பொதுமக்களுக்கு தரமான மருத்துவ சேவையை உறுதி செய்யும் நோக்கில் அரசு மருத்துவமனைகளில் பணியாற்றும் மருத்துவர்கள் தனியார் மருத்துவத் தொழிலில் ஈடுபடக் கூடாது என்ற கருத்தை உச்சநீதிமன்றம் வலியுறுத்தியுள்ளது. உத்தரபிரதேச மாநிலத்தில் உள்ள ஒரு அரசு மருத்துவக் கல்லூரி மற்றும் மருத்துவமனையின் செயல்பாடுகள் தொடர்பான வழக்கின் விசாரணையின்போது இந்தக் கருத்து தெரிவிக்கப்பட்டது.
பிரயாக்ராஜில் செயல்பட்டு வரும் மோதிலால் நேரு மருத்துவக் கல்லூரி மற்றும் ஸ்வரூப் ராணி நேரு மருத்துவமனையின் நிர்வாக மற்றும் சேவை குறைபாடுகள் குறித்து அலகாபாத் உயர் நீதிமன்றத்தில் பொதுநல வழக்கு நிலுவையில் உள்ளது. ஆரம்பத்தில், அரசு மருத்துவமனையில் பணிபுரியும் ஒரு மருத்துவர் விதிமுறைகளை மீறி தனியார் மருத்துவமனைகளில் சிகிச்சை அளிப்பதாக எழுந்த புகாரை அடிப்படையாகக் கொண்டு இந்த வழக்கு தொடங்கப்பட்டது.
வழக்கின் விசாரணையின்போது, மருத்துவக் கல்லூரியின் பேராசிரியர்கள், இணைப் பேராசிரியர்கள் மற்றும் விரிவுரையாளர்கள் உள்ளிட்ட பலர் தனியார் நர்சிங் ஹோம்கள் மற்றும் மருத்துவமனைகளில் பணியாற்றுவதாகவும், அரசு மருத்துவமனையில் சிகிச்சை பெற வந்த நோயாளிகள் சிலர் தனியார் மருத்துவமனைகளுக்கு அனுப்பப்படுவதாகவும் தகவல்கள் வெளிச்சத்துக்கு வந்தன. இதையடுத்து, கடந்த மே மாதம் உயர் நீதிமன்றம் கடும் அதிருப்தி தெரிவித்தது.
இதையும் படிங்க: உச்ச நீதிமன்றத்தில் அவசர வழக்கு: மீனாட்சி நடராஜன் மனு நிராகரிப்புக்கு எதிராகக் காங்கிரஸ் அதிரடி சட்டப் போராட்டம்!
அரசு போதுமான நிதி, மருத்துவ உபகரணங்கள் மற்றும் அடிப்படை வசதிகளை வழங்கியிருந்தாலும், சில மருத்துவர்களின் தனியார் தொழில் நடவடிக்கைகளே அரசு மருத்துவமனையின் தரம் மற்றும் செயல்திறன் பாதிக்கப்படுவதற்குக் காரணமாக இருப்பதாக நீதிமன்றம் சுட்டிக்காட்டியது. மேலும், விதிமுறைகளை மீறி தனியார் மருத்துவப் பணியில் ஈடுபடும் அரசு மருத்துவர்கள் மீது உரிய நடவடிக்கை எடுக்கவும், இந்த விவகாரம் குறித்து உயர்மட்ட விசாரணை நடத்தவும் மாநில அரசுக்கு உத்தரவிட்டது.
இந்த விசாரணைக்கு தடை விதிக்கக் கோரி மருத்துவக் கல்லூரியின் அறுவை சிகிச்சைத் துறை இணைப் பேராசிரியர் டாக்டர் சந்தோஷ்குமார் சிங் சுப்ரீம் கோர்ட்டை அணுகினார். இந்த மனு நீதிபதிகள் பி.வி. நாகரத்னா மற்றும் ஜாய்மால்யா பாக்சி ஆகியோர் அடங்கிய அமர்வு முன்பு விசாரணைக்கு வந்தது.
அப்போது நீதிபதி நாகரத்னா, “உயர் நீதிமன்றம் மிக முக்கியமான பொதுநலப் பிரச்சினையை ஆராய்கிறது. அரசு மருத்துவர்கள் தனியார் தொழிலில் ஈடுபடக் கூடாது என்ற நோக்கம் பாராட்டத்தக்கது. இந்த நடவடிக்கை ஒரே ஒருவரை குறிவைத்து எடுக்கப்படவில்லை; விதிமுறைகளை மீறும் அனைத்து அரசு மருத்துவர்களுக்கும் பொருந்தக்கூடியது” என்று கருத்து தெரிவித்தார்.
சுப்ரீம் கோர்ட்டு தலையிடத் தயாராக இல்லை என்பதை உணர்ந்த மனுதாரர் தரப்பு, மனுவைத் திரும்பப் பெற அனுமதி கோரியது. அதனை ஏற்றுக்கொண்ட நீதிபதிகள், மனுவைத் திரும்பப் பெற அனுமதி வழங்கி வழக்கை முடித்தனர்.
இந்த வழக்கு, அரசு மருத்துவ சேவைகளின் தரத்தை மேம்படுத்துவதிலும், மருத்துவர்களின் பொறுப்புணர்வை உறுதி செய்வதிலும் முக்கியமான முன்னுதாரணமாகக் கருதப்படுகிறது.
இதையும் படிங்க: ஆன்லைன் ரம்மி: தமிழகம் விதித்த தடை செல்லும்..!! சுப்ரீம் கோர்ட்டு அதிரடி உத்தரவு..!!