ஒடிசா அரசு, பள்ளி மாணவர்களின் கல்வி அணுகலை மேம்படுத்தி, தொலைவு காரணமாக ஏற்படும் படிப்பு இடைநிறுத்தத்தை (டிராப்அவுட்) தடுக்கும் நோக்கில், 'முக்யமந்திரி பஸ் சேவா' (எம்பிஎஸ்) திட்டத்தின் கீழ் இலவச பேருந்து பயணத்தை அறிவித்துள்ளது.

இந்த அறிவிப்பு, வணிகம் மற்றும் போக்குவரத்துத் துறையால் வெளியிடப்பட்ட அரசாணையின் மூலம் உறுதிப்படுத்தப்பட்டுள்ளது. முன்பு, மாணவர்களுக்கு 50 சதவீத கட்டண சலுகை வழங்கப்பட்டது. தற்போது, இது முழுமையான இலவச பயணமாக மாற்றப்பட்டுள்ளது. ஏசி மற்றும் நான்-ஏசி பேருந்துகளில் இந்த சலுகை பொருந்தும். 

இந்த திட்டம், கடந்த ஆகஸ்ட் 21ம் தேதி அன்று முதலமைச்சர் மோகன் சரண் மஜ்ஹி தலைமையில் நடைபெற்ற உயர்மட்ட கூட்டத்தில் விவாதிக்கப்பட்டு, பள்ளி மற்றும் வெகுஜன கல்வித் துறையின் முன்மொழிவின் அடிப்படையில் அங்கீகரிக்கப்பட்டது. இதனையடுத்து ஜூன் 2ம் தேதி அன்று வெளியிடப்பட்ட முந்தைய உத்தரவின் அடிப்படையில் இது உருவாக்கப்பட்டுள்ளது.

இதையும் படிங்க: இந்த சர்டிபிகேட் இல்லயா.. அப்போ பெட்ரோல், டீசல் கிடையாது..!! ஒடிசா அரசு அதிரடி நடவடிக்கை..!!

இந்த திட்டத்தின் நோக்கம், கிராமப்புற மற்றும் நகர்ப்புற மாணவர்களின் தினசரி பயணச் சிரமங்களை குறைத்து, பள்ளி வருகையை ஊக்குவிப்பதாகும். தொலைவில் உள்ள பள்ளிகளுக்கு செல்லும் மாணவர்கள் பலர், போக்குவரத்து செலவு அல்லது சிரமம் காரணமாக படிப்பை இடையில் நிறுத்துவதை தடுக்க இது உதவும்.

ஒடிசாவில் உள்ள ஏராளமான மாணவர்கள், குறிப்பாக பொருளாதாரத்தில் பின்தங்கிய குடும்பங்களைச் சேர்ந்தவர்கள், இந்த சலுகையால் பயன்பெறுவார்கள் என எதிர்பார்க்கப்படுகிறது. திட்டத்தின் செயலாக்கம் எவ்வாறு? மாணவர்கள் செல்லுபடியாகும் மாணவர் அடையாள அட்டை அல்லது பள்ளி சீருடையை காட்டி பேருந்தில் ஏறலாம். அப்போது, எலக்ட்ரானிக் டிக்கெட் இஷ்யூ மெஷின் (இடிஐஎம்) மூலம் ஜீரோ மதிப்பு டிக்கெட் உருவாக்கப்படும். இது மாணவர்களுக்கு எந்த செலவும் இல்லாமல் பயணத்தை உறுதி செய்யும்.

ஒடிசா மாநில சாலை போக்குவரத்து கழகம் (ஓஎஸ்ஆர்டிசி) இந்த திட்டத்தை செயல்படுத்தும் பொறுப்பை ஏற்றுள்ளது. அவர்கள் டிக்கெட்டிங் மென்பொருளை புதுப்பித்து, பேருந்து வழித்தடங்கள் மற்றும் நேரங்களை மறுஆய்வு செய்ய உத்தரவிடப்பட்டுள்ளது. இதன் மூலம், அதிக எண்ணிக்கையிலான பள்ளிகளை உள்ளடக்கிய வகையில் வழித்தடங்கள் வடிவமைக்கப்படும்.

இந்த அறிவிப்பு, ஒடிசாவின் கல்வி துறையில் ஒரு முக்கிய மைல்கல்லாக கருதப்படுகிறது. மாநிலத்தில் உள்ள ஏராளமான கிராமப்புற பள்ளிகளுக்கு செல்லும் மாணவர்களுக்கு இது பெரும் உதவியாக இருக்கும். குறிப்பாக, பெண் மாணவர்களின் பள்ளி வருகை அதிகரிக்கும் என கல்வி வல்லுநர்கள் கருத்து தெரிவித்துள்ளனர்.

அரசு, இந்த திட்டத்தின் மூலம் கல்வி சமத்துவத்தை உறுதி செய்ய நடவடிக்கை எடுத்துள்ளது. மேலும், இந்த திட்டம் ஒடிசா கெசட்டில் வெளியிடப்பட்டு, அனைத்து விதிமுறைகளும் பின்பற்றப்படும் என தெரிவிக்கப்பட்டுள்ளது. முந்தைய உத்தரவின் பிற அம்சங்கள் மாற்றமின்றி தொடரும். இந்த அறிவிப்பு, மாநில அரசின் கல்வி முன்னுரிமையை வெளிப்படுத்துகிறது.

இதையும் படிங்க: இந்த சர்டிபிகேட் இல்லயா.. அப்போ பெட்ரோல், டீசல் கிடையாது..!! ஒடிசா அரசு அதிரடி நடவடிக்கை..!!