புதிய வருமான வரி சட்டம் ஏப்ரல் 1, 2026 முதல் அமலுக்கு வருகிறது. மத்திய நேரடி வரிகள் வாரியம் (CBDT) இதற்கான புதிய விதிகளை அறிவித்துள்ளது. இது வரி செலுத்துபவர்களுக்கு எளிமையான மற்றும் வெளிப்படையான அமைப்பை உருவாக்கும் நோக்கில் கொண்டு வரப்பட்டுள்ளது.
முக்கிய அம்சமாக, பழைய வருமான வரி சட்டத்தில் இருந்த 819 பிரிவுகள் 536 ஆக குறைக்கப்பட்டுள்ளன. அதேபோல், அதிகாரப்பூர்வ அத்தியாயங்கள் 47-லிருந்து 23 ஆக குறைக்கப்பட்டுள்ளன. இதனால் சட்டத்தின் மொத்த வார்த்தைகள் எண்ணிக்கை சுமார் 5.12 லட்சத்திலிருந்து 2.6 லட்சமாக குறைக்கப்பட்டுள்ளது. சிக்கலான சட்ட வார்த்தைகளுக்கு பதிலாக 39 புதிய அட்டவணைகள் மற்றும் 40 எளிய சூத்திரங்கள் அறிமுகப்படுத்தப்பட்டுள்ளன.
இவை வரி கணக்கீடு, விலக்குகள் போன்றவற்றை தெளிவாக புரிந்துகொள்ள உதவும். சம்பளம் பெறுபவர்களுக்கு முக்கிய நிவாரணமாக, வீட்டு வாடகை கொடுப்பனவு (HRA) விலக்கு விரிவாக்கப்பட்டுள்ளது. முன்பு மும்பை, டெல்லி, கொல்கத்தா, சென்னை ஆகிய 4 நகரங்களுக்கு மட்டுமே சம்பளத்தில் 50 சதவீதம் வரை HRA விலக்கு இருந்தது. இப்போது இந்த பட்டியலில் ஹைதராபாத், பெங்களூரு, புனே, அகமதாபாத் ஆகிய 4 நகரங்கள் சேர்க்கப்பட்டு மொத்தம் 8 நகரங்களாக உயர்த்தப்பட்டுள்ளது.
இதையும் படிங்க: பறவைக் காய்ச்சல் எதிரொலி.. செத்து மடியும் பறவைகள்..!! கிண்டி சிறுவர் பூங்கா தற்காலிக மூடல்..!!
மற்ற நகரங்களுக்கு 40 சதவீத விலக்கு தொடரும். HRA சலுகை பெற, வீட்டு உரிமையாளர் மற்றும் வாடகைதாரர் விவரங்கள் இனி கட்டாயமாக அளிக்கப்பட வேண்டும். பான் கார்டு கட்டாயமாக்கல் விரிவாக்கப்பட்டுள்ளது. வங்கியில் ஒரு நிதியாண்டில் ரூ.10 லட்சத்துக்கு மேல் பணம் டெபாசிட் செய்வது அல்லது எடுப்பது, ரூ.5 லட்சத்துக்கு மேல் விலை கொண்ட வாகனம் வாங்குதல், ரூ.1 லட்சத்துக்கு மேல் ஹோட்டல்களில் பணம் செலுத்துதல் அல்லது நிகழ்ச்சிகளுக்கு செலவிடுதல், ரூ.20 லட்சத்துக்கு மேல் சொத்து பரிவர்த்தனை ஆகியவற்றுக்கு பான் கார்டு கட்டாயமாகிறது. இது வரி ஏய்ப்பை தடுக்கும் நோக்கில் அறிமுகப்படுத்தப்பட்டுள்ளது.
டிஜிட்டல் சொத்துகளுக்கு தொடர்பான விதிகளும் கடுமையாக்கப்பட்டுள்ளன. கிரிப்டோகரன்சி போன்ற டிஜிட்டல் கரன்சி பரிவர்த்தனை விவரங்களை வரி துறைக்கு கட்டாயமாக வழங்க வேண்டும். மேலும், ரிசர்வ் வங்கியின் மத்திய வங்கி டிஜிட்டல் கரன்சி (CBDC) அங்கீகரிக்கப்பட்ட மின்னணு பண பரிமாற்ற முறையாக சேர்க்கப்பட்டுள்ளது.வரி விகிதங்களில் எந்த மாற்றமும் இல்லை. இந்த மாற்றங்கள் வரி செலுத்துபவர்களுக்கு எளிமை, வெளிப்படைத்தன்மை மற்றும் சிறந்த இணக்கத்தை உறுதி செய்யும் என்று எதிர்பார்க்கப்படுகிறது.
இதையும் படிங்க: திமுக ஒரு தீயசக்தி..!! கோஷமிட்டு வாக்கு சேகரித்த சிறுவர்கள்..! TVK மா.செ பாய்ந்த வழக்கு..!!