இந்திய உணவுப் பாதுகாப்பு மற்றும் தர நிர்ணய ஆணையம் (FSSAI) குழந்தைகளின் ஆரோக்கியத்தைப் பாதுகாக்கும் நோக்கில் முக்கியமான ஒரு நடவடிக்கையை முன்மொழிந்துள்ளது. 6 மாதங்கள் வரையிலான பச்சிளம் குழந்தைகளுக்கான ஊட்டச்சத்து உணவுப் பொருட்களில் சுக்ரோஸ் மற்றும் பிரக்டோஸ் போன்ற சர்க்கரை வகைகளைச் சேர்ப்பதை முழுமையாகத் தடை செய்யும் வகையில் புதிய வரைவு விதிகள் வெளியிடப்பட்டுள்ளன.
இந்த வரைவு, 2020ம் ஆண்டின் குழந்தை ஊட்டச்சத்து உணவுகள் தொடர்பான ஒழுங்குமுறைகளில் திருத்தமாக அறிவிக்கப்பட்டுள்ளது. இந்திய அரசிதழில் வெளியிடப்பட்ட இந்த வரைவு விதிகளின்படி, “6 மாதங்கள் வரையிலான குழந்தைகளுக்கான தயாரிப்புகளில் சுக்ரோஸ் மற்றும் பிரக்டோஸ் சேர்க்கப்படக்கூடாது” என்று தெளிவாகக் குறிப்பிடப்பட்டுள்ளது.
தற்போதைய விதிகளின்படி லாக்டோஸ் மற்றும் குளுக்கோஸ் பாலிமர்கள் முன்னுரிமை கார்போஹைட்ரேட் ஆதாரங்களாகக் கருதப்படுகின்றன. சுக்ரோஸ் அல்லது பிரக்டோஸைத் தேவைப்படும் போது மட்டும், மொத்த கார்போஹைட்ரேட்டில் 20 சதவீதத்திற்கு மிகாமல் சேர்க்க அனுமதிக்கப்பட்டது. புதிய வரைவு இந்த அனுமதியை 6 மாதங்கள் வரையிலான குழந்தைகளுக்கான பொருட்களில் முற்றிலும் நீக்குகிறது.
இதையும் படிங்க: பாகிஸ்தானில் லஷ்கர்-இ-தொய்பா முக்கிய தலைவர் மர்ம மரணம்! ஹபீஸ் சயீத்தின் நெருங்கிய கூட்டாளி பலி!
இந்த நடவடிக்கையின் பின்னணியில் குழந்தைகளின் ஆரம்பகால வளர்ச்சி முக்கியத்துவம் வகிக்கிறது. பிறந்ததிலிருந்து 6 மாதங்கள் வரையிலான காலம் உடல் மற்றும் மூளை வளர்ச்சிக்கு மிகவும் முக்கியமானது. இந்த காலகட்டத்தில் கூடுதல் சர்க்கரைகளை உட்கொள்வது உடல் பருமன், பல் சொத்தை, நீரிழிவு போன்ற நீண்டகால உடல்நலப் பிரச்சினைகளுக்கு வழிவகுக்கும் என்பதால், அவற்றைத் தவிர்ப்பதே இந்தத் திட்டத்தின் நோக்கம். உலக சுகாதார அமைப்பு (WHO) முதல் 6 மாதங்களுக்கு தாய்ப்பால் மட்டும் கொடுக்க பரிந்துரைக்கும் நிலையில், இது அந்த நடைமுறைக்கு ஆதரவாகவும் அமையும்.
இந்த வரைவு விதிகள் இன்னும் இறுதி செய்யப்படவில்லை. பொதுமக்கள், உற்பத்தியாளர்கள் மற்றும் தொடர்புடைய தரப்பினர் தங்கள் கருத்துகள், ஆட்சேபனைகள் அல்லது பரிந்துரைகளை 60 நாட்களுக்குள் சமர்ப்பிக்கலாம். அதன் பின்னர் கருத்துகளை ஆய்வு செய்து அடுத்த கட்ட நடவடிக்கைகள் எடுக்கப்படும். இந்த முயற்சி குழந்தைகளின் ஆரோக்கியமான எதிர்காலத்தை உறுதி செய்யும் முக்கியமான படியாகக் கருதப்படுகிறது.
இதையும் படிங்க: எல்லைப் பாதுகாப்பு ரகசியங்கள் லீக்?! ராணுவ அதிகாரியின் மனைவி மீது சீன உளவு குற்றச்சாட்டு! தீவிர விசாரணை!