்த ஆடுகளைத் தேர்ந்தெடுக்கும் காட்சிகள் அங்கு வழக்கமாகக் காணப்படுகின்றன.

ஆடுகளின் எடை, உயரம், உடல்நலம் மற்றும் தரத்தின் அடிப்படையில் விலை நிர்ணயம் செய்யப்படுகிறது. சாதாரண ஆடுகள் ரூ.8,000 முதல் ரூ.15,000 வரையிலும், பிரத்யேகமாக குர்பானிக்காக வளர்க்கப்படும் பிரம்மாண்டமான ‘கடா’ ஆடுகள் ரூ.20,000 முதல் ரூ.40,000 வரைக்கும் விற்கப்படுகின்றன. இந்த ‘கடா’ ஆடுகள் தங்கள் பெரிய உடலமைப்பு மற்றும் அழகிய தோற்றத்தால் வாங்குபவர்களின் கவனத்தை ஈர்க்கின்றன. வியாபாரிகள் ஆடுகளை நல்ல முறையில் பராமரித்து, சத்தான உணவு கொடுத்து வளர்த்து வருவதாகத் தெரிவிக்கின்றனர்.

இதையும் படிங்க: தவெக-வின் குதிரை பேர அரசியலுக்கு கண்டனம்! அதிமுக பொதுச் செயலாளர் எடப்பாடி பழனிசாமி அறிக்கை!

ஆட்டு தொட்டியில் விற்பனை வழக்கத்தை விட இந்த ஆண்டு அதிக அளவில் நடைபெறுவதாக வியாபாரிகள் மகிழ்ச்சியுடன் கூறுகின்றனர். “பண்டிகைக்கு முன்பாகவே மக்கள் ஆர்வத்துடன் வருகின்றனர். தரமான ஆடுகளுக்கு நல்ல விலை கிடைக்கிறது” என ஒரு வியாபாரி தெரிவித்தார். பலர் ஆடுகளை வாங்கிச் செல்ல லாரிகள், வேன்கள் உள்ளிட்ட வாகனங்களை ஏற்பாடு செய்து வருகின்றனர். சுகாதாரம் மற்றும் கால்நடைத்துறை அதிகாரிகளும் சந்தையை மேற்பார்வையிட்டு வருகின்றனர். 

பக்ரீத் பண்டிகை அனைவருக்கும் மகிழ்ச்சியையும், அமைதியையும் தரும் வகையில் கொண்டாடப்பட வேண்டும் என சமூகத் தலைவர்கள் வலியுறுத்துகின்றனர். இந்தத் தியாகத் திருநாளில் பகிர்வு மனப்பான்மையுடன் ஏழைகளுக்கு உதவி செய்யும் வழக்கம் இஸ்லாமிய சமூகத்தில் தொடர்ந்து பின்பற்றப்பட்டு வருகிறது.

இதையும் படிங்க: தமிழ்நாட்டில் புதிய படங்களுக்கு தினசரி 5 காட்சிகள் திரையிட அனுமதி! முதலமைச்சர் விஜய் அரசாணை வெளியீடு!