அமெரிக்காவின் புளோரிடா மாநிலத்தில் உள்ள ட்ரம்ப் நேஷனல் டோரல் மியாமி ரிசார்ட்டில் டிசம்பர் 14 மற்றும் 15 தேதிகளில் நடைபெறவுள்ள ஜி20 உச்சிமாநாடு, உலகப் பொருளாதார ஒத்துழைப்பில் புதிய அத்தியாயத்தைத் தொடங்கும் என எதிர்பார்க்கப்படுகிறது. 

அமெரிக்க அதிபர் டொனால்ட் டிரம்ப் தலைமையில் நடைபெறும் இந்த 21வது ஜி20 கூட்டத்தில், உலகின் முக்கிய பொருளாதாரங்களின் தலைவர்கள் பங்கேற்க உள்ளனர். மியாமி சர்வதேச விமான நிலையத்திற்கு அருகிலுள்ள இந்த இடம், உள்கட்டமைப்பு வசதிகளால் தேர்ந்தெடுக்கப்பட்டுள்ளது.

இந்த மாநாட்டில் இந்தியப் பிரதமர் நரேந்திர மோடி கலந்துகொள்ள இருப்பதாக டெல்லி வட்டாரங்கள் தெரிவிக்கின்றன. மாநாட்டின் ஓரங்களில் இந்தியா-அமெரிக்கா இருதரப்பு சந்திப்பு நடைபெற வாய்ப்புள்ளது. குவாட் குழுவின் (இந்தியா, அமெரிக்கா, ஜப்பான், ஆஸ்திரேலியா) தலைவர்கள் சந்திப்புக்கான ஏற்பாடுகளும் நடைபெற்று வருகின்றன. 

இதையும் படிங்க: எங்களிடம் கற்பனை செய்ய முடியாத ஆயுதங்கள் உள்ளன! ஐ.நா பொதுச்சபையில் டொனால்ட் ட்ரம்ப் கர்ஜனை!

அமெரிக்காவின் இந்தியத் தூதர் செர்ஜியோ கோர், டிரம்ப் சந்திக்க திட்டமிட்டுள்ள முக்கிய தலைவர்களில் மோடியும் ஒருவர் என உறுதிப்படுத்தியுள்ளார். கடந்த ஜூன் மாதம் பிரான்சில் நடைபெற்ற ஜி7 மாநாட்டின் போது இரு தலைவர்களும் சந்தித்திருந்தனர். தற்போதைய சூழலில் இருதரப்பு வர்த்தகப் பேச்சுவார்த்தைகள் மற்றும் ரஷ்யாவிடமிருந்து எண்ணெய் வாங்கும் நாடுகள் மீதான அமெரிக்க வரி விதிப்புகள் ஆகியவை முக்கிய விவாதப் பொருட்களாக இருக்கும்.

அமெரிக்கப் பயணத்தைத் தொடர்ந்து பிரதமர் மோடி கனடாவுக்குச் செல்ல வாய்ப்புள்ளது. கனடா பிரதமர் மார்க் கார்னி, இந்தியாவுடனான வர்த்தகப் பேச்சுவார்த்தைகளில் நல்ல முன்னேற்றம் ஏற்பட்டுள்ளதாகவும், மோடி டிசம்பரில் கனடாவுக்கு வருகை தருவார் என்றும் தெரிவித்துள்ளார். இரு நாடுகளும் இந்த ஆண்டு இறுதிக்குள் விரிவான பொருளாதாரக் கூட்டு ஒப்பந்தத்தை (CEPA) இறுதி செய்ய முயன்று வருகின்றன.

வர்த்தகத்தை இரட்டிப்பாக்கி 2030-க்குள் 70 பில்லியன் டாலர் அளவுக்கு உயர்த்தும் இலக்கு நிர்ணயிக்கப்பட்டுள்ளது. ஏற்கனவே ஆற்றல், முக்கிய கனிமங்கள், தொழில்நுட்பம் மற்றும் பாதுகாப்புத் துறைகளில் ஒத்துழைப்பு விரிவடைந்து வருகிறது. இந்திய வெளியுறவுத்துறை இதுகுறித்து அதிகாரப்பூர்வ அறிவிப்பு வெளியிடவில்லை எனினும், இரு நாட்டு உறவுகளில் புதிய உத்வேகம் ஏற்படும் என எதிர்பார்க்கப்படுகிறது. 

இந்த இரட்டைப் பயணம் இந்தியாவின் வெளியுறவுக் கொள்கையில் முக்கியத் திருப்பமாக அமையும்.

இதையும் படிங்க: எச்-1பி விசா கட்டண உயர்வு தொடரும்.. மேலும் ஓராண்டுக்கு நீட்டித்த அமெரிக்கா..!! டிரம்ப் அதிரடி!!