பழனி அருகே மானூர் கிராமத்தில் அரசு தொடக்கப்பள்ளி செயல்பட்டு வருகிறது. இந்தப் பள்ளியில் அதே பகுதியைச் சேர்ந்த 80-க்கும் மேற்பட்ட மாணவ, மாணவிகள் கல்வி பயின்று வருகின்றனர். பள்ளியின் தலைமை ஆசிரியராக ஜெயக்குமார் பணியாற்றி வருகிறார்.

காலாண்டு விடுமுறை காரணமாக கடந்த 10 நாட்களாக பள்ளி பூட்டப்பட்டிருந்த நிலையில், பள்ளிக்குள் புகுந்த சமூக விரோதிகள், மாணவர்கள் பயன்படுத்துவதற்காக தற்காலிகமாக அமைக்கப்பட்டிருந்த சிறிய தண்ணீர் தொட்டிக்குள் இறங்கி மலம் கழித்துச் சென்றுள்ளனர்.

விடுமுறை முடிந்து கடந்த திங்கட்கிழமை பள்ளிக்கு வந்த ஆசிரியர்கள் மற்றும் காலை உணவு பணியாளர்கள் பள்ளியை சுத்தம் செய்தபோது, தண்ணீர் தொட்டிக்குள் மலம் கழிக்கப்பட்டிருந்ததை கண்டு அதிர்ச்சி அடைந்தனர்.

இதையும் படிங்க: #BREAKING பழனி நில மோசடி வழக்கில் அதிரடி திருப்பம்... பெண் உட்பட மேலும் 2 பேரை தட்டித்தூக்கிய சிபிசிஐடி போலீஸ்...!

இதையடுத்து உடனடியாக அந்த தண்ணீர் தொட்டி அகற்றப்பட்டு, சுத்தம் செய்யப்பட்டது. காலை உணவு பணியாளர்கள் தண்ணீர் தொட்டியை சரியான நேரத்தில் கவனித்ததால், அதில் இருந்த அசுத்தமான தண்ணீரை மாணவர்கள் பயன்படுத்துவது தவிர்க்கப்பட்டது.

இந்த சம்பவம் நடந்த இரண்டு நாட்களுக்குப் பிறகு, தண்ணீர் தொட்டிக்குள் சமூக விரோதிகள் மலம் கழித்த சம்பவம் அப்பகுதி பெற்றோருக்கு தெரியவந்தது. இதையடுத்து பள்ளிக்கு திரண்டு வந்த பெற்றோர், பள்ளி தலைமை ஆசிரியரிடம் கடும் கேள்விகளை எழுப்பினர்.

பள்ளியில் போதிய அடிப்படை வசதிகள் இல்லை என்றும், விடுமுறை நாட்களில் சமூக விரோதிகள் பள்ளிக்குள் புகுந்து அசுத்தமான செயல்களில் ஈடுபடுவதாகவும் பெற்றோர் குற்றம்சாட்டினர்.

மேலும், மாணவர்கள் பயன்படுத்தும் தண்ணீர் தொட்டியில் இதுபோன்ற செயலில் ஈடுபட்டவர்கள் மீது உரிய நடவடிக்கை எடுக்க வேண்டும் என்றும், பள்ளிக்கு பாதுகாப்பு ஏற்பாடுகளை செய்து தர வேண்டும் என்றும் பெற்றோர் கோரிக்கை விடுத்துள்ளனர்.

மாணவர்களின் சுகாதாரம் மற்றும் பாதுகாப்பை கருத்தில் கொண்டு, பள்ளிக்குள் அத்துமீறி நுழைந்தவர்கள் மீது காவல்துறை நடவடிக்கை எடுக்க வேண்டும் என்பதே பெற்றோரின் முக்கிய கோரிக்கையாக உள்ளது.

மேலும் குடிநீர் தொட்டியில் மனித மலம் கலந்திருப்பது, சமையலர் மற்றும் தலைமை ஆசிரியருக்கு தெரிய வந்ததாக கூறப்படுகிறது. ஆனால் இந்த விவகாரத்தை உடனடியாக வெளியே தெரிவிக்காமல் மறைத்து விட்டதாக குற்றச்சாட்டு எழுந்துள்ளது.

இதையும் படிங்க: மக்களே குட் நியூஸ்..! பழனியில் ரோப் கார் சேவை மீண்டும் தொடக்கம்..! முக்கிய அறிவிப்பு..!!