மதம் மாறிய இஸ்லாமியர்களுக்கு பிசி சலுகை கிடையாது என்ற முக்கிய தீர்ப்பை உச்ச நீதிமன்றம் வழங்கியுள்ளது. தமிழ்நாடு அரசு பிறப்பித்த அரசாணையை செல்லாது என அறிவித்து, மதமாற்றம் மட்டும் கொண்டு பிற்படுத்தப்பட்ட வகுப்பு முஸ்லிம் அந்தஸ்தைப் பெற முடியாது என்று உறுதி செய்துள்ளது.இந்த வழக்கின் பின்னணி தூத்துக்குடி மாவட்டத்தைச் சேர்ந்த ஒரு நபரின் மனுவிலிருந்து தொடங்குகிறது. பரமசிவம் என்ற பெயரில் பிறந்த அவர் 2015 ஆம் ஆண்டு இஸ்லாம் மதத்தைத் தழுவி, தனது பெயரை சமீர் அகமது என மாற்றிக்கொண்டார்.

பின்னர் இஸ்லாமிய முறைப்படி திருமணம் செய்துகொண்ட அவர், தனக்கு முஸ்லிம் லெப்பை சமூகச் சான்றிதழ் வழங்க வேண்டும் என கோரினார். இதனால் பிற்படுத்தப்பட்ட வகுப்பு முஸ்லிம் பிரிவில் இடஒதுக்கீட்டு சலுகைகளைப் பெறலாம் என்ற நம்பிக்கையில் இந்தக் கோரிக்கை எழுந்தது. ஆனால் வட்டாட்சியர் அவரது விண்ணப்பத்தை நிராகரித்தார். இதை எதிர்த்து அவர் உயர்நீதிமன்ற மதுரைக் கிளையில் மனுத் தாக்கல் செய்தார். இந்த வழக்கு நிலுவையில் இருந்தபோது, 2024 மார்ச் 9 ஆம் தேதி தமிழ்நாடு அரசு ஒரு அரசாணையை வெளியிட்டது.

அதன்படி, பிற்படுத்தப்பட்ட வகுப்பினர், மிகவும் பிற்படுத்தப்பட்ட வகுப்பினர், சீர்மரபினர் அல்லது பட்டியலினத்தவர்கள் இஸ்லாம் மதத்திற்கு மாறினால், அவர்களைப் பிற்படுத்தப்பட்ட வகுப்பு முஸ்லிம் எனக் கருதி, அறிவிக்கப்பட்ட ஏழு முஸ்லிம் பிரிவுகளில் ஒன்றில் சமூகச் சான்றிதழ் வழங்கலாம் என அனுமதிக்கப்பட்டது. இதன் நோக்கம், சமூக மற்றும் கல்விரீதியாக பின்தங்கியவர்கள் மதமாற்றம் காரணமாக இடஒதுக்கீட்டு நன்மைகளை இழக்காமல் இருக்க வேண்டும் என்பதாக அரசு விளக்கியது.ஆனால் உயர்நீதிமன்றம் இந்த அரசாணையை ஆய்வு செய்தது. நீண்டகால நீதித்துறை முன்முடிவுகளை அடிப்படையாகக் கொண்டு, மதமாற்றம் செய்தவர் வெறும் முஸ்லிம் மட்டுமே ஆகிறார் என்றும், அவரது முந்தைய சாதி அல்லது சமூக அந்தஸ்து இஸ்லாமிய சமூகத்தில் தொடராது என்றும் தெரிவித்தது. இஸ்லாம் சமத்துவத்தை வலியுறுத்தும் மதமாக இருப்பதால், சாதி அடிப்படையிலான பிரிவுகளை மதமாற்றம் மூலம் உருவாக்குவது சரியல்ல என்ற கருத்தும் முன்வைக்கப்பட்டது.

இதையும் படிங்க: ஓயாத காவிரி பிரச்சனை..! தமிழ்நாட்டுக்கு தண்ணீர் வருமா.? சுப்ரீம்கோர்ட் விசாரணை..!!

அறிவிக்கப்பட்ட ஏழு பிரிவுகளும் பிறப்பின் அடிப்படையில் தீர்மானிக்கப்படுபவை என்பதால், மதமாற்றம் மட்டும் கொண்டு அவற்றில் சேர முடியாது என நீதிமன்றம் கூறியது. மேலும், பட்டியலினத்தவர்களைப் பிற்படுத்தப்பட்ட வகுப்பினருடன் ஒரே வகையில் வைப்பது சட்டரீதியாக பொருந்தாது என்றும் குறிப்பிட்டது. இதனால் அரசாணை அரசியலமைப்புக்கு முரணானது என அறிவிக்கப்பட்டு ரத்து செய்யப்பட்டது. மனுதாரரின் சான்றிதழ் கோரிக்கையும் நிராகரிக்கப்பட்டது.இந்தத் தீர்ப்பை எதிர்த்து தமிழ்நாடு அரசு உச்ச நீதிமன்றத்தில் மேல்முறையீடு செய்தது. மாநில அரசு, சமூகப் பின்தங்கியவர்கள் மதமாற்றத்தால் நன்மைகளை இழக்காமல் இருக்க இந்த அரசாணை அவசியம் என்றும், மாநிலத்திற்கு இத்தகைய கொள்கைகளை வகுக்க அதிகாரம் உள்ளது என்றும் வாதிட்டது. உச்ச நீதிமன்றம் இந்த வாதங்களைக் கேட்டபின் தீர்ப்பை ஒத்திவைத்தது.இறுதியாக உச்ச நீதிமன்றம் உயர்நீதிமன்றத் தீர்ப்பை உறுதி செய்துள்ளது. மதமாற்றம் மட்டும் கொண்டு ஒருவர் அறிவிக்கப்பட்ட பிற்படுத்தப்பட்ட முஸ்லிம் சமூகங்களில் உறுப்பினராக முடியாது எனத் தெளிவுபடுத்தியுள்ளது.

முந்தைய சாதி அல்லது சமூக அந்தஸ்தை புதிய மதத்திற்கு மாற்றிக் கொண்டு இடஒதுக்கீட்டைப் பெற முடியாது என்றும், அரசியலமைப்புச் சட்டத்தின் அடிப்படையில் இந்த நிலைப்பாடு அமைந்துள்ளது என்றும் கூறியுள்ளது. மதமாற்றம் செய்தவர் தனது புதிய மதத்தின் சமூக அமைப்பில் தனித்தனியாக மதிப்பிடப்பட வேண்டும் என்பதே இந்தத் தீர்ப்பின் மையக் கருத்தாகும்.இந்த முடிவு தமிழ்நாட்டில் இடஒதுக்கீட்டுக் கொள்கை தொடர்பான முக்கிய தெளிவை ஏற்படுத்தியுள்ளது. 

இதையும் படிங்க: இன்று உச்ச நிதிமன்றமே அதிரப்போகுது... உச்சக்கட்ட பாதுகாப்பில் டெல்லி... ராகுல் காந்தி விடுத்த எச்சரிக்கை...!