டெல்லி ஜந்தர் மந்தர் போராட்ட விவகாரத்தில் கரப்பான்பூச்சி ஜனதா கட்சி (CJP) நிர்வாகிகளைக் கையாண்ட டெல்லி காவல்துறையின் எதேச்சதிகார நடவடிக்கையைக் கேள்வி எழுப்பியதற்காகத் தன் மீது மீண்டும் தாக்குதல்கள் தொடுக்கப்படுவதாகக் குறிப்பிட்டுள்ள ‘வீ த லீடர்ஸ்’ (We The Leaders) அமைப்பின் நிறுவனரும் முன்னாள் ஐபிஎஸ் அதிகாரியுமான அண்ணாமலை, "சிஜேபி-க்கு பாஜக இலவச விளம்பரம் தேடித்தருகிறதா?" என்ற அரசியல் சந்தேகத்தையும் வெளிப்படையாகத் தனது எக்ஸ் (X) தளப் பதிவில் முன்வைத்துள்ளார்.

தேர்தல் ஆணைய விவகாரம் தொடர்பாக டெல்லி ஜந்தர் மந்தரில் தடையை மீறிப் போராட முயன்ற வழக்கில் கரப்பான்பூச்சி ஜனதா கட்சியின் தலைவர்கள் சௌரவ் தாஸ், அசுதோஷ் ரங்கா ஆகியோர் டெல்லி போலீசாரால் கைது செய்யப்பட்டு, பின்னர் இன்று சிறப்பு நிர்வாக நடுவர் (SEM) நீதிமன்றத்தால் விடுவிக்கப்பட்டனர். முன்னதாக இக்கைது நடவடிக்கையைக் கண்டித்து அரசியல் தலைவர்கள் பலரும் கண்டனக் குரல் எழுப்பியிருந்தனர்.

இந்நிலையில், ஒன்றிய உள்துறை அமைச்சகத்தின் கட்டுப்பாட்டில் இயங்கும் டெல்லி காவல்துறையின் இத்தகைய அணுகுமுறையைக் கண்டித்து 'வீ த லீடர்ஸ்' அமைப்பின் தலைவர் அண்ணாமலை தனது அதிகாரப்பூர்வ எக்ஸ் சமூக வலைதளப் பக்கத்தில் காரசாரமான கருத்துகளைப் பதிவு செய்துள்ளார்.

இதையும் படிங்க: டெல்லியில் எகிறிய காற்று மாசுபாடு: GRAP-1 முதல்நிலை நடவடிக்கைகள் அதிரடி அமல்!

"பாஜக உண்மையில் சிஜேபி (CJP) அமைப்பை எதிர்க்கிறதா? அல்லது தேவையின்றி கைது நடவடிக்கைகளை மேற்கொண்டு அதற்கு நாடு தழுவிய அளவில் இலவச விளம்பரத்தைத் தேடித்தருகிறதா? சிஜேபி அமைப்பை ஊதிப் பெரிதாக்கி ஒரு பெரிய சக்தியாக மாற்றி, அதன் வாயிலாக வரவிருக்கும் தேர்தல்களில் பிரதான எதிர்க்கட்சிகளின் வாக்குகளைப் பிரித்து அறுவடை செய்ய பாஜக விரும்புகிறதா?" என்று அரசியல் வட்டாரத்தில் எழும் சந்தேகங்களை அண்ணாமலை நேருக்கு நேராக எழுப்பியுள்ளார்.

"சிஜேபி அமைப்பின் செயல்பாட்டு முறைகளுடனும் அரசியல் நிலைப்பாடுகளுடனும் எனக்கு உடன்பாடு இல்லாமல் இருக்கலாம்; ஆனால் ஜனநாயக நாட்டில் தங்களது கருத்துகளை வெளிப்படுத்தவும் போராடுவதற்கும் அவர்களுக்கு முழுமையான உரிமை உண்டு" என்று அவர் சுட்டிக்காட்டியுள்ளார்.

"ஜந்தர் மந்தரில் சிஜேபி போராட்டக்காரர்களை டெல்லி காவல்துறை கையாண்ட விதம் குறித்து ஜனநாயக ரீதியாக நான் கேள்வி எழுப்பியதால், என் மீதான திட்டமிட்ட அரசியல் தாக்குதல்கள் மீண்டும் தொடங்கிவிட்டன" என்று அண்ணாமலை ஆதங்கத்துடன் வெளிப்படுத்தியுள்ளார்.

காவல்துறையின் அணுகுமுறையைக் கேள்விக்குள்ளாக்கியதன் மூலம், ஆளும் பாஜக சிஜேபி அமைப்பைப் பிரதான எதிர்க்கட்சிகளுக்கு எதிரான பி-டீமாக (B-Team) களமிறக்கத் திட்டமிடுகிறதா என்ற விவாதத்தை அண்ணாமலை கிளப்பியுள்ள விவகாரம் தேசிய அளவிலும், பாஜக வட்டாரத்திலும் பெரும் சலசலப்பை ஏற்படுத்தியுள்ளது.

இதையும் படிங்க: டெல்லி தசரா விழா: ராவணன் பொம்மை மீது அம்பு எய்த பிரதமர் நரேந்திர மோடி!