எலான் மஸ்க்கின் ஸ்டார்லிங்க் செயற்கைக்கோள் இணைய சேவை குறித்த விமர்சனங்களுக்கு ரிலையன்ஸ் இண்டஸ்ட்ரீஸ் உறுதியான பதிலடி கொடுத்துள்ளது. இந்தியாவில் மலிவான இணைய சேவைகளை தடுக்கும் பெரும் பணக்காரர்கள் குறித்து மஸ்க் குற்றம்சாட்டியதையடுத்து, ரிலையன்ஸ் தனது நிலைப்பாட்டை தெளிவுபடுத்தியுள்ளது.

மஸ்க் அண்மையில், ஸ்டார்லிங்க் சேவைக்கு இந்திய அரசின் இறுதி அனுமதி கிடைப்பதில் தடைகள் உள்ளதாகக் கூறி, ஜியோவின் உரிமையாளர் முகேஷ் அம்பானியை குறிவைத்து விமர்சித்தார். அம்பானியை ‘பிரதமர்’ என அழைத்து, இந்தியாவில் அவரிடமே அதிகாரம் இருப்பதாகவும், மலிவு இணையத்தை மக்களுக்கு கிடைக்கவிடாமல் தடுப்பதாகவும் குற்றம்சாட்டினார். இதற்கு இந்திய அரசு உடனடியாக மறுப்பு தெரிவித்தது.

இந்தச் சூழலில் ரிலையன்ஸ் இண்டஸ்ட்ரீஸ் தனது எக்ஸ் (முன்னாள் ட்விட்டர்) பக்கத்தில் அறிக்கை வெளியிட்டுள்ளது. “ஸ்டார்லிங்க் உட்பட எந்த நிறுவனத்துடனும் போட்டியிடுவதில் எங்களுக்கு எந்தப் பிரச்சினையும் இல்லை. இந்தியா முதலீட்டையும் புதிய தொழில்நுட்பத்தையும் வரவேற்கிறது. இந்திய நிறுவனமாக இருந்தாலும், வெளிநாட்டு நிறுவனமாக இருந்தாலும் சட்ட விதிகள் அனைவருக்கும் ஒரே மாதிரியாக இருக்க வேண்டும். ஜியோவின் செயற்கைக்கோள் இணைய சேவைகளுக்குமே அரசாங்க ஒப்புதல்கள் இன்னும் கிடைக்கவில்லை” என்று அதில் தெரிவிக்கப்பட்டுள்ளது.

இதையும் படிங்க: வெற்றி பயணம் திட்டத்தால் வந்த புதிய சிக்கல்? தனியார் பேருந்து உரிமையாளர்களின் அதிரடி கோரிக்கை!!

ரிலையன்ஸ் மேலும் சுட்டிக்காட்டியுள்ளதாவது: 2016-ல் ஜியோ தொலைத்தொடர்பு சந்தையில் நுழைந்தபோது ஒரு வாடிக்கையாளர் கூட இல்லை. இருந்தபோதிலும் மலிவு விலை டேட்டா மற்றும் டிஜிட்டல் சேவைகள் மூலம் விரைவாக வளர்ந்தது. இன்று ஜியோவின் வாடிக்கையாளர் எண்ணிக்கை 53 கோடிக்கும் அதிகமாக உள்ளது. போட்டியை அஞ்சாமல், வாடிக்கையாளர்களுக்கு சிறந்த சேவைகளை வழங்குவதற்கான வாய்ப்பாகவே பார்க்கிறோம் என்றும் அந்த நிறுவனம் தெரிவித்துள்ளது.

இதனிடையே மத்திய தகவல் தொடர்புத் துறை அமைச்சர் ஜோதிராதித்ய சிந்தியா, செயற்கைக்கோள் இணையத் துறையில் எந்த நிறுவனத்துக்கும் ஏகபோக உரிமை அளிக்கப்படாது என்று உறுதியளித்துள்ளார். தற்போது மூன்று நிறுவனங்கள் வணிக உரிமங்களை இறுதி செய்யும் பணியில் ஈடுபட்டுள்ளன என்றும் அவர் தெரிவித்தார்.

இந்தியாவில் செயற்கைக்கோள் இணைய சேவைகள் இன்னும் ஆரம்ப நிலையிலேயே உள்ளன. ரிலையன்ஸ் உள்ளிட்ட உள்நாட்டு நிறுவனங்களும், ஸ்டார்லிங்க் போன்ற வெளிநாட்டு நிறுவனங்களும் சமமான வாய்ப்புகளைப் பெற வேண்டும் என்பதே அரசின் நிலைப்பாடாகத் தெரிகிறது. போட்டி அதிகரிக்கும்போது நுகர்வோருக்கு மலிவு மற்றும் தரமான சேவை கிடைக்கும் என்பது நம்பிக்கை.

இதையும் படிங்க: கோவையில் கால் வைத்ததுமே விஜய் செய்த செயல்... நெகிழ்ந்து போன முன்னாள் ரசிகர் மன்ற நிர்வாகி...!