தமிழகத்தில் கிராமப்புற மக்களின் வாழ்வாதாரத்தை மேம்படுத்தும் நோக்கில் செயல்பட்டு வரும் ஊரக வேலைவாய்ப்புத் திட்டத்தின் கீழ் முக்கியமான அறிவிப்பு ஒன்று வெளியாகியுள்ளது. மத்திய அரசின் விக்சித் பாரத் வேலைவாய்ப்பு மற்றும் வாழ்வாதார இயக்கத் திட்டம் (விபி-ஜி ராம் ஜி) மூலம் கிராமப்புற குடும்பங்களுக்கு ஆண்டுக்கு 125 நாட்கள் வேலைவாய்ப்பு உறுதி செய்யப்பட்டு வருகிறது. இந்த அடிப்படை வசதியை முழுமையாகப் பயன்படுத்தி 125 நாட்கள் வேலையை நிறைவு செய்துள்ள தகுதியுள்ள குடும்பங்களுக்கு, மாநில அரசு தனது சொந்த நிதியிலிருந்து கூடுதலாக 25 நாட்கள் வேலை வழங்க முடிவு செய்து அரசாணை வெளியிட்டுள்ளது.

இதன் மூலம் பயனடையும் குடும்பங்கள் ஆண்டுக்கு மொத்தம் 150 நாட்கள் வரை உறுதியான வேலைவாய்ப்பைப் பெற முடியும்.இந்த கூடுதல் வேலைவாய்ப்பு முழுவதும் மாநில அரசின் நிதியில் செயல்படுத்தப்படும். 2026-27 நிதியாண்டின் திருத்தப்பட்ட வரவு-செலவுத் திட்ட மதிப்பீட்டிலிருந்து இதற்காக ரூபாய் 100 கோடி நிதி ஒதுக்கீடு செய்யப்பட்டுள்ளது. இது கிராமப்புற ஏழை, எளிய மற்றும் நலிவுற்ற குடும்பங்களின் பொருளாதார பாதுகாப்பை மேலும் உறுதிப்படுத்தும் நடவடிக்கையாகக் கருதப்படுகிறது.

ஏற்கனவே திட்டத்தின் கீழ் வழங்கப்படும் 125 நாட்கள் வேலையை முழுமையாகப் பயன்படுத்திய குடும்பங்களுக்கு மட்டுமே இந்த கூடுதல் வாய்ப்பு கிடைக்கும் என்பது குறிப்பிடத்தக்க நிபந்தனையாகும்.முன்னுரிமை அடிப்படையில் இந்த கூடுதல் 25 நாட்கள் வேலை வழங்கப்படும். பெண்கள் தலைமையிலான குடும்பங்கள், தனித்து வாழும் பெண்கள், மாற்றுத்திறனாளிகள் உள்ள குடும்பங்கள், ஆதிதிராவிடர் மற்றும் பழங்குடியினர் குடும்பங்கள் ஆகியோருக்கு முன்னுரிமை அளிக்கப்படும். இவர்கள் தவிர பிற பாரம்பரிய வனவாசிகள் உள்ளிட்ட சில பிரிவினரும் இந்த பயனில் இடம்பெறுவார்கள்.

இதையும் படிங்க: SPAM அழைப்புகளுக்கு செக்..! டிராய் முக்கிய முடிவு... மக்களுக்கு நிம்மதி..!!

நலிவுற்ற மற்றும் தேவையுள்ள குடும்பங்களின் வாழ்வாதாரத் தேவைகளைக் கருத்தில் கொண்டே இந்த முன்னுரிமை அமைப்பு உருவாக்கப்பட்டுள்ளது.கிராமப்புறங்களில் பருவகால வேலைவாய்ப்பு இல்லாத காலங்களில் இந்தத் திட்டம் பெரும் ஆதரவாக விளங்குகிறது. கூடுதல் 25 நாட்கள் வேலை மூலம் குடும்பங்களின் வருமானம் அதிகரிப்பதோடு, அவர்களின் அன்றாட தேவைகளைப் பூர்த்தி செய்யவும், கல்வி மற்றும் சுகாதார செலவுகளைச் சமாளிக்கவும் உதவியாக இருக்கும். பெண்கள் தலைமையிலான குடும்பங்கள் மற்றும் தனித்து வாழும் பெண்களுக்கு முன்னுரிமை அளிப்பதன் மூலம் பெண்களின் பொருளாதார சுதந்திரமும் வலுப்படுத்தப்படும். மாற்றுத்திறனாளிகள் உள்ள குடும்பங்களுக்கு இது சிறப்பு ஆதரவாக அமையும்.

இதையும் படிங்க: "பிரம்மாண்ட நாட்டியாஞ்சலி"..! தனுஷ்கோடிக்கு செல்ல சுற்றுலா பயணிகளுக்கு தடை..! முக்கிய அறிவிப்பு.!!