மேற்கு வங்காள சட்டசபையின் பதவிக்காலம் மே 7-ம் தேதியுடன் நிறைவடையும் நிலையில், மாநிலத்தின் 294 தொகுதிகளுக்கான சட்டசபைத் தேர்தல் இரு கட்டங்களாக நடைபெறுகிறது. இந்திய தலைமைத் தேர்தல் ஆணையம் அறிவித்தபடி, இன்று (ஏப்ரல் 23) முதல் கட்டமாக 152 தொகுதிகளில் வாக்குப்பதிவு காலை 7 மணிக்கு தொடங்கியது. இரண்டாவது கட்டம் ஏப்ரல் 29-ம் தேதி 142 தொகுதிகளில் நடைபெறும். அனைத்து வாக்குகளும் மே 4-ம் தேதி எண்ணப்பட்டு முடிவுகள் அறிவிக்கப்படும்.

தேர்தலை முன்னிட்டு அரசியல் கட்சிகள் கூட்டணி பேச்சுவார்த்தைகள், தொகுதி பங்கீடு, வேட்பாளர் தேர்வு மற்றும் தேர்தல் அறிக்கை தயாரிப்பு உள்ளிட்ட பணிகளை முழுமையாக முடித்தன. ஆளும் திரிணாமுல் காங்கிரஸ் (TMC) ஆட்சியைத் தக்கவைக்கும் முயற்சியில் தீவிரமாக ஈடுபட்டுள்ளது. முதலமைச்சர் மம்தா பானர்ஜி தலைமையில் கட்சி தொண்டர்கள் மற்றும் தலைவர்கள் வாக்காளர்களை நேரடியாகச் சந்தித்து வாக்கு சேகரிப்பில் ஈடுபட்டனர்.

எதிர்க்கட்சியான பாரதிய ஜனதா கட்சி (BJP) ஆட்சியைக் கைப்பற்றும் இலக்குடன் தீவிர பிரசாரத்தில் ஈடுபட்டது. மாநில பாஜக தலைவர்கள் உள்ளிட்ட முக்கிய பிரமுகர்கள் கடும் வெயிலையும் பொருட்படுத்தாமல் பொதுமக்களைச் சந்தித்து தங்கள் கொள்கைகளை விளக்கினர். இரு கட்சிகளுக்கும் இடையே பலத்த போட்டி நிலவுவதால், தேர்தல் பிரசாரம் அனல் பறக்கும் வகையில் இருந்தது.

இதையும் படிங்க: மேற்கு வங்கத்தில் தயாரிக்கப்படும் LPG சிலிண்டர்கள்.. வெளி மாநிலங்களுக்கு அனுப்பக்கூடாது..!! அதிரடி காட்டிய மம்தா பானர்ஜி..!!

பிரசாரம் ஏப்ரல் 21-ம் தேதி மாலை 6 மணியுடன் முடிவுக்கு வந்தது.வாக்குப்பதிவுக்கு முன்னதாக, நேற்று வாக்குச்சாவடி மையங்களுக்கு வாக்குப்பதிவு இயந்திரங்கள் (EVM) மற்றும் தேவையான பொருட்கள் பலத்த போலீஸ் பாதுகாப்புடன் அனுப்பி வைக்கப்பட்டன. இன்று காலை மாதிரி வாக்குப்பதிவு நடைபெற்ற பின்னர், உண்மையான வாக்குப்பதிவு தொடங்கியது. பல இடங்களில் வாக்காளர்கள் அதிகாலையிலேயே வரிசையில் நின்று ஆர்வத்துடன் வாக்களித்து வருகின்றனர். 

மொத்தம் 2450க்கும் மேற்பட்ட மத்திய படைப்பிரிவுகள் பாதுகாப்புப் பணியில் ஈடுபடுத்தப்பட்டுள்ளன. சுமார் 8000க்கும் மேற்பட்ட வாக்குச்சாவடிகள் ‘மிகவும் உணர்வுப்பூர்வமானவை’ என அடையாளம் காணப்பட்டு கூடுதல் பாதுகாப்பு ஏற்பாடுகள் செய்யப்பட்டுள்ளன.தேர்தல் நடத்தை விதிகளை மீறும் முயற்சிகளைத் தடுக்கும் வகையில், பறக்கும் படைகள் மற்றும் கண்காணிப்புக் குழுக்கள் தீவிர சோதனையில் ஈடுபட்டன. இதுவரை மேற்கு வங்காளத்தில் ஆவணங்கள் இன்றி கொண்டு செல்லப்பட்ட ரூ.472.89 கோடி மதிப்பிலான பணம், நகைகள் உள்ளிட்ட பொருட்கள் பறிமுதல் செய்யப்பட்டுள்ளன.

தமிழ்நாட்டுடன் சேர்த்து இரு மாநிலங்களிலும் தேர்தல் தொடர்பான பறிமுதல்கள் ரூ.1,000 கோடியைத் தாண்டியுள்ளன. இதில் பணம், மது, போதைப்பொருள், விலைமதிப்பான உலோகங்கள் மற்றும் இலவச பொருட்கள் அடங்கும்.இந்தத் தேர்தல் மம்தா பானர்ஜியின் திரிணாமுல் காங்கிரஸுக்கு நான்காவது முறையாக ஆட்சியைத் தக்கவைக்கும் சோதனையாக அமைந்துள்ளது.

பாஜகவோ, 2021 தேர்தலில் கணிசமான இடங்களைப் பெற்ற பின்னணியில், இம்முறை வலுவான போட்டியை வழங்கும் என எதிர்பார்க்கப்படுகிறது. வாக்காளர்கள் அதிக எண்ணிக்கையில் பங்கேற்று, ஜனநாயகத்தை வலுப்படுத்த வேண்டும் என தேர்தல் ஆணையம் வலியுறுத்தியுள்ளது. வாக்குப்பதிவு அமைதியான முறையில் நடைபெறுவதற்கான அனைத்து ஏற்பாடுகளும் செய்யப்பட்டுள்ளன.

இதையும் படிங்க: இந்த முறை நோட்டாவுக்கு டாடா தான்!! நோட்டா ஓட்டு கண்டிப்பா குறையும்!! நிபுணர்கள் கருத்து!