பிரதம மந்திரி கிசான் சம்மான் நிதி (PM-KISAN) திட்டம், கடந்த 2019ம் ஆண்டு பிப்ரவரியில் தொடங்கப்பட்ட ஒரு மத்திய அரசு திட்டமாகும். இது சிறு மற்றும் குறு விவசாயிகளுக்கு நிதி உதவி வழங்குவதை நோக்கமாகக் கொண்டது. இத்திட்டத்தின் கீழ், 2 ஹெக்டேர் வரை நிலம் வைத்திருக்கும் விவசாய குடும்பங்களுக்கு 4 மாதத்திற்கு ஒரு முறை தலா ரூ.2000/- வீதம் மூன்று தவணைகளில் ஆண்டுக்கு ரூ.6,000/- விவசாயிகளின் வங்கிக் கணக்கில் நேரடிப் பணப்பரிமாற்றம் மூலமாக வழங்கப்பட்டு வருகிறது. இதுவரை, 11 கோடிக்கும் மேற்பட்ட விவசாயிகளுக்கு ரூ.3.69 லட்சம் கோடி விநியோகிக்கப்பட்டுள்ளது, இதில் 30 மில்லியன் பெண் விவசாயிகளும் பயனடைந்துள்ளனர்.

2025ம் ஆண்டு பிப்ரவரி 24ம் தேதி அன்று, பீகாரின் பாகல்பூரில் 19வது தவணையாக ரூ.22,000 கோடி 9.8 கோடி விவசாயிகளுக்கு விடுவிக்கப்பட்டது. 20வது தவணை ஜூலை மாதத்தில் வெளியாகும் என எதிர்பார்க்கப்பட்ட நிலையில், ஆகஸ்ட் 2ம் தேதி வெளியிடப்படும் என மத்திய அரசு அறிவித்தது.

இதையும் படிங்க: விவசாயிகளுக்கான பிஎம் கிசான் திட்டம்.. 20வது தவணைத்தொகை விடுவிப்பு தேதி அறிவிப்பு..!!

இந்நிலையில், பிஎம் கிசான் திட்டத்தின் 20வது தவணைத்தொகை விவசாயிகளுக்கு இன்று விடுவிக்கப்பட்டுள்ளது. உத்தரபிரதேசத்தின் வாரணாசியில் நடைபெற்ற நிகழ்ச்சியில் கலந்துகொண்ட பிரதமர் மோடி, நாடு முழுவதும் 9 கோடியே 70 லட்சம் விவசாயிகளுக்கு பிஎன் கிசான் திட்டத்தின் 20வது தவணைத்தொகையை விடுவித்தார். தொடர்ந்து உத்தரபிரதேசத்தில் பல்வேறு முடிவுற்ற திட்டப்பணிகளை திறந்து வைத்த பிரதமர் மோடி, 2 ஆயிரத்து 183 கோடி ரூபாய் மதிப்பிலான 52 புதிய திட்டங்களுக்கும் அடிக்கல் நாட்டினார். 

20வது தவணையைப் பெற, விவசாயிகள் இ-கேஒய்சி (e-KYC) செயல்முறையை முடிக்க வேண்டும், மேலும் ஆதார் எண்ணுடன் வங்கிக் கணக்கு இணைக்கப்பட்டிருக்க வேண்டும். இதை pmkisan.gov.in இணையதளத்தில் OTP அல்லது பயோமெட்ரிக் முறையில் செய்யலாம். இ-கேஒய்சி முடிக்காதவர்களுக்கு தொகை வழங்கப்படாது.

மேலும், விவசாயிகள் தங்கள் பயனாளி நிலையை (Beneficiary Status) அதிகாரப்பூர்வ இணையதளத்தில் ஆதார் அல்லது மொபைல் எண்ணைப் பயன்படுத்தி சரிபார்க்க வேண்டும். தவறான வங்கி விவரங்கள் அல்லது ஆதார் இணைப்பு இல்லாமை தொகை பரிமாற்றத்தில் தாமதத்தை ஏற்படுத்தலாம்.

இந்தத் தவணை, கரீப் பருவத்திற்கு முன் விவசாயிகளுக்கு முக்கிய நிதி ஆதரவை வழங்கும் என எதிர்பார்க்கப்படுகிறது. அனைத்து விவசாயிகளும் தங்கள் ஆவணங்களைச் சரிபார்த்து, அதிகாரப்பூர்வ அறிவிப்புகளைப் பின்பற்றுமாறு அறிவுறுத்தப்படுகிறார்கள்.
 
 

இதையும் படிங்க: இந்திய பொருளாதாரம் செத்துருச்சு! அதானிக்கு வேலை பாக்குறாரு மோடி.. ராகுல் விளாசல்..