2026-27ஆம் மதிப்பீட்டு ஆண்டுக்கான வருமான வரி கணக்கு தாக்கல் செய்வதற்கான இறுதிக் காலக்கெடுவை, வரும் அக்டோபர் 31-ஆம் தேதியிலிருந்து நவம்பர் 21-ஆம் தேதி வரை நீட்டித்து மத்திய நேரடி வரிகள் வாரியம் அதிகாரப்பூர்வமாக உத்தரவிட்டுள்ளது. நாடு முழுவதும் நிறுவனங்கள், தொழில்முனைவோர் மற்றும் தணிக்கைக்கு உட்பட்ட வர்த்தக நிறுவனங்கள் தங்களது வருமான வரிக் கணக்குகளை ஆண்டுதோறும் குறிப்பிட்ட காலக்கெடுவுக்குள் தாக்கல் செய்து வருகின்றன.

நடப்பு 2026-27ஆம் மதிப்பீட்டு ஆண்டுக்குரிய வருமான வரிக் கணக்கு மற்றும் வருமான வரிச் சட்டத்தின் கீழ் தேவைப்படும் பல்வேறு தணிக்கை அறிக்கைகளைத் தாக்கல் செய்வதற்கான கடைசி நாளாக 2026 அக்டோபர் 31-ஆம் தேதி முன்னர் நிர்ணயிக்கப்பட்டிருந்தது.

இதையும் படிங்க: தேர்தல் ஆணையர் படம் எரிப்பு... சாலை மறியல்! உளுந்தூர்பேட்டையில் காங்கிரஸ் கட்சியினர் கைது!

இந்நிலையில், நாடு முழுவதும் உள்ள பல்வேறு பட்டயக் கணக்காளர்கள் சங்கங்கள், வர்த்தக அமைப்புகள் மற்றும் வரி செலுத்துவோர் தரப்பில், வருமான வரி இணையதளத்தில் நிலவும் தொழில்நுட்பக் கோளாறுகள் மற்றும் பண்டிகைக் காலப் பணிச்சுமையைச் சுட்டிக்காட்டி காலக்கெடுவை நீட்டிக்க வேண்டும் எனத் தொடர் கோரிக்கைகள் விடுக்கப்பட்டு வந்தன.

இக்கோரிக்கைகளைத் தீவிரமாகப் பரிசீலித்த மத்திய நிதி அமைச்சகத்தின் கீழ் இயங்கும் மத்திய நேரடி வரிகள் வாரியம், வரி செலுத்துவோர் எவ்வித சிரமமும் இன்றித் தங்களது கணக்குகளைத் தாக்கல் செய்வதற்கு ஏதுவாகக் கால அவகாசத்தை நீட்டிக்க முடிவு செய்தது. அதன்படி, வருமான வரிச் சட்டம் 1961-இன் பிரிவு 119 வழங்கியுள்ள அதிகாரத்தைப் பயன்படுத்தி, அக்டோபர் 31 வரை இருந்த காலக்கெடுவை வரும் நவம்பர் 21-ஆம் தேதி வரை நீட்டித்து சுற்றறிக்கை வெளியிட்டுள்ளது.

மத்திய அரசின் இந்த அதிரடி அறிவிப்பால், கடைசி நேரப் பதற்றமின்றி துல்லியமாக வரி விவரங்களைச் சமர்ப்பிக்க வாய்ப்பு ஏற்பட்டுள்ளதால், தொழில் நிறுவனங்கள், பட்டயக் கணக்காளர்கள் மற்றும் வரி செலுத்துவோர் பெரும் நிம்மதி அடைந்துள்ளனர்.

இதையும் படிங்க: முதியோர் ஓய்வூதியத்திற்கு ஆதார் கட்டாயமா? மூத்த குடிமக்கள் அவதி... சிபிஎம் கண்டனம்!