தமிழக அரசு அலுவலகங்களில் பணியாற்றும் அதிகாரிகள், தங்களது உயர் அதிகாரிகள் அல்லது சக பணியாளர்கள் மீது கடந்த ஐந்து ஆண்டுகளில் சாதிய வன்கொடுமைத் தடுப்புச் சட்டத்தின் (SC/ST Act) கீழ் எத்தனை புகார்களைப் பதிவு செய்துள்ளனர் என்பது குறித்து விரிவான அறிக்கை தாக்கல் செய்யுமாறு மனிதவள மேம்பாட்டுத் துறை செயலருக்கு உயர்நீதிமன்ற மதுரை கிளை உத்தரவிட்டுள்ளது.

நெல்லை அண்ணா நகரைச் சேர்ந்த ஜோதிவேல் என்பவர் தாக்கல் செய்த மனுவில், நான் திருநெல்வேலி மாவட்ட முதன்மைக் கல்வி அலுவலரின் நேர்முக உதவியாளராகப் பணிபுரிந்து வந்தேன். இந்நிலையில், என்னை குவாச்சிப்பட்டி அரசுப் பள்ளி தலைமை ஆசிரியராக இடமாற்றம் செய்து மாவட்ட முதன்மைக் கல்வி அலுவலர் உத்தரவிட்டுள்ளார். அதிகார வரம்பற்ற முறையில் பிறப்பிக்கப்பட்ட இந்த இடமாறுதல் உத்தரவை ரத்து செய்ய வேண்டும் என்று கோரியிருந்தார்.

இந்த மனு நீதிபதி புகழேந்தி முன்பு விசாரணைக்கு வந்தது. அப்போது மனுதாரர் தரப்பில், இந்த இடமாறுதல் உத்தரவு பழிவாங்கும் நோக்கத்தோடு பிறப்பிக்கப்பட்டுள்ளது. பள்ளி கல்வித்துறை இணை இயக்குநருக்கு மட்டுமே இடமாறுதல் ஆணை பிறப்பிக்க அதிகார வரம்பு உள்ள நிலையில், முதன்மைக் கல்வி அலுவலர் இந்த உத்தரவை பிறப்பித்துள்ளார் என வாதிடப்பட்டது.

இதையும் படிங்க: e-KYC செய்யாவிட்டாலும் பொருட்கள் வழங்குவது நிறுத்தப்படாது! தமிழ்நாடு அரசு அறிவிப்பு!

அரசுத் தரப்பில் ஆஜரான வழக்கறிஞர், மனுதாரருக்கும், முதன்மைக் கல்வி அலுவலருக்கும் இடையே சுமூகமான பணி உறவு நீடிக்கவில்லை. மனுதாரர் தொடர்ந்து அதே பணியிடத்தில் நீடித்தால் முதன்மைக் கல்வி அலுவலரின் தினசரி நிர்வாகப் பணிகளுக்குக் கடுமையான இடையூறு ஏற்படும் சூழல் உள்ளது எனத் தெரிவித்தார்.

இருதரப்பு வாதங்களையும் பதிவு செய்த நீதிபதி புகழேந்தி, அதிகார வரம்பு மீறிப் பிறப்பிக்கப்பட்டதாகக் கூறப்படும் மனுதாரரின் இடமாறுதல் உத்தரவிற்கு இடைக்காலத் தடை விதித்து உத்தரவிட்டார். மேலும், மனுதாரர் மீண்டும் பணியில் சேரலாம் என்றும், எனினும் வரும் அக்டோபர் 26 வரை அவர் முதன்மைக் கல்வி அலுவலரின் நேர்முக உதவியாளராக எந்தவொரு பணியையும் மேற்கொள்ளக் கூடாது என்றும் நிபந்தனை விதித்தார்.

தொடர்ந்து உத்தரவிட்ட நீதிபதி, மனுதாரர் தன் மீது எஸ்சி/எஸ்டி வன்கொடுமைத் தடுப்புச் சட்டத்தின் கீழ் பொய்ப் புகார் அளித்து வழக்குப் பதிவு செய்ய வாய்ப்புள்ளதாக முதன்மைக் கல்வி அலுவலர் தரப்பில் அச்சம் தெரிவிக்கப்பட்டுள்ளது. இதனை நீதிமன்றம் மிகக் கூர்ந்து கவனிக்க வேண்டியுள்ளது. எனவே, இந்த வழக்கில் நீதிமன்றம் தாமாக முன்வந்து மனிதவள மேம்பாட்டுத் துறை செயலரை எதிர்மனுதாரராகச் சேர்க்கிறது. 

தமிழக அரசு அலுவலகங்களில் பணியாற்றும் அதிகாரிகள், தங்களது உயர் அலுவலர்கள் அல்லது பிற ஊழியர்கள் மீது கடந்த 5 ஆண்டுகளில் எஸ்சி/எஸ்டி வன்கொடுமைத் தடுப்புச் சட்டம் 1989-ன் கீழ் எத்தனை புகார்களைப் பதிவு செய்துள்ளனர் என்பது குறித்த முழுமையான அறிக்கையை மனிதவள மேம்பாட்டுத்துறை செயலர் நீதிமன்றத்தில் தாக்கல் செய்ய வேண்டும் என உத்தரவிட்டு வழக்கின் விசாரணையை ஒத்திவைத்தார்.

இதையும் படிங்க: வழக்கு தள்ளுபடி செய்யப்படவில்லை.. சுப்ரீம் கோர்ட்டுக்கு போவோம்! அதிமுக வழக்கறிஞர் இன்பதுரை ஆவேசம்!