நாட்டில் சர்க்கரை இருப்பு குறைந்து விலை வேகமாக உயர்ந்து வரும் நிலையில், சுமார் பத்து ஆண்டுகளுக்குப் பிறகு வெளிநாடுகளில் இருந்து கச்சா சர்க்கரையை இறக்குமதி செய்ய மத்திய அரசு முடிவு செய்துள்ளது. அக்டோபர் 31 வரை 10 லட்சம் மெட்ரிக் டன் கச்சா சர்க்கரையை சுங்கவரி இல்லாமல் (டேரிஃப் ரேட் குவாட்டா திட்டத்தின் கீழ்) இறக்குமதி செய்ய அனுமதி அளிக்கப்பட்டுள்ளது. 

விநாயகர் சதுர்த்தி, தசரா, தீபாவளி போன்ற பண்டிகைக் காலத்தில் தேவை அதிகரிக்கும் என்பதால் இந்த நடவடிக்கை எடுக்கப்பட்டுள்ளது. 2025-26 சர்க்கரை பருவத்தில் எத்தனால் தயாரிப்புக்கு பயன்படுத்தப்பட்ட கரும்பைக் கழித்த பிறகு உற்பத்தி சுமார் 2.79 கோடி டன்னாக இருந்ததாக மதிப்பிடப்பட்டுள்ளது. தொடக்க இருப்புடன் சேர்த்து மொத்த கிடைப்பு சுமார் 3.26 கோடி டன். உள்நாட்டு நுகர்வு 2.80 கோடி டன் அளவில் இருக்கும் நிலையில், ஏற்றுமதியும் சேர்த்தால் இருப்பு மேலும் சுருங்கும் நிலை ஏற்பட்டுள்ளது. 

கடந்த நவம்பர் மற்றும் பிப்ரவரியில் மொத்தம் 20 லட்சம் டன் ஏற்றுமதிக்கு அனுமதி அளிக்கப்பட்டதில் சுமார் 8 லட்சம் டன் ஏற்றுமதி செய்யப்பட்டது. இதனால் ஆலைகளில் இருப்பு குறைந்து, மார்ச் முதல் விலை தொடர்ந்து உயர்ந்து வருகிறது. மகாராஷ்டிராவில் ஆலை விலை குவிண்டாலுக்கு ரூ.5,400 முதல் ரூ.5,560 வரை உயர்ந்துள்ளது. சில்லறை விலையும் கடந்த ஆண்டை விட சுமார் 13 சதவீதம் அதிகரித்து கிலோவுக்கு ரூ.52 அளவைத் தாண்டியுள்ளது.

இதையும் படிங்க: ஆசிட் தாக்குதலால் பாதிக்கப்பட்டவர்களுக்கு ரயிலில் பயண சலுகை: உச்ச நீதிமன்றத்தில் மத்திய அரசு தகவல்!

இந்தியா கடைசியாக 2016-17 பருவத்தில் சர்க்கரையை இறக்குமதி செய்தது. தற்போது ஆலைகள் மற்றும் சுத்திகரிப்பு நிறுவனங்கள் ஆகஸ்ட் 21 முதல் 28 வரை ஆன்லைனில் விண்ணப்பிக்கலாம். இதனுடன் பெரும் நுகர்வோருக்கு (மாதத்திற்கு 10 டன் அதிகமாக பயன்படுத்துபவர்கள்) 15 நாள் இருப்பு வரம்பு விதிக்கப்பட்டுள்ளது. இறக்குமதி வந்தாலும் விலை குவிண்டாலுக்கு அதிகபட்சம் ரூ.500 அளவே குறையக்கூடும் என்று தொழில்துறை வட்டாரங்கள் தெரிவிக்கின்றன. உள்நாட்டு விலையை கட்டுப்படுத்தி பண்டிகை காலத் தேவையை பூர்த்தி செய்யும் நோக்கில் இந்த முடிவு எடுக்கப்பட்டுள்ளது.

இதையும் படிங்க: தொகுதி மறுவரையறை...! தமிழக எம்பிக்களுடன் முதல்வர் விஜய் ஆகஸ்ட் 8-ல் அவசர ஆலோசனை!