மேகாலயாவின் கிழக்கு ஜெயின்ஷியா ஹில்ஸ் மாவட்டத்தில், தாங்ஸ்கு (Thangsku) பகுதியில் அமைந்திருந்த சட்டவிரோத 'ராட்-ஹோல்' நிலக்கரிச் சுரங்கத்தில் பயங்கர வெடி விபத்து ஏற்பட்டது. இதில் குறைந்தது 18 தொழிலாளர்கள் உயிரிழந்துள்ளனர். மேலும் சிலர் உள்ளே சிக்கியிருக்கலாம் என்ற அச்சம் நீடிக்கிறது. இந்த சம்பவம் பெரும் அதிர்ச்சியையும் கோபத்தையும் ஏற்படுத்தியுள்ளது.

நேற்று காலையில் நடந்த இந்த வெடி விபத்து, சுரங்கத்திற்குள் டைனமைட் பயன்படுத்தியதால் ஏற்பட்டதாக கருதப்படுகிறது. இது 'ராட்-ஹோல்' முறையில் நடைபெறும் சட்டவிரோத நிலக்கரி சுரங்கமாகும். இம்முறையில் குறுகிய சுரங்கங்களில் தொழிலாளர்கள் நுழைந்து நிலக்கரியை எடுப்பது வழக்கம். ஆனால் இது மிகவும் ஆபத்தானது என்பதால், தேசிய பசுமை தீர்ப்பாயம் (NGT) மற்றும் நீதிமன்ற உத்தரவுகளால் இது தடை செய்யப்பட்டுள்ளது. இருப்பினும், சட்டவிரோதமாக இத்தகைய சுரங்கங்கள் தொடர்ந்து இயங்கி வருவது தொடர்பான குற்றச்சாட்டுகள் எழுந்துள்ளன.

இதையும் படிங்க: தனித்துவமான மேகாலயாவின் வாழும் வேர் பாலங்கள்..! யுனெஸ்கோவிற்கு இந்தியா பரிந்துரை..!

விபத்து நடந்த இடத்தில் இருந்து 18 உடல்கள் மீட்கப்பட்டுள்ளன. காயமடைந்தவர்களுக்கு உடனடி மருத்துவ உதவி அளிக்கப்பட்டு வருகிறது. சரியான தொழிலாளர்கள் எண்ணிக்கை இன்னும் உறுதிப்படுத்தப்படவில்லை. மேலும் பலர் சிக்கியிருக்கலாம் என்று அஞ்சப்படுவதாக மேகாலயா காவல்துறை இயக்குநர் ஐ. நோங்ராங் பிடிஐ-க்கு தெரிவித்துள்ளார்.

இந்த சம்பவத்தை தீவிரமாக எடுத்துக்கொண்ட மேகாலயா உயர் நீதிமன்றம், தாமாக முன்வந்து (suo motu) வழக்கை எடுத்துக்கொண்டது. நீதிபதிகள் எச்.எஸ். தங்க்கியூ மற்றும் டபிள்யூ. டியேங்டோ அடங்கிய அமர்வு, ஊடக அறிக்கைகளை அடிப்படையாகக் கொண்டு இதை விசாரணைக்கு எடுத்தது. கடந்த ஜனவரி 14 அன்றும் இதேபோன்ற விபத்து நடந்திருந்தும், சட்டவிரோத சுரங்க நடவடிக்கைகள் தடுக்கப்படாமல் தொடர்வது ஏன் என்று நீதிமன்றம் கடுமையாக கேள்வி எழுப்பியது.

நீதிமன்றம், கிழக்கு ஜெயின்ஷியா ஹில்ஸ் மாவட்ட துணை ஆணையர் மற்றும் காவல்துறை கண்காணிப்பாளருக்கு (SP) உடனடி நடவடிக்கை எடுக்க உத்தரவிட்டுள்ளது. சுரங்க உரிமையாளர்கள், இயக்குநர்கள் மற்றும் தொடர்புடைய அனைவரையும் அடையாளம் கண்டு கைது செய்ய வேண்டும். சுரங்கத்தில் உள்ள அனைத்து பொருட்களையும் பறிமுதல் செய்ய வேண்டும் என்று அறிவுறுத்தியுள்ளது.

பாதிக்கப்பட்டவர்கள் மற்றும் காயமடைந்தவர்களுக்கு உரிய உதவி மற்றும் மருத்துவ சிகிச்சை உறுதி செய்ய வேண்டும் என்றும் வலியுறுத்தியுள்ளது. மேலும், பிப்ரவரி 9 அன்று காலை 10:30 மணிக்கு நேரில் ஆஜராகி, எடுக்கப்பட்ட நடவடிக்கைகள் குறித்த விரிவான அறிக்கையை சமர்ப்பிக்க வேண்டும். சட்டவிரோத சுரங்கங்கள் எவ்வாறு தொடர்ந்து இயங்க அனுமதிக்கப்பட்டன என்பதை விளக்க வேண்டும் என்றும் நீதிமன்றம் கண்டிப்புடன் உத்தரவிட்டுள்ளது.

இந்த சம்பவம் மேகாலயாவில் சட்டவிரோத நிலக்கரி சுரங்கங்களின் ஆபத்தை மீண்டும் வெளிச்சத்திற்கு கொண்டு வந்துள்ளது. முதலமைச்சர் கான்ராட் கே சங்க்மா, கடுமையான நடவடிக்கை எடுக்கப்படும் என்று எச்சரித்துள்ளார். பாதிக்கப்பட்ட குடும்பங்களுக்கு ரூ.3 லட்சம் இழப்பீடு அறிவித்துள்ளார். இதுபோன்ற விபத்துகள் தடுக்கப்பட வேண்டும் என்பதற்காக அரசு மற்றும் நீதித்துறை கடும் நிலைப்பாட்டை எடுத்துள்ளது.

இதையும் படிங்க: திருப்பதி பிரசாத லட்டின் நெய்யில் பாமாயில்! கடவுளுக்கு எதிரான பாவம்! ஆந்திர முதல்வர் கொதிப்பு!