புதுடில்லி: நாட்டின் வான்வெளியை பாதுகாப்பதில் முக்கிய பங்காற்றி வரும் இந்திய விமானப்படை வீரர்களின் துணிச்சல் மற்றும் அர்ப்பணிப்பை போற்றும் வகையில், விமானப்படை தினம் இன்று நாடு முழுவதும் கடைப்பிடிக்கப்படுகிறது. இதையொட்டி பிரதமர் நரேந்திர மோடி மற்றும் ஜனாதிபதி திரவுபதி முர்மு ஆகியோர் விமானப்படை வீரர்களுக்கு வாழ்த்து தெரிவித்துள்ளனர்.

இந்திய விமானப்படை உருவாக்கப்பட்ட நாளை நினைவுகூரும் வகையில் ஆண்டுதோறும் அக்டோபர் 8-ம் தேதி விமானப்படை தினம் கொண்டாடப்படுகிறது. நாட்டின் பாதுகாப்பில் மட்டுமின்றி, இயற்கை பேரிடர்களின்போதும் விமானப்படையின் பங்களிப்பு முக்கியமானதாக உள்ளது. வெள்ளம், நிலநடுக்கம் உள்ளிட்ட பேரிடர் காலங்களில் மீட்பு மற்றும் நிவாரணப் பணிகளிலும் விமானப்படை வீரர்கள் ஈடுபட்டு வருகின்றனர்.

விமானப்படை தினத்தை முன்னிட்டு பிரதமர் மோடி வெளியிட்டுள்ள வாழ்த்து செய்தியில், இந்திய விமானப்படை வீரர்களை நினைத்து நாடு பெருமை கொள்வதாக தெரிவித்துள்ளார். நாட்டின் வான்வெளியை பாதுகாப்பதில் அவர்கள் வெளிப்படுத்தும் துணிச்சல் மற்றும் அர்ப்பணிப்பை போற்றுவதாகவும் அவர் குறிப்பிட்டுள்ளார்.

இதையும் படிங்க: இந்த உயரத்திற்கு வருவேன் என நினைக்கவே இல்லை! என் பலமே மக்கள் தான்! 25 ஆண்டு பயணத்தை நினைவுகூர்ந்த மோடி!

இந்திய விமானப்படையின் செயல்பாடுகள் போர் நடவடிக்கைகளுடன் மட்டும் நின்றுவிடுவதில்லை. பேரிடர் காலங்களில் தொலைதூரப் பகுதிகளில் சிக்கித் தவிக்கும் மக்களை மீட்பது, அத்தியாவசியப் பொருட்களை கொண்டு செல்வது உள்ளிட்ட மனிதாபிமான பணிகளிலும் விமானப்படை தொடர்ந்து ஈடுபட்டு வருகிறது.

ஜனாதிபதி திரவுபதி முர்முவும் விமானப்படை தினத்தை முன்னிட்டு வீரர்கள், முன்னாள் வீரர்கள் மற்றும் அவர்களது குடும்பத்தினருக்கு வாழ்த்து தெரிவித்துள்ளார். நாட்டிற்கு இந்திய விமானப்படை முன்மாதிரியான சேவையை வழங்கி வருவதாக அவர் தெரிவித்துள்ளார்.

குறிப்பாக, நாட்டின் பாதுகாப்பை உறுதி செய்வதில் விமானப்படை வீரர்களின் துணிச்சல் ஆபரேஷன் சிந்தூர் நடவடிக்கையின்போது வெளிப்பட்டதாக ஜனாதிபதி முர்மு குறிப்பிட்டுள்ளார். விமானப்படை வீரர்களின் அர்ப்பணிப்பு நாட்டிற்கு உத்வேகத்தையும் பெருமையையும் அளிப்பதாகவும் அவர் தெரிவித்துள்ளார்.

இந்திய விமானப்படை தனது திறன், தொழில்நுட்பம் மற்றும் செயல்பாட்டு தயார்நிலையை தொடர்ந்து மேம்படுத்தி வருகிறது. உள்நாட்டு பாதுகாப்பு தேவைகளுக்கு ஏற்ப நவீன போர் விமானங்கள், ஹெலிகாப்டர்கள், போக்குவரத்து விமானங்கள் மற்றும் பல்வேறு கண்காணிப்பு அமைப்புகளையும் பயன்படுத்தி வருகிறது.

இந்நிலையில், விமானப்படை தினம் என்பது தற்போதைய வீரர்களை மட்டுமல்லாமல், நாட்டுக்காக சேவையாற்றிய முன்னாள் வீரர்களையும் அவர்களது குடும்பங்களையும் நினைவுகூரும் நாளாகவும் அமைந்துள்ளது. நாட்டின் பாதுகாப்புக்காக வானில் தொடர்ந்து பணியாற்றும் விமானப்படை வீரர்களுக்கு நாடு முழுவதும் இன்று வாழ்த்துகள் குவிந்து வருகின்றன.

இதையும் படிங்க: நாட்டு மக்களின் நல்வாழ்வுக்காக பிரார்த்தனை!! 25 ஆண்டு பொதுச்சேவை நிறைவு! பிரதமர் மோடி சிறப்பு வழிபாடு!