வடகிழக்குப் பருவமழை தொடங்கி ஒரு வாரம் ஆன நிலையில், தமிழகத்தின் பல பகுதிகளிலும் குறிப்பாக கடலோர மற்றும் டெல்டா மாவட்டங்களிலும் மிதமானது முதல் கனமழை வரை பெய்து வருகிறது. சென்னை மற்றும் புறநகர் பகுதிகளில் நேற்று மாலை 7 மணி முதல் இரவு முழுவதும் விட்டுவிட்டு கனமழை கொட்டித் தீர்த்தது. இடி மின்னலுடன் காதை பிளக்கும் சத்தத்துடன் பெய்த மழையால் சாலைகளில் மழைநீர் பெருக்கெடுத்து ஓடியது. 

வடபழனி, ஆலந்தூர், சைதாப்பேட்டை, வளசரவாக்கம், மதுரவாயல், நுங்கம்பாக்கம், தி.நகர் உள்ளிட்ட பகுதிகளில் தண்ணீர் தேங்கி நின்றது. தாழ்வான இடங்களில் சில வீடுகளை மழைநீர் சூழ்ந்தது. 11 மரங்கள் சாய்ந்து விழுந்தன; மாநகராட்சி ஊழியர்கள் உடனடியாக அவற்றை அகற்றினர். மோட்டார் பம்புகள் மூலம் தேங்கிய நீரை வெளியேற்றும் பணிகள் விரைவாக நடைபெற்றன. விடுமுறை நாளாக இருந்தபோதிலும் வாகன ஓட்டிகள் பெரும் சிரமத்திற்கு ஆளாயினர். மழை காரணமாக வெப்பம் குறைந்து குளிர்ச்சி நிலவுகிறது.

வெள்ள அபாயத்தை எதிர்கொள்ள சென்னை மற்றும் புறநகர்ப் பகுதிகளில் 980 தீயணைப்பு வீரர்கள் தயார் நிலையில் நிறுத்தப்பட்டுள்ளனர். இதில் உள்ளூர் 845 பேரும் வெளி மாவட்டங்களில் இருந்து வரவழைக்கப்பட்ட 135 பேரும் அடங்குவர். அவர்கள் 15 தாழ்வான பகுதிகளில் நிலைகொண்டுள்ளனர். 

இதையும் படிங்க: சொந்த ஊர் செல்ல முயன்ற சிறுமி: சென்னை ரயில் நிலையத்தில் மீட்ட தனிப்படை போலீஸ்!

வேளச்சேரி ஏ.ஜி.எஸ். காலனி, ராம் நகர் உள்ளிட்ட இடங்களில் முழங்கால் அளவுக்கு மேல் நீர் தேங்கியுள்ளதால் ரப்பர் மற்றும் ஃபைபர் படகுகள், மிதவைகள், உயிர் காக்கும் கவசங்கள், மரம் அறுக்கும் எந்திரங்களுடன் மீட்புக் குழுவினர் செயல்படுகின்றனர். பள்ளிக்கரணை, மடிப்பாக்கம் பகுதிகளிலும் இதேபோல் ஏற்பாடு செய்யப்பட்டுள்ளது. 150-க்கும் மேற்பட்ட மீனவர்களும் மீட்புப் பணியில் ஈடுபட்டுள்ளனர்.

சென்னை வானிலை ஆய்வு மையம் இன்று முதல் 27-ஆம் தேதி வரை தமிழகம், புதுச்சேரி, காரைக்கால் பகுதிகளில் மிதமானது முதல் கனமழை வரை பெய்யக்கூடும் என எச்சரித்துள்ளது. தென்மேற்கு வங்கக் கடலில் இன்று குறைந்த காற்றழுத்த தாழ்வுப் பகுதி உருவாக வாய்ப்புள்ளது. 23-ஆம் தேதி வாக்கில் தென்கிழக்கு மற்றும் கிழக்கு மத்திய வங்கக் கடலில் மற்றொரு தாழ்வுப் பகுதி உருவாகி வலுவடையக்கூடும். தாய்லாந்து வளைகுடா பகுதியிலிருந்து நகரும் வளிமண்டல சுழற்சி இதற்கு காரணமாக இருக்கலாம்.

வானிலை மைய இயக்குநர் வி.ஆர். துரை தெரிவித்தபடி, இன்று தூத்துக்குடி, திருநெல்வேலி, கன்னியாகுமரி மாவட்டங்களில் சில இடங்களில் கன முதல் மிகக் கனமழை பெய்யலாம். நாளை அதே பகுதிகளுடன் ராமநாதபுரம், விருதுநகர், தென்காசி ஆகியவற்றிலும் கனமழைக்கு வாய்ப்பு. நீலகிரி, கோவை உள்ளிட்ட பல மாவட்டங்களில் கனமழை எதிர்பார்க்கப்படுகிறது.

சென்னை, திருவள்ளூர், காஞ்சிபுரம், செங்கல்பட்டு பகுதிகளில் மேகமூட்டத்துடன் மிதமான மழை பெய்யலாம். பொதுமக்கள் தேவையில்லாமல் வெளியே செல்ல வேண்டாம் எனவும், தாழ்வான பகுதிகளில் வசிப்போர் எச்சரிக்கையாக இருக்க வேண்டும் எனவும் அதிகாரிகள் அறிவுறுத்தியுள்ளனர்.
 
 

இதையும் படிங்க: சென்னைக்கு ரெட் அலர்ட் வாபஸ்: வானிலை ஆய்வு மையம் அதிகாரப்பூர்வ அறிவிப்பு!