வக்பு சட்ட மசோதா மக்களவையில் அறிமுகம் செய்யப்பட்டபோது தமிழ்நாடு சட்டப்பேரவையில் தீர்மானம் நிறைவேற்றப்பட்டது. அந்தத் தீர்மானத்தைப் பிரதான எதிர்கட்சியான அதிமுக, பாமக உள்ளிட்ட கட்சிகளும் ஆதரவு தெரிவித்தன. தற்போது வக்பு திருத்தச் சட்டம் அமலுக்கு வந்துவிட்ட நிலையில், ஜம்மு காஷ்மீர் சட்டப்பேரவை கூட்டத் தொடரில் இதுபற்றி விவாதிக்க கோரி கேள்வி நேரத்தை ஒத்திவைக்கும்படி தேசிய மாநாட்டு கட்சி, காங்கிரஸ், சில சுயேச்சை உறுப்பினர்கள் பலர், சபாநாயகர் அப்துல் ரஹீம் ராதரிடம் நோட்டீஸ்  கொடுத்தனர்.
ஆனால், இந்த கோரிக்கையை சபாநாயகர் நிராகரித்துவிட்டார். 

ஏன் நிராகரிக்கப்பட்டார் என்பதற்கும் சபாநாயகர் விளக்கம் அளித்தார். “விதி 56 மற்றும் 58 துணை விதி 7இன் படி, நீதிமன்ற விசாரணையில் உள்ள எந்த ஒரு விஷயம் குறித்தும் அவையில் விவாதிக்க ஒத்தி வைக்க முடியாது. இப்பிரச்சினை உச்ச நீதிமன்றத்தில் இருக்கிறது” என்று சபாநாயகர் கூறினார். ஆனால், சபாநாயகரின் விளக்கத்தை உறுப்பினர்கள் ஏற்க மறுத்தனர்.  காகிதங்களைக் கிழித்தெறிந்து அமளியில் ஈடுபட்டனர். இந்நிலையில் வக்பு திருத்தச் சட்டம் மீதான ஒத்திவைப்பு தீர்மானம் நிராகரிக்கப்பட்டது பற்றி ஜனநாயகக் கட்சி தலைவரும் முன்னாள் முதல்வருமான மெகபூபா முப்தி எதிர்ப்பு தெரிவித்துள்ளார். இதுதொடர்பாக எக்ஸ் பக்கத்தில் மெகபூபா பதிவிட்டுள்ளார்.

“ஜம்மு காஷ்மீர் சட்டப்பேரவையில் சபாநாயகர் வக்பு மசோதா மீதான தீர்மானத்தை நிராகரித்தது ஏமாற்றமளிக்கிறது. பாஜகவின் முஸ்லிம் விரோத செயல்பாடுகளுக்கு இந்த அரசாங்கம் முற்றிலும் அடிபணிந்து, இருதரப்பினரையும் திருப்திப்படுத்த இழிவாக முயற்சிப்பது போல் தெரிகிறது. வக்பு மசோதாவை உறுதியாக எதிர்த்த தமிழக அரசிடம் இருந்து தேசிய மாநாட்டு கட்சி கற்றுக் கொள்ள வேண்டும். ஜம்மு காஷ்மீர் முஸ்லிம் மக்கள் பெரும்பான்மை நிறைந்த மாநிலம் ஆகும். அவர்களை மையமாகக் கொண்ட ஒரு அரசாங்கத்திற்கு இந்த பிரச்சனையை விவாதிக்க கூட தைரியம் இல்லாதது கவலை அளிக்கிறது” என்று அதில் கூறியுள்ளார்.

இதையும் படிங்க: சொன்னதை செய்த திமுக.. வக்பு சட்டத்தை எதிர்த்து உச்ச நீதிமன்றத்தில் திமுக எம்.பி. ஆ.ராசா மனு.!

இதையும் படிங்க: வக்பு சொத்தை அனுபவிக்கும் தனி நபர்கள்.. சட்டத் திருத்தத்தை மனதார வரவேற்கும் ஷேக் தாவூத்..!!