தமிழக முதலமைச்சர் விஜய் இன்று சென்னையிலிருந்து தனி விமானம் மூலம் ஆந்திரப் பிரதேசத்திற்கு அரசு முறைப் பயணம் மேற்கொண்டார். மதியம் தனது நீலாங்கரை இல்லத்திலிருந்து புறப்பட்ட அவர் சென்னை விமான நிலையத்திலிருந்து புறப்பட்டு மாலை நான்கு மணியளவில் விஜயவாடா அருகே உள்ள கண்ணாவரம் விமான நிலையத்தை வந்தடைந்தார். அங்கு சிறப்பு வரவேற்பு அளிக்கப்பட்ட பின்னர் சாலை மார்க்கமாக கிருஷ்ணா ஆற்றின் கரையில் இந்திரகீலாத்ரி மலையில் அமைந்துள்ள புகழ்பெற்ற கனகதுர்கா அம்மன் கோயிலுக்குச் சென்றார்.

நவராத்திரி விழா காலத்தில் நடைபெறும் சிறப்பு பூஜைகளின் போது முதலமைச்சர் விஜய் அம்மனைத் தரிசித்து வழிபாடு செய்தார். இந்தக் கோயில் சுயம்புவாகத் தோன்றிய சக்தி தலமாகக் கருதப்படுகிறது. வழிபாட்டை முடித்த பின்னர் அவர் ஆந்திர முதலமைச்சர் சந்திரபாபு நாயுடுவைச் சந்திக்கும் நிகழ்ச்சிக்குச் செல்கிறார்.

இந்தச் சந்திப்பில் இரு மாநிலங்களுக்கும் இடையிலான நதிநீர் பங்கீடு, தெலுங்கு கங்கை திட்டத்தின் கீழ் கிருஷ்ணா நதிநீர் சென்னைக்கு வழங்குதல், கோதாவரி-கிருஷ்ணா-காவிரி நதிகள் இணைப்புத் திட்டம் உள்ளிட்ட முக்கிய விஷயங்கள் குறித்து ஆலோசனை நடைபெறும் என தெரிகிறது. முதலமைச்சர் விஜய் பதவியேற்ற பிறகு ஆந்திர முதலமைச்சரை நேரில் சந்திக்கும் முதல் வாய்ப்பாக இந்தப் பயணம் அமைந்தது.

இதையும் படிங்க: மஹாளய அமாவாசை..! முன்னோர்களுக்கு தர்ப்பணம் கொடுத்து வழிபட்ட மக்கள்..!

இரு மாநிலங்களுக்கும் இடையிலான நல்லுறவை மேம்படுத்தவும், நீர்வளப் பிரச்சினைகளைத் தீர்க்கவும் இந்தச் சந்திப்பு முக்கியத்துவம் பெற்றது. ஆந்திர துணை முதலமைச்சர் பவன் கல்யாணையும் சந்திக்க வாய்ப்புள்ளதாகக் கூறப்பட்டது. பயணம் முடிந்த பிறகு இரவில் தனி விமானம் மூலம் மீண்டும் சென்னை திரும்பினார் முதலமைச்சர் விஜய். இந்தப் பயணம் இரு மாநில அரசுகளுக்கும் இடையிலான ஒத்துழைப்பை வலுப்படுத்தும் முயற்சியாகப் பார்க்கப்படுகிறது.

இதையும் படிங்க: குட் நியூஸ்..! ஆசிரியர் சிறப்பு தகுதி தேர்வு முடிவுகளுக்கு கிரீன் சிக்னல்.. இடைக்கால தடையை நீக்கி ஹை கோர்ட் உத்தரவு..!!