தமிழகச் சட்டமன்றத் தேர்தலை முன்னிட்டு கோவையில் இன்று நடைபெற்ற பிரம்மாண்டப் பொதுக்கூட்டத்தில் உரையாற்றிய அதிமுக பொதுச்செயலாளர் எடப்பாடி கே. பழனிசாமி, பிரச்சாரத்தின் போது குழந்தைகள் தன்னிடம் வழங்கிய ஒரு டி-ஷர்ட் (பனியன்) குறித்து உருக்கமாகப் பேசினார்.
பிரச்சாரக் களத்திற்கு வந்தபோது சிறுவர்கள் மற்றும் சிறுமியர் தன்னிடம் ஒரு டி-ஷர்ட்டை வழங்கியதாகக் குறிப்பிட்ட இபிஎஸ், அதில் எழுதப்பட்டிருந்த வாசகங்களை வாசித்துக் காட்டினார்:
அண்ணா திமுக ஆட்சி வரவேண்டும்; திமுக ஆட்சி வேண்டாம்.
மீண்டும் அதிமுக ஆட்சி வந்தால்தான் எங்களுக்குப் பாதுகாப்பு; அதிமுக-தான் பெண்களுக்குப் பாதுகாப்பு.
திமுக இனி எப்போதும் எங்களுக்கு வேண்டாம்.
குழந்தைகள் தன்னிடம் அந்த டி-ஷர்ட்டை வழங்கி, ஐயா! உங்கள் ஆட்சி நிச்சயமாக மலரும்; ஆட்சிக்கு வந்த பிறகு எங்களைப் போன்ற பெண்களுக்குப் பாதுகாப்பு கொடுக்க வேண்டும் என்று வேண்டியதாக அவர் தெரிவித்தார்.
இதையும் படிங்க: சினிமா வேற.. நிஜம் வேற..! விஜய்யை வெளுத்து வாங்கிய எஸ்.பி. வேலுமணி!
இது குறித்து அவர் பேசுகையில், அந்தச் சிறுவயதுக் குழந்தைகளின் மனதில் இந்த விவகாரம் எவ்வளவு ஆழமாகப் பதிந்துள்ளது என்பதை நாம் எண்ணிப் பார்க்க வேண்டும். ஒரு குழந்தையின் மனதில் கூடப் பாதுகாப்பு குறித்த அச்சத்தை விதைத்துள்ள ஒரு கொடுமையான ஆட்சிதான் தற்போது தமிழகத்தில் நடந்து கொண்டிருக்கிறது எனச் சாடினார்.
தமிழகத்தில் சட்டம்-ஒழுங்கு சீர்குலைந்துள்ளதைச் சுட்டிக்காட்டிய அவர், பெண்கள் மற்றும் குழந்தைகளின் பாதுகாப்பை உறுதி செய்ய அதிமுக மீண்டும் ஆட்சிக்கு வர வேண்டியது அவசியம் என்றார். "பெண்களின் கண்ணீரைத் துடைக்கவும், குழந்தைகளுக்குப் பாதுகாப்பான எதிர்காலத்தை வழங்கவும் வரும் சட்டமன்றத் தேர்தலில் அனைத்திந்திய அண்ணா திராவிட முன்னேற்றக் கழகத்திற்கு வாக்களித்து, எங்களது வேட்பாளர்களைப் பெருவாரியான வாக்குகள் வித்தியாசத்தில் வெற்றிபெறச் செய்யுங்கள்" என மக்களிடம் அவர் வேண்டுகோள் விடுத்தார்.
இதையும் படிங்க: கொள்கை உறவு... வெற்றி கூட்டணி! கூட்டணி கட்சி தலைவர்களுடன் முதல்வர் ஸ்டாலின் நெகிழ்ச்சி உரை!