அனுமதியின்றி போராட்டம் நடத்தி பொதுமக்களுக்கு இடையூறு ஏற்படுத்தியதாகக் கூறி, முன்னாள் முதலமைச்சரும் அதிமுக பொதுச்செயலாளருமான எடப்பாடி கே. பழனிசாமிக்கு எதிராகத் திருச்சி போலீசார் பதிவு செய்திருந்த வழக்கைச் சென்னை உயர்நீதிமன்றம் அதிரடியாக ரத்து செய்து உத்தரவிட்டுள்ளது.

கடந்த 2022-ஆம் ஆண்டு ஏப்ரல் 5-ஆம் தேதி திருச்சி கண்டோன்மெண்ட் ரயில்வே ஜங்ஷன் ரவுண்டானா அருகே அதிமுக சார்பில் கண்டன ஆர்ப்பாட்டம் நடைபெற்றது. திமுக அரசின் சொத்துவரி உயர்வு, ஏழைப் பெண்களுக்கான தாலிக்குத் தங்கம் திட்டத்தை ரத்து செய்த நடவடிக்கை உள்ளிட்டவைகளைக் கண்டித்து, அப்போதைய எதிர்க்கட்சித் தலைவராக இருந்த எடப்பாடி பழனிசாமி தலைமையில் இந்த ஆர்ப்பாட்டம் முன்னெடுக்கப்பட்டது.

காவல்துறையின் உரிய அனுமதியின்றி சட்டவிரோதமாகக் கூடிப் போராட்டம் நடத்தியதாகவும், பொதுப் போக்குவரத்துக்குக் கடுமையான இடையூறு ஏற்படுத்தியதாகவும் கூறி எடப்பாடி பழனிசாமி உள்ளிட்ட அதிமுக நிர்வாகிகள் மீது திருச்சி கண்டோன்மெண்ட் போலீசார் வழக்குப் பதிவு செய்தனர். இந்நிலையில், 2022-ஆம் ஆண்டில் பதிவு செய்யப்பட்ட இந்த வழக்கில் மூன்று ஆண்டுகள் கடந்துவிட்ட நிலையிலும் போலீசார் இதுவரை நீதிமன்றத்தில் குற்றப்பத்திரிகையைத் தாக்கல் செய்யவில்லை.

இதையும் படிங்க: ஜெம் வீரமணி வழக்கு வீடியோக்களை வெளியிட ஊடகங்களுக்கு தடை.... சென்னை ஐகோர்ட் அதிரடி!

இதனைச் சுட்டிக்காட்டியும், அரசியல் பழிவாங்கும் நோக்கத்துடன் தொடரப்பட்ட இந்த வழக்கை முழுமையாக ரத்து செய்ய வேண்டும் எனக் கோரியும் எடப்பாடி பழனிசாமி தரப்பில் சென்னை உயர்நீதிமன்றத்தில் மனுத்தாக்கல் செய்யப்பட்டது. அந்த மனுவில், அரசியல் உள்நோக்கத்தோடு மட்டுமே இந்த வழக்கு புனையப்பட்டுள்ளது; அமைதியான முறையில் நடைபெற்ற அந்தப் போராட்டத்தில் எந்தவித அசம்பாவிதச் சம்பவங்களோ, வன்முறையோ நிகழவில்லை என்று தெரிவிக்கப்பட்டிருந்தது.

மேலும், ஜனநாயக நாட்டில் மக்களின் நலனுக்காக ஜனநாயக ரீதியில் ஆர்ப்பாட்டம் செய்வோருக்கு எதிராக இத்தகைய குற்றவியல் நடவடிக்கைகளைத் தொடர முடியாது என்பதால், வழக்கை உடனடியாக ரத்து செய்ய வேண்டும் என வாதிடப்பட்டது. இந்த மனுவை விரிவாக விசாரித்த சென்னை உயர்நீதிமன்ற நீதிபதி வி. லட்சுமி நாராயணன், எடப்பாடி பழனிசாமி தரப்பு வாதங்களை ஏற்றுக்கொண்டு, அவர் மீதான குற்றவியல் வழக்கை முழுமையாக ரத்து செய்து தீர்ப்பளித்தார்.

இதையும் படிங்க: பட்டினப்பாக்கம் புதிய தலைமை செயலகத்திற்கு இடைக்கால தடை கோரி மனு! சென்னை ஐகோர்ட்டில் வழக்கு!