பீஹார் சட்டசபை தேர்தலில் மொத்தம் 243 தொகுதிகளில் 242 இடங்களில் தனித்து போட்டியிட்டு படுதோல்வியடைந்த ஜன் சுராஜ் கட்சியின் தலைவர் பிரசாந்த் கிஷோர்க்கு உச்சநீதிமன்றம் கடுமையான அறிவுரை வழங்கியுள்ளது. “தேர்தலில் தோல்வியடைந்த பிறகு வெறும் விளம்பரத்துக்காக நீதிமன்றங்களைப் பயன்படுத்தக்கூடாது” என்று நீதிபதிகள் காட்டமாகக் கூறியுள்ளனர்.

கடந்தாண்டு நடந்த பீஹார் சட்டசபை தேர்தலில் ஜன் சுராஜ் கட்சி 242 தொகுதிகளில் போட்டியிட்டது. ஆனால் ஒரு இடத்தில் கூட வெற்றி பெற முடியவில்லை. 238 தொகுதிகளில் டெபாசிட் இழந்தது. இதனால் அதிருப்தியடைந்த பிரசாந்த் கிஷோர், தேர்தல் நடத்தை விதிகள் மீறப்பட்டதாகக் கூறி உச்சநீதிமன்றத்தில் வழக்கு தொடர்ந்தார்.

அவரது மனுவில், தேர்தல் அறிவிப்புக்கு சற்று முன்பு ஆளும் கட்சி பெண்களுக்கு மாதம் 10,000 ரூபாய் வழங்குவதாக அறிவித்தது தேர்தல் விதிகளுக்கு எதிரானது என்றும், இது வாக்காளர்களை ஈர்க்கும் வகையில் செய்யப்பட்டது என்றும் குற்றம்சாட்டப்பட்டது. இந்த மனு தலைமை நீதிபதி சூர்யா காந்த் மற்றும் நீதிபதி ஜோய்மால்யா பாக்சி ஆகியோர் அடங்கிய அமர்வு முன்பு விசாரணைக்கு வந்தது.

இதையும் படிங்க: ரஷ்யாவை கழட்டிவிட்டு வெனிசுலாவிடம் ஐக்கியம்! இந்தியாவின் உள்ளே வெளியே கேம்! ட்ரம்ப் அழுத்தமா?

நீதிபதிகள் கேட்ட கேள்விகள் அதிர்ச்சி அளித்தன: “உங்கள் கட்சி எத்தனை ஓட்டுகள் பெற்றது? தேர்தலில் தோல்வியடைந்தவர்கள் உடனடியாக நீதிமன்றத்துக்கு ஏன் வருகிறார்கள்? வாக்காளர்களால் நிராகரிக்கப்பட்டவர்கள் விளம்பரம் தேடுவதற்காக நீதித்துறையை கருவியாக பயன்படுத்தக்கூடாது.”

மேலும் அவர்கள் கூறியது: “தேர்தலுக்காக இலவசப் பொருட்கள் வழங்குவது தொடர்பாக நாங்கள் தீவிரமாக ஆராய்ந்து வருகிறோம். ஆனால் எல்லாவற்றையும் இழந்த ஒரு கட்சி தாக்கல் செய்த இந்த வழக்கை விசாரிக்க நாங்கள் விரும்பவில்லை. இன்று வழக்கு போடும் இந்த கட்சி நாளை ஆட்சிக்கு வந்தால் அதுவும் இதே காரியத்தைச் செய்யும்.”

நீதிபதிகளின் இந்த கடுமையான கருத்து அரசியல் வட்டாரத்தில் பெரும் பரபரப்பை ஏற்படுத்தியுள்ளது. பிரசாந்த் கிஷோரின் ஜன் சுராஜ் கட்சி தேர்தலில் பெற்ற மிகக் குறைந்த வாக்கு வீதம் மற்றும் டெபாசிட் இழப்பு ஆகியவை இந்த வழக்கின் பின்னணியில் உள்ளன. தேர்தல் தோல்வியை ஏற்றுக்கொள்ளாமல் நீதிமன்றத்தை அணுகியது தவறான முன்னுதாரணம் என்று நீதிமன்றம் விமர்சித்துள்ளது.

இலவச வாக்குறுதிகள் தேர்தல் நடத்தை விதிகளை மீறுகின்றனவா என்பது குறித்து உச்சநீதிமன்றம் தனியாக ஆராய்ந்து வருவதாகவும் தெரிவிக்கப்பட்டுள்ளது. இந்த சம்பவம் எதிர்காலத்தில் அரசியல் கட்சிகள் நீதிமன்றத்தை அணுகுவதற்கு புதிய அணுகுமுறையை ஏற்படுத்தலாம் என்று அரசியல் வல்லுநர்கள் கருதுகின்றனர்.

இதையும் படிங்க: ஐரோப்பாவை ஆட்டம் காண வைத்த 'லியோனார்டோ' புயல்..!! சிக்கித்தவிக்கும் மக்கள்..!!