கிழக்கில் நீடித்து வரும் அமெரிக்கா–ஈரான் மோதல் புதிய கட்டத்தை எட்டியுள்ளதாக தகவல்கள் வெளியாகியுள்ளன. போர் தொடங்கியதிலிருந்து ஈரான் மேற்கொண்ட தாக்குதல்களின் விளைவாக, மத்திய கிழக்கு நாடுகளில் அமைந்துள்ள அமெரிக்காவின் பல முக்கிய ராணுவ தளங்கள் சேதமடைந்துள்ளதாக செயற்கைக்கோள் புகைப்படங்கள் மூலம் தெரியவந்துள்ளதாக சர்வதேச ஊடகங்கள் செய்தி வெளியிட்டுள்ளன.
கடந்த சில மாதங்களாக அமெரிக்கா மற்றும் இஸ்ரேல் இணைந்து ஈரான் மீது பல்வேறு ராணுவ நடவடிக்கைகளை மேற்கொண்டதாக தகவல்கள் வெளியாகின. அதற்கு பதிலடியாக, மத்திய கிழக்கில் உள்ள அமெரிக்க ராணுவ தளங்களை குறிவைத்து ஈரான் தாக்குதல்களை தீவிரப்படுத்தி வருவதாக கூறப்படுகிறது. இந்தப் பகுதியில் உள்ள அமெரிக்க தளங்கள் இனி பாதுகாப்பானவை அல்ல என்று ஈரான் தரப்பில் எச்சரிக்கை விடுக்கப்பட்டுள்ளதாகவும் தகவல்கள் தெரிவிக்கின்றன.
இந்நிலையில் வெளியான செயற்கைக்கோள் படங்கள், அமெரிக்காவுக்கு சொந்தமான 20-க்கும் மேற்பட்ட ராணுவ தளங்களில் சேதங்கள் ஏற்பட்டிருக்கலாம் என்பதைக் காட்டுவதாக கூறப்படுகிறது. குறிப்பாக ஐக்கிய அரபு எமிரேட்சில் உள்ள அல் ரூவாயிஸ் மற்றும் அல் சதார் விமான தளங்களில் ஏவுகணை பாதுகாப்பு அமைப்புகள் பாதிக்கப்பட்டிருக்கலாம் என ஆய்வாளர்கள் மதிப்பிடுகின்றனர்.
இதையும் படிங்க: அமெரிக்கா - ஈரான் அமைதி பேச்சுவார்த்தை நிறுத்தம்! இஸ்ரேல் தாக்குதலால் வந்தது வினை!
அதேபோல், சவுதி அரேபியாவில் அமைந்துள்ள பிரின்ஸ் சுல்தான் விமான தளத்தில் அமெரிக்காவின் எரிபொருள் நிரப்பும் மற்றும் கண்காணிப்பு விமானங்களுக்கு சேதம் ஏற்பட்டதாக தகவல்கள் வெளியாகியுள்ளன. குவைத்தில் உள்ள அலி அல் சலாம் விமான தளம் மற்றும் அங்குள்ள அமெரிக்க ராணுவ முகாம்களும் தாக்குதலுக்கு உள்ளானதாக கூறப்படுகிறது.
மேலும், இந்த மோதலில் அமெரிக்கா பல ராணுவ உபகரணங்கள் மற்றும் போர் விமானங்களை இழந்துள்ளதாக சில தகவல்கள் வெளியாகியுள்ளன. எனினும், இத்தகவல்கள் தொடர்பாக அமெரிக்க அரசு முழுமையான அதிகாரப்பூர்வ விளக்கத்தை இதுவரை வெளியிடவில்லை.
மத்திய கிழக்கில் பதற்றம் தொடர்ந்து அதிகரித்து வரும் நிலையில், இந்த தாக்குதல்கள் பிராந்திய பாதுகாப்பு சூழலை மேலும் சிக்கலாக்கியுள்ளன. அமெரிக்கா மற்றும் ஈரான் இடையிலான மோதல் அடுத்த கட்டத்தில் எவ்வாறு நகரும் என்பது உலக நாடுகளின் கவனத்தை ஈர்த்துள்ளது
இதையும் படிங்க: ஈரான் மீது அமெரிக்கா அட்டாக்..!! பதிலடியாக குவைத் மீது பாய்ந்த ஈரான் ஏவுகணைகள்..!!