மத்திய அரசு கொண்டு வரத் திட்டமிட்டுள்ள தொகுதி மறுவரையறை (Delimitation) உள்ளிட்ட மூன்று முக்கிய மசோதாக்கள் குறித்து விவாதிக்க, 'இந்தியா' (I.N.D.I.A.) கூட்டணி கட்சித் தலைவர்களின் அவசர ஆலோசனைக் கூட்டம் இன்று டெல்லியில் நடைபெற்றது. காங்கிரஸ் தலைவர் மல்லிகார்ஜுன கார்கே தலைமையில் நடைபெற்ற இந்தக் கூட்டத்தில், பாஜக அரசின் நகர்வுகளைத் தடுப்பதற்கான அடுத்தகட்ட வியூகங்கள் குறித்து ஆலோசிக்கப்பட்டது.

காங்கிரஸ் தலைவர் மல்லிகார்ஜுன கார்கே தலைமையில் நடைபெற்ற இந்த கூட்டத்தில், மக்களவை எதிர்க்கட்சித் தலைவர் ராகுல் காந்தி, திமுக சார்பில் அதன் நாடாளுமன்றக் குழுத் தலைவர் டி.ஆர். பாலு, ஆம் ஆத்மி எம்பி சஞ்சய் சிங், கபில் சிபல் மற்றும் ஜம்மு-காஷ்மீர் முதல்வர் ஓமர் அப்துல்லா உள்ளிட்ட கூட்டணி கட்சிகளின் முக்கியப் பிரதிநிதிகள் கலந்து கொண்டனர்.

அரசியலமைப்பு (131-வது திருத்தம்) மசோதா, 2026 இது தொகுதி மறுவரையறைக்கான தடையை நீக்கி, புதிய மக்களவை இடங்களை உருவாக்க வழிவகை செய்கிறது. தொகுதி மறுவரையறை மசோதா, 2026 தொகுதி எல்லைகளைத் திருத்தி அமைப்பதற்கான ஆணையத்தை உருவாக்குவது குறித்துப் பேசுகிறது. மகளிர் இடஒதுக்கீடு தொடர்பான மசோதா இதனுடன் தொகுதி மறுவரையறையை இணைப்பதன் மூலம் தென்மாநிலங்களின் பிரதிநிதித்துவத்தைக் குறைக்க அரசு முயல்வதாக எதிர்க்கட்சிகள் குற்றம் சாட்டுகின்றன.

இதையும் படிங்க: தென்னிந்தியாவின் குரலை ஒடுக்க சூழ்ச்சி! முதலமைச்சர் ஸ்டாலினுக்கு ரேவந்த் ரெட்டி எழுதிய பரபரப்பு கடிதம்!

ஏற்கனவே மூத்த தலைவர்கள் சுட்டிக்காட்டியது போல, மக்கள் தொகையை அடிப்படையாகக் கொண்ட தொகுதி மறுவரையறை இந்தியாவின் கூட்டாட்சி தத்துவத்திற்கு எதிரானது என இக்கூட்டத்தில் ஒருமனதாகக் கருத்து தெரிவிக்கப்பட்டது. மாநிலங்களுக்கு இடையே நிலவும் அரசியல் அதிகார இடைவெளியை இது மேலும் அதிகரிக்கும் எனத் தலைவர்கள் கவலை தெரிவித்தனர்.

இந்த மசோதாக்களை நாடாளுமன்றத்திலும், மக்கள் மன்றத்திலும் ஒருங்கிணைந்து எதிர்க்க 'இந்தியா' கூட்டணி முடிவு செய்துள்ளது. தேர்தல் நெருங்கும் வேளையில், பாஜகவின் இந்தத் திட்டங்கள் குறித்த விழிப்புணர்வைத் தேசிய அளவில் ஏற்படுத்தவும், குறிப்பாகத் தென்னிந்திய மாநிலங்களில் இதற்குக் கடும் எதிர்ப்பு தெரிவிக்கவும் திட்டமிடப்பட்டுள்ளது.

டெல்லியில் இன்று நடைபெற்ற இந்த ஆலோசனை, வரும் 2026 மற்றும் 2029 தேர்தல்களில் எதிர்க்கட்சிகளின் நிலைப்பாட்டைத் தீர்மானிப்பதில் மிக முக்கியமானதாகப் பார்க்கப்படுகிறது.

இதையும் படிங்க: நீங்கள் அம்பலப்பட்டுத்தான் போவீர்கள்! நிர்மலா சீதாராமனுக்கு மார்க்சிஸ்ட் கம்யூனிஸ்ட் சண்முகம் ஆவேசம்!