தமிழக அரசியலில் புதிய விவாதத்தை கிளப்பும் வகையில், அ.தி.மு.க. பொதுச்செயலர் எடப்பாடி பழனிசாமியின் சமீபத்திய அரசியல் அணுகுமுறை கட்சிக்குள்ளேயே கேள்விகளை எழுப்பியுள்ளதாக தகவல்கள் வெளியாகியுள்ளன. குறிப்பாக, ஆளுங்கட்சியான தமிழக வெற்றிக் கழகத்தை கடுமையாக விமர்சித்து வரும் நிலையில், தி.மு.க. மீதான தாக்குதல்கள் கணிசமாக குறைந்திருப்பது சில நிர்வாகிகளிடையே அதிருப்தியை ஏற்படுத்தியுள்ளதாக கூறப்படுகிறது.
கடந்த பல தசாப்தங்களாக தமிழக அரசியல் களத்தில் தி.மு.க. மற்றும் அ.தி.மு.க. நேரடி போட்டியாளர்களாக இருந்து வந்தன. தேர்தல் மேடைகள் முதல் சட்டசபை வரை இரு கட்சிகளும் ஒன்றையொன்று கடுமையாக விமர்சித்த வரலாறு உள்ளது. ஆனால், தமிழக வெற்றிக் கழகம் ஆட்சிக்கு வந்த பிறகு அரசியல் சூழல் மாறியுள்ளதாக அரசியல் பார்வையாளர்கள் குறிப்பிடுகின்றனர்.
சட்டம்-ஒழுங்கு பிரச்சினைகள், மின்வெட்டு, நிர்வாக குறைபாடுகள் உள்ளிட்ட விவகாரங்களில் பழனிசாமி தொடர்ந்து அறிக்கைகள் வெளியிட்டு வருகிறார். ஆனால், அதே அறிக்கைகளில் முன்னாள் ஆளுங்கட்சியான தி.மு.க. குறித்த விமர்சனங்கள் மிகவும் குறைவாக உள்ளதாக கட்சி வட்டாரங்களில் பேசப்படுகிறது.
இதையும் படிங்க: போறவங்க போகட்டும்! இனி பேசி புண்ணியம் இல்ல! அதிமுக நிர்வாகிகளிடம் புலம்பிய எடப்பாடி பழனிசாமி!
அ.தி.மு.க. நிர்வாகிகள் சிலர் கூறுவதாவது, தற்போதைய அரசின் பல சவால்களுக்கு முந்தைய ஆட்சியின் செயல்பாடுகளும் ஒரு காரணமாக இருந்ததாக அவர்கள் கருதுகின்றனர். எனவே, அரசியல் ரீதியாக தி.மு.க. மற்றும் த.வெ.க. ஆகிய இரு கட்சிகளையும் ஒரே நேரத்தில் எதிர்க்க வேண்டிய அவசியம் இருப்பதாக அவர்கள் வலியுறுத்துகின்றனர்.
குறிப்பாக மேகதாது அணை விவகாரம் உள்ளிட்ட முக்கிய பிரச்சினைகளில் கூட தி.மு.க.வை நேரடியாக விமர்சிக்காமல் பழனிசாமி செயல்படுவது குறித்து சிலர் கேள்வி எழுப்புகின்றனர். மேலும், கட்சியின் அதிகாரப்பூர்வ அறிக்கைகளிலும் தி.மு.க. குறித்த குறிப்புகள் அரிதாகவே இடம்பெறுவதாகவும் அவர்கள் சுட்டிக்காட்டுகின்றனர்.
இதற்கிடையில், அ.தி.மு.க. மற்றும் தி.மு.க. இடையேயான அரசியல் உறவு குறித்து முன்னதாகவே சில மூத்த தலைவர்கள் கருத்து தெரிவித்திருந்த நிலையில், தற்போது பழனிசாமியின் அரசியல் உத்தி மீண்டும் விவாதப் பொருளாக மாறியுள்ளது. எனினும், இது கட்சியின் நீண்டகால திட்டத்தின் ஒரு பகுதியாக இருக்கலாம் என்றும், தற்போதைய ஆளுங்கட்சியை மையமாகக் கொண்டு எதிர்க்கட்சிப் பணியை முன்னெடுக்கும் முயற்சியாகவும் சிலர் விளக்குகின்றனர். இந்த அரசியல் அணுகுமுறை அ.தி.மு.க.வுக்கு பலனளிக்குமா என்பது வரவிருக்கும் அரசியல் நிகழ்வுகளில் தெரியவரும்.
இதையும் படிங்க: கட்சி தாவிய எம்.எல்.ஏ-க்கள் இடைத்தேர்தலில் போட்டியிட தடை! முதல்வர் விஜய் கறார்! நால்வரும் அதிர்ச்சி!