டெல்லி உயர் நீதிமன்ற நீதிபதியாக இருந்த யஷ்வந்த் வர்மாவோட வீட்டில் கடந்த மார்ச் 14, 2025-ல திடீர்னு தீப்பிடிச்சு ஒரு பெரிய சர்ச்சை உருவாச்சு. அந்த சமயத்துல நீதிபதி வர்மாவும் அவரோட மனைவியும் ஊர்ல இல்லை. தீயணைப்பு வீரர்களும் போலீசாரும் வந்து தீயை அணைச்சப்போ, ஒரு அறையில் கட்டுக்கட்டாக பணம் எரிஞ்சு சாம்பலாகி கிடந்தது தெரியவந்துச்சு. 

இந்த பணத்துக்கு தனக்கோ, தன்னோட குடும்பத்துக்கோ எந்த சம்பந்தமும் இல்லைனு நீதிபதி வர்மா மறுத்தார். ஆனாலும், இந்த விவகாரத்தை ஆராய, அப்போதைய இந்திய தலைமை நீதிபதி சஞ்சீவ் கன்னா ஒரு மூவர் குழு அமைச்சார். இந்த விவகாரம் இப்போ உச்ச நீதிமன்றத்தின் தீர்ப்பால நீதிபதி வர்மாவுக்கு பெரிய சிக்கலை உருவாக்கியிருக்கு. 

மூவர் குழுவுல பஞ்சாப் மற்றும் ஹரியானா உயர் நீதிமன்ற தலைமை நீதிபதி ஷீல் நாகு, இமாச்சலப் பிரதேச உயர் நீதிமன்ற தலைமை நீதிபதி ஜி.எஸ். சந்தவாலியா, கர்நாடக உயர் நீதிமன்ற நீதிபதி அனு சிவராமன் ஆகியோர் இருந்தாங்க. இந்த குழு 10 நாள் விசாரணை நடத்தி, 55 சாட்சிகளை விசாரிச்சு, மே 3, 2025-ல தன்னோட அறிக்கையை சமர்ப்பிச்சுது. 

இதையும் படிங்க: ஏதாச்சும் நம்புற மாதிரி இருக்கா? பணமூட்டை சிக்கிய விவகாரம்.. நீதிபதிகள் காட்டம்..!

இந்த அறிக்கையில, நீதிபதி வர்மாவோட வீட்டு கிடங்கு அறையில் எரிஞ்ச பணம் இருந்தது உறுதியாச்சு, ஆனா இந்த பணத்துக்கு மூலம் என்னனு அவரால விளக்க முடியலனு குழு சொல்லுச்சு. இதனால, அவருக்கு எதிரா நாடாளுமன்றத்தில் பதவி நீக்க நடவடிக்கை எடுக்கலாம்னு பரிந்துரைச்சுது. இதைத் தொடர்ந்து, தலைமை நீதிபதி கன்னா, வர்மாவோட பதிலையும், குழு அறிக்கையையும் சேர்த்து குடியரசுத் தலைவர் திரௌபதி முர்முவுக்கும், பிரதமர் நரேந்திர மோடிக்கும் கடிதம் அனுப்பினார்.

இதை எதிர்த்து, நீதிபதி யஷ்வந்த் வர்மா உச்ச நீதிமன்றத்தில் வழக்கு தொடர்ந்தார். அவரோட வாதம், இந்த உள் விசாரணை குழு அரசியலமைப்புக்கு எதிரானது, நாடாளுமன்றத்துக்கு மட்டுமே நீதிபதிகளை பதவி நீக்கம் செய்ய உரிமை இருக்குனு சொன்னார். 

ஆனா, இன்னைகு தீர்ப்பு வழங்கிய உச்ச நீதிமன்ற நீதிபதிகள் தீபங்கர் தத்தாவும், ஏ.ஜி. மாசிஹும், “இந்த உள் விசாரணை குழு அமைப்பு சட்டவிரோதம் இல்லை. தலைமை நீதிபதி குடியரசுத் தலைவர், பிரதமருக்கு கடிதம் அனுப்பியதும் அரசியலமைப்புக்கு எதிரானது இல்லை”னு தீர்ப்பளிச்சாங்க. மேலும், “எதிர்காலத்தில் தேவைப்பட்டா நடவடிக்கைகளுக்கு சில கருத்துகளை சொல்லியிருக்கோம்”னு கூறி, வர்மாவோட மனுவை தள்ளுபடி செஞ்சுட்டாங்க.

இந்த தீர்ப்பு, நீதிபதி வர்மாவுக்கு பெரிய பின்னடைவை உருவாக்கியிருக்கு. இப்போ நாடாளுமன்றத்தில் 152 எம்.பி.க்கள் கையெழுத்திட்டு, அவரை பதவி நீக்கம் செய்ய முன்மொழிஞ்சிருக்காங்க. இந்த விவகாரம், இந்திய நீதித்துறையில் ஒரு முக்கியமான விவாதத்தை உருவாக்கியிருக்கு. நீதிபதிகளோட நடத்தையை கண்காணிக்க உள் விசாரணை குழு தேவையா, இல்லை அது அரசியலமைப்புக்கு எதிரானதா?னு கேள்விகள் எழுந்திருக்கு. 

வர்மா, “இந்த பணம் என்னுடையது இல்லை, இது என்னை குறிவச்சு நடந்த சதி”னு சொன்னாலும், குழு அறிக்கையில் அவரால பணத்துக்கு விளக்கம் கொடுக்க முடியலனு குறிப்பிடப்பட்டிருக்கு. இந்த தீர்ப்பு, இந்திய நீதித்துறையின் வெளிப்படைத்தன்மை மற்றும் பொறுப்புக்கூறல் பற்றிய விவாதங்களை மேலும் தீவிரப்படுத்தலாம்.

இதையும் படிங்க: முடிச்சு வுட்டீங்க போங்க!! நீதிபதி சீட்டு கிழியுறது கன்பார்ம்! சபாநாயகரிடம் எம்.பிக்கள் லெட்டர்..!