திருப்பூர் மாவட்டம் வெள்ளக்கோவில் பகுதியில் உள்ள அரசு ஆரம்பப் பள்ளிகளில் நிலவுவதாகக் கூறப்படும் சாதிய பாகுபாடு மற்றும் தீண்டாமை நடைமுறைகள் குறித்து விசாரணை நடத்தி உரிய நடவடிக்கை எடுக்க வேண்டும் என தலித் விடுதலை இயக்கத்தின் மாநிலத் தலைவர் கருப்பையா வலியுறுத்தியுள்ளார். இதுதொடர்பாக தாராபுரம் ஐந்து சாலை சந்திப்பு அருகே அமைந்துள்ள மாவட்ட தொடக்கக் கல்வி அலுவலகத்தில் நேர்முக உதவியாளர் கீதாவிடம் புகார் மனு அளிக்கப்பட்டது.

 இதனைத் தொடர்ந்து செய்தியாளர்களைச் சந்தித்த தலித் விடுதலை இயக்கத்தின் மாநிலத் தலைவர் கருப்பையா, கூறுகையில் ;- வெள்ளக்கோவில் பகுதியில் உள்ள அரசு ஆரம்பப் பள்ளிகளில் ஆசிரியர்கள் மத்தியில் சாதிய மனநிலையும் தீண்டாமை நடைமுறைகளும் நிலவுவதாகக் குற்றம்சாட்டினார்.

மேலும், பள்ளிகளில்  மாணவர்களைக் கொண்டு தூய்மைப் பணிகளை மேற்கொள்ளச் செய்வதாகவும், குறிப்பாக பட்டியலின மாணவர்களைத் தனியாகக் குறிவைத்து இத்தகைய பணிகளைச் செய்ய வற்புறுத்துவதாகவும் அவர் தெரிவித்தார். 

இதையும் படிங்க: “சாதி பார்த்து தான் ரத்தம் எடுப்பீங்களா?”... அரசு கல்லூரி ரத்த தான முகாமில் மத்திய அரசு அமைப்பு செய்த மட்டமான காரியம்...!

இந்தப் பிரச்சினை கடந்த இரண்டு ஆண்டுகளாக நிலவி வருவதாகவும், இதுகுறித்து கடந்த ஆண்டு சமூக ஆர்வலர்கள் புகார் அளித்தும் பள்ளிக் கல்வித்துறை உரிய நடவடிக்கை எடுக்கவில்லை என்றும் அவர் கூறினார்.

தற்போது தலித் விடுதலை இயக்கம் இப்பிரச்சினையை முன்னெடுத்து புகார் மனு அளித்துள்ளதாகக் குறிப்பிட்ட அவர், பள்ளிக் கல்வித்துறை உரிய விசாரணை நடத்தி நடவடிக்கை எடுக்கும் என நம்புவதாகத் தெரிவித்தார்.

வெள்ளக்கோவில் அரசு ஆரம்பப் பள்ளியில் பணியாற்றும் தலைமை ஆசிரியர் சாந்தியை நிரந்தரப் பணிநீக்கம் செய்ய வேண்டும் என்றும், அவர் மீது எஸ்சி/எஸ்டி வன்கொடுமைகள் தடுப்புச் சட்டத்தின்கீழ் வழக்குப் பதிவு செய்ய வேண்டும் என்றும் கருப்பையா வலியுறுத்தினார்.

மேலும், வெள்ளக்கோவில் பகுதியில் செயல்பட்டு வரும் அனைத்து அரசு ஆரம்பப் பள்ளிகளிலும் அதிகாரிகள் நேரடியாக ஆய்வு செய்து, மாணவர்களிடையே சாதிய பாகுபாடு மற்றும் தீண்டாமை நடைமுறைகள் உள்ளனவா என்பதைக் கண்டறிய வேண்டும் என்றும் கோரிக்கை விடுத்தார்.

இந்தப் புகார் தொடர்பாக வட்டார மற்றும் மாவட்ட தொடக்கக் கல்வித்துறை அதிகாரிகள் உரிய நடவடிக்கை எடுக்கத் தவறினால், வரும் 30-ஆம் தேதி தலித் விடுதலை இயக்கத்தின் தலைமையில் பல்வேறு ஜனநாயக அமைப்புகளை ஒருங்கிணைத்து தொடர் காத்திருப்புப் போராட்டம் நடத்தப்படும் என்றும் கருப்பையா தெரிவித்தார்.

மாணவர்களின் கல்வி உரிமை, சமத்துவம் மற்றும் பாதுகாப்பை உறுதி செய்யும் வகையில் பள்ளிக் கல்வித்துறை உடனடியாக விசாரணை நடத்தி உரிய நடவடிக்கை எடுக்க வேண்டும் என அவர் கேட்டுக்கொண்டார்.

இதையும் படிங்க: சாதிப் பெயர்களை நீக்கும் அரசாணை.. தடை விதிக்க முடியாது..! வழக்கை தள்ளுபடி செய்து கோர்ட் உத்தரவு..!!