மதுரை மாவட்டம் திருமங்கலத்தில் தமிழ்நாடு விவசாயிகள் சங்கத்தின் மாநில நிர்வாகக்குழு மற்றும் மாவட்டச் செயலாளர்கள் கூட்டு ஆலோசனைக் கூட்டம் நடைபெற்றது.
இக்கூட்டத்திற்கு மாநில துணைத் தலைவர் முன்னாள் எம்.எல்.ஏ. உலகநாதன் தலைமை தாங்கினார். எதிர்கால கடமைகள் குறித்து மாநில பொதுச் செயலாளர் மாசிலாமணி சிறப்புரை ஆற்றினார். இதில் தமிழகம் முழுவதும் இருந்து மாநில, மாவட்ட நிர்வாகக் குழு உறுப்பினர்கள் கலந்து கொண்டனர். கூட்டத்தில் பல்வேறு தீர்மானங்கள் நிறைவேற்றப்பட்டன.
தொடர்ந்து செய்தியாளர்களிடம் தமிழ்நாடு விவசாயிகள் சங்கத்தின் மாநில பொதுச் செயலாளர் மாசிலாமணி கூறியதாவது: தமிழ்நாடு விவசாயிகள் சங்கத்தின் மாநில நிர்வாகக் குழு மற்றும் மாவட்ட செயலாளர்கள் கொண்ட கூட்டுக் கூட்டம் இன்று திருமங்கலத்தில் நடைபெற்றது. இதில் இன்றைய தமிழக வேளாண் நிலைகள் குறித்து ஆய்வு செய்து பல்வேறு தீர்மானங்கள் எடுத்துள்ளோம்.
வருகிற 21-ம் தேதி தமிழ்நாடு முழுவதும் 500-க்கும் மேற்பட்ட இடங்களில் விவசாயிகள் பிரச்சனை, பொதுமக்கள் மற்றும் விவசாய தொழிலாளர்கள் பாதுகாப்புக்காக சாலை மறியல் போராட்டம் நடத்த தமிழ்நாடு விவசாய சங்கங்கள் இரண்டு சங்கங்கள் மற்றும் அகில இந்திய விவசாயிகள் மகாசபை ஆகிய மூன்று அமைப்புகளும் இணைந்து முடிவு செய்துள்ளோம்.
இதையும் படிங்க: அக்டோபர் 22ம் தேதி வரை டைம்... தவெக அரசுக்கு கெடு விதித்த விவசாயிகள்... கோட்டையை கிடுநடுங்க வைக்க திட்டம்..!
மேட்டூர் அணை நீர் விவகாரம்: மேட்டூர் அணையில் போதிய அளவு தண்ணீர் இல்லை என்று தெரிந்தும், விவசாயிகளின் கருத்தறியாமல் செப்டம்பர் 1-ம் தேதி முதலமைச்சர் தண்ணீரை திறந்து விட்டார். இருந்த தண்ணீர் குடிநீருக்கும், நிலத்தடி நீருக்கும் பயன்பட்டிருக்க வேண்டும். ஆனால் தேவைக்கு மேல் தண்ணீரை திறந்து விட்டதால் கிட்டத்தட்ட 15 TMC தண்ணீர் விரயமாகியுள்ளது.
டெல்டாவில் சாகுபடி செய்த விவசாயிகளுக்கு தண்ணீர் இல்லாமல் பயிர் காய்ந்து கருகி வருகிறது. ஆனால் மேட்டூர் அணையில் தண்ணீர் இல்லை என்ற உண்மையை கூட சொல்ல அரசாங்கம் தயாராக இல்லை.
பழைய கடன் தள்ளுபடி செய்தால் தான் புதிய கடன் கிடைக்கும் என்பது நியதி. தேர்தல் வாக்குறுதியில் சிறு, குறு விவசாயிகளுக்கு முழு தள்ளுபடி, இதர விவசாயிகளுக்கு 50 சதவீத தள்ளுபடி என அறிவித்தார்கள். அந்த நம்பிக்கையில் விவசாயிகள் இருந்தனர். ஆனால் முதற்கட்ட அறிவிப்பு மிகப்பெரிய ஏமாற்றம்.
தவணை முறையில் தள்ளுபடி என விவசாயிகளை கேலி செய்யும் வகையில் உள்ளது. ஆதவ் அர்ஜுனா அவர்கள் எங்களிடம் தேர்தல் நடத்தை விதிமுறை முடிந்த பிறகு எதிர்பார்க்கிற அளவுக்கு கடன் தள்ளுபடி கிடைக்கும் என வாக்குறுதி தந்துள்ளார். அந்த காலம் 21-ம் தேதியுடன் முடிகிறது. அதற்குள் அறிவித்தபடி கடன் தள்ளுபடியை அறிவிக்க வேண்டும்.
அதேபோல் நிபந்தனையில்லாமல் அனைத்து விவசாயிகளுக்கும் புதிய கடன் வழங்க வேண்டும்.
வறட்சியால் பாதிக்கப்பட்ட விவசாயிகளுக்கு ஏக்கருக்கு ரூ.35,000 நிவாரணம் வழங்க வேண்டும். வேலையின்றி இருக்கும் விவசாய தொழிலாளர்களுக்கும் நிவாரணம் வழங்க வேண்டும்.
இது தென் மாவட்டங்களின் நீண்ட நெடிய கனவு திட்டம். முந்தைய திமுக அரசு எதையும் செய்யவில்லை. தற்போதைய அரசு ரூ.143 கோடி ஒதுக்கியுள்ளதை வரவேற்கிறோம். ஆனால் இத்திட்டத்திற்கு கிட்டத்தட்ட ரூ.42,000 கோடி தேவை. எனவே உரிய நிதி ஒதுக்கி திட்டத்தை நிறைவேற்ற வேண்டும். கோதாவரி - காவிரி இணைப்பிற்காக முதலமைச்சர் நாளை ஆந்திர முதல்வரை சந்திக்க செல்வதை வரவேற்கிறோம், அதை விட வைகை - குண்டாறு இணைப்பு தான் முக்கியம்.
மேலும் தமிழக முதல்வர் அனைத்து சங்கங்களையும், கட்சிகளையும் கூட்டி, கர்நாடகா எழுப்புகிற மேகதாது அணைக்கு எதிராகவும், காவிரி தீர்ப்பை மாற்றக் கோருவதை எதிர்த்தும் உச்சநீதிமன்றத்தில் மறுசீராய்வு மனு தாக்கல் செய்ய வேண்டும் என தெரிவித்தார்.
இதையும் படிங்க: அம்போன்னு நிற்கும் 5,000 ஏக்கர் சம்பா... விஜய் அரசுக்கு சவால் விட்ட விவசாயிகள்... திருத்துறைப்பூண்டி உச்சக்கட்ட பரபரப்பு...!