லோக்சபா சபாநாயகர் ஓம் பிர்லாவுக்கு எதிராக எதிர்க்கட்சிகள் கொண்டு வந்துள்ள நம்பிக்கையில்லா தீர்மானம் மீதான விவாதம் தொடங்கி நடைபெற்று வருகிறது. பாராளுமன்ற பட்ஜெட் கூட்டத்தொடரின் இரண்டாம் அமர்வில் இன்று (மார்ச் 10, 2026) இந்த விவாதம் தீவிரமடைந்துள்ளது. அவையை மூத்த எம்பி ஜெகதாம்பிகா பால் தலைமை தாங்கி நடத்தி வருகிறார்.

இண்டி கூட்டணியில் உள்ள காங்கிரஸ், தி.மு.க. உள்ளிட்ட எதிர்க்கட்சிகள், சபாநாயகர் ஓம் பிர்லா ஒருதலைபட்சமாக செயல்படுவதாக குற்றம் சாட்டி இத்தீர்மானத்தை கொண்டு வந்துள்ளன. கடந்த பிப்ரவரி மாதம் தாக்கல் செய்யப்பட்ட இந்த தீர்மானத்துக்கு 118 எம்பிக்கள் கையெழுத்திட்டுள்ளனர். 

சபாநாயகர் எதிர்க்கட்சி உறுப்பினர்களின் கோரிக்கைகளை அனுமதிக்காமல் மறுப்பதாகவும், ராகுல் காந்தி போன்ற தலைவர்களுக்கு பேச வாய்ப்பு மறுக்கப்படுவதாகவும் குற்றச்சாட்டு எழுப்பப்பட்டுள்ளது.

இதையும் படிங்க: சபாநாயகர் நாற்காலில் அமர மாட்டேன்!! எதிர்க்கட்சிகளின் நம்பிக்கையில்லா தீர்மானம்! ஓம் பிர்லா அதிரடி!

விவாதத்தில் பேசிய காங்கிரஸ் எம்பி வேணுகோபால், "11 ஆண்டுகளாக லோக்சபாவுக்கு துணை சபாநாயகர் நியமிக்கப்படவில்லை. இது சபையின் செயல்பாட்டை பாதிக்கிறது" என்று குற்றம் சாட்டினார். எதிர்க்கட்சி எம்பிக்கள் "சபாநாயகர் பாஜகவுக்கு சாதகமாக செயல்படுகிறார். எதிர்க்கட்சி குரல்களை அடக்குகிறார்" என்று விமர்சித்தனர். இதனால் சபையில் பரபரப்பு நிலவியது.

பாஜக தலைமையிலான தே.ஜ. கூட்டணிக்கு லோக்சபாவில் தெளிவான பெரும்பான்மை (சுமார் 335 இடங்கள்) உள்ளதால், இத்தீர்மானம் தோற்கடிக்கப்படுவது உறுதி என்று அரசியல் வட்டாரங்கள் தெரிவிக்கின்றன. அரசியல் சாசனத்தின் 94(c) பிரிவின்படி சபாநாயகரை நீக்க எளிய பெரும்பான்மை (272 வாக்குகள்) தேவை. எதிர்க்கட்சி கூட்டணியிடம் 230க்கும் குறைவான எம்பிக்கள் இருப்பதால் வெற்றி வாய்ப்பு குறைவு.

இருப்பினும், இந்த தீர்மானம் பாராளுமன்றத்தில் எதிர்க்கட்சிகளின் ஒற்றுமையை வெளிப்படுத்துகிறது. துணை சபாநாயகர் பதவி காலியாக இருப்பதால், விவாதத்தை ஜெகதாம்பிகா பால் தலைமை தாங்குகிறார். பிரதமர் மோடி சபாநாயகரை புகழ்ந்து ஆதரவு தெரிவித்துள்ள நிலையில், விவாதம் தொடர்ந்து நடைபெற்று வருகிறது. எதிர்க்கட்சிகள் மேலும் தீவிரமான விமர்சனங்களை முன்வைத்து வருகின்றன.

இந்த சம்பவம் 2026 சட்டமன்ற தேர்தலுக்கு முன் பாராளுமன்ற அரசியலை சூடுபிடிக்கச் செய்துள்ளது. சபாநாயகரின் நடுநிலை குறித்த விவாதம் தொடரும் என எதிர்பார்க்கப்படுகிறது.

இதையும் படிங்க: விட்டுக்கொடுத்துருங்க ராகுல்!! மம்தாதான் தலைவருக்கு கரெட்டு! ஓபனாக பேசிய மணி சங்கர் அய்யர்! ஸ்டாலினுக்கும் சப்போர்ட்!!