கர்நாடகாவில் நடைபாதைகளில் வாகனங்களை ஓட்டுவோருக்கு விதிக்கப்படும் அபராதத் தொகையை பெருமளவில் உயர்த்தும் திட்டத்தை அம்மாநில அரசு தீவிரமாக பரிசீலித்து வருகிறது. தற்போது ரூ.500 ஆக இருக்கும் அபராதத்தை ரூ.5,000 ஆக உயர்த்துவதுடன், முதல் முறை தவறு செய்தால் ரூ.5,000ம், இரண்டாவது முறை அதே தவறை செய்தால் ரூ.10,000ம் விதிக்கும் வகையில் புதிய விதிமுறைகள் உருவாக்கப்பட்டு வருகின்றன.

இந்த நடவடிக்கை பெங்களூரு உள்ளிட்ட நகரங்களில் பாதசாரிகளின் பாதுகாப்பை உறுதி செய்வதற்காக மேற்கொள்ளப்படுகிறது.பெங்களூருவில் போக்குவரத்து நெரிசல் அதிகமாக இருப்பதால் பலரும் இருசக்கர வாகனங்கள் உள்ளிட்ட வாகனங்களை நடைபாதைகளில் ஓட்டிச் செல்வது வழக்கமாகிவிட்டது. சமீப காலங்களில் உச்சநீதிமன்ற உத்தரவின்படி நடைபாதைகளில் உள்ள ஆக்கிரமிப்புகளை அகற்றும் பணிகள் தீவிரமாக நடைபெற்று வருகின்றன. ஆனால் அவ்வாறு சுத்தம் செய்யப்பட்ட நடைபாதைகளையே பல வாகன ஓட்டிகள் தங்கள் வாகனங்களை ஓட்ட பயன்படுத்துவதாக புகார்கள் அதிகரித்துள்ளன.

இதனால் பாதசாரிகள், குறிப்பாக முதியோர், குழந்தைகள் மற்றும் மாற்றுத்திறனாளிகள் பெரும் இடர்பாட்டை எதிர்கொள்கின்றனர். நடைபாதையில் வாகனம் ஓட்டுவதால் ஏற்படும் விபத்துகளும் அதிகரித்து வருவதால், தற்போதைய ரூ.500 அபராதம் போதுமான தடையாக இல்லை என்ற கருத்து வலுப்பெற்றுள்ளது.இந்த நிலையில், போக்குவரத்துத் துறை மற்றும் உள்துறை ஆகியவற்றின் இணைந்த கூட்டங்களில் இந்த அபராத உயர்வு குறித்து விரிவாக விவாதிக்கப்பட்டுள்ளது.

இதையும் படிங்க: குற்றங்களை இரும்பு கரம் கொண்டு அடக்குவோம்! உயர்கல்வித்துறை ஊழல் குறித்து அமைச்சர் தகவல்!

முதல் தவறுக்கு ரூ.5,000 மற்றும் தொடர்ந்து அதே தவறை செய்யும்போது ரூ.10,000 அபராதம் விதிப்பதுடன், பழக்கம் உள்ள மீறுநர்களுக்கு உரிமம் இடைநீக்கம் செய்வது போன்ற கூடுதல் நடவடிக்கைகளும் பரிசீலனையில் உள்ளன. இதர போக்குவரத்து விதிமீறல்களான ஒருவழிச் சாலையில் எதிர்த்திசையில் ஓட்டுதல், சட்டவிரோத நிறுத்தம் போன்றவற்றிற்கும் அபராதத்தை உயர்த்தும் திட்டங்களும் பேசப்பட்டு வருகின்றன. 

இதையும் படிங்க: ராகுல் ஏற்காத கோரிக்கை? சோனியாவை தேடிச் சென்ற கடிதம்.. டெல்லி பேரணியில் திடீர் திருப்பம்!!