தமிழகச் சட்டமன்றத் தேர்தல் முடிவுகள் நாளை (மே 4) வெளியாக உள்ள நிலையில், அரசியல் களம் மிகக் கடுமையான வார்த்தைப் போர்களுக்கும், புகார் மனுக்களுக்கும் சாட்சியாகி வருகிறது. இந்நிலையில், ஆளுங்கட்சியான திமுக சார்பில் அதன் அமைப்புச் செயலாளர் ஆர்.எஸ். பாரதி, மாநிலத் தலைமைத் தேர்தல் அதிகாரி மற்றும் காவல்துறை தலைமை இயக்குநர் (DGP) ஆகியோருக்கு அவசரக் கடிதம் ஒன்றை அனுப்பியுள்ளார்.

ஆர்.எஸ். பாரதி அனுப்பியுள்ள அந்தக் கடிதத்தில், நாளை நடைபெற உள்ள வாக்கு எண்ணிக்கை நடைமுறைகளைச் சிதைக்கச் சில சக்திகள் முயன்று வருவதாகக் குறிப்பிட்டுள்ளார். தமிழகத்தில் நாளை வாக்கு எண்ணிக்கை நடைபெறும் போது, திட்டமிட்டே குழப்பங்களை ஏற்படுத்தி, சட்டம் ஒழுங்கிற்குப் பாதிப்பை ஏற்படுத்த பாஜகவும், இன்னும் சில அரசியல் கட்சிகளும் சதித் திட்டங்களை வகுத்துள்ளதாக எங்களுக்குத் நம்பகமான தகவல்கள் கிடைத்துள்ளன என்று அவர் அதில் தெரிவித்துள்ளார்.

தேர்தல் முடிவுகள் தங்களுக்குச் சாதகமாக வராத சூழலில், வாக்கு எண்ணிக்கை மையங்களில் ரகளையில் ஈடுபடவும், ஜனநாயக ரீதியான நடைமுறைகளைத் தடுத்து நிறுத்தவும் எதிர்க்கட்சிகள் திட்டமிட்டுள்ளதாக திமுக தரப்பில் குற்றம் சாட்டப்பட்டுள்ளது.

இதையும் படிங்க: வாக்கு எண்ணிக்கை தயார்நிலை! 234 தொகுதி பார்வையாளர்களுடன் இந்திய தேர்தல் ஆணையம் தீவிர ஆலோசனை!

இந்தச் சதித் திட்டங்களை முறியடிக்கத் தேர்தல் ஆணையம் மற்றும் காவல்துறை மிகத் தீவிரமான பாதுகாப்பு நடவடிக்கைகளை மேற்கொள்ள வேண்டும் என திமுக வலியுறுத்தியுள்ளது. குறிப்பாக  மாநிலம் முழுவதும் அமைக்கப்பட்டுள்ள 62 வாக்கு எண்ணிக்கை மையங்களிலும் கூடுதல் ஆயுதம் ஏந்திய காவலர்களைப் பணியமர்த்த வேண்டும். முக்கிய அரசியல் கட்சிகளின் தலைமையகங்கள் மற்றும் மாவட்ட அலுவலகங்களுக்குத் தகுந்த பாதுகாப்பு வழங்கப்பட வேண்டும். முடிவுகள் வெளியாகும் போது தேவையற்ற வன்முறைகள் வெடிக்காமல் இருக்க, மாநிலம் முழுவதும் ரோந்துப் பணிகளைத் தீவிரப்படுத்த வேண்டும்.

ஏற்கனவே அதிமுக மற்றும் பாஜக தரப்பில் தேர்தல் முடிவுகள் தங்களுக்குச் சாதகமாக வரும் எனத் தன்னம்பிக்கை தெரிவித்து வரும் நிலையில், திமுகவின் இந்தப் புகார் மனு அரசியல் வட்டாரத்தில் பெரும் பரபரப்பை ஏற்படுத்தியுள்ளது. தேர்தல் முடிவுகள் வெளியாவதற்கு முன்னரே இத்தகைய குற்றச்சாட்டுகள் எழுவது, வாக்கு எண்ணிக்கை மையங்களில் நாளை பதற்றமான சூழல் நிலவக்கூடும் என்பதைக் கோடிட்டுக் காட்டுகிறது.

இதையும் படிங்க: வாக்கு எண்ணிக்கையின் போது விழிப்புடன் இருங்கள்.. பாமக மற்றும் கூட்டணிக் கட்சி முகவர்களுக்கு அன்புமணி அறிவுரை!