தமிழ்நாட்டில் இன்று (ஏப்ரல் 23, 2026) சட்டமன்றத் தேர்தலுக்கான வாக்குப்பதிவு காலை 7 மணிக்கு தொடங்கி முழு உற்சாகத்துடன் நடைபெற்று வருகிறது. மாநிலம் முழுவதும் உள்ள 234 தொகுதிகளிலும் 5.73 கோடி வாக்காளர்கள் தங்களது ஜனநாயகக் கடமையை ஆற்ற வரிசையில் நின்று கொண்டிருக்கின்றனர். 

காலை 9 மணி நிலவரப்படி தமிழகம் முழுவதும் சராசரியாக 17.69 சதவீத வாக்குப்பதிவு பதிவாகியுள்ளது. இதில் ஆண் வாக்காளர்கள் 2.80 கோடி, பெண் வாக்காளர்கள் 2.93 கோடி மற்றும் மூன்றாம் பாலினத்தவர் 7,728 பேர் அடங்குவர். முதல் முறை வாக்காளர்களின் எண்ணிக்கை 14.5 லட்சம் ஆகும். மொத்தம் 33,133 இடங்களில் 75,064 வாக்குச்சாவடிகள் அமைக்கப்பட்டுள்ளன. 1.06 லட்சம் மின்னணு வாக்குப்பதிவு இயந்திரங்கள் பயன்படுத்தப்படுகின்றன. 

மாவட்ட வாரியாக பார்க்கும்போது, கோவையில் 18.02%, திருச்சியில் 18%, நாகையில் 17.51%, மதுரையில் 17.32%, செங்கல்பட்டில் 17%, திருநெல்வேலியில் 15.9%, அரியலூரில் 16% மற்றும் கடலூரில் 14.82% வாக்குப்பதிவு பதிவாகியுள்ளது. வெயில் அதிகமாக இருந்தாலும், அதிகாலையிலேயே பலர் வரிசையில் நின்று வாக்களித்து வருகின்றனர்.

இதையும் படிங்க: இளைஞர்களை கவர நீங்கள்தான் கரெக்ட்!! மகன்/ மகள்களை பிரசாரத்தில் இறக்கிய தலைவர்கள்!

இந்தத் தேர்தலில் தி.மு.க., அ.தி.மு.க., தமிழக வெற்றிக் கழகம் (த.வெ.க.), நாம் தமிழர் கட்சி என நான்குமுனைப் போட்டி உருவாகியுள்ளது. தி.மு.க. தலைமையில் காங்கிரஸ், தே.மு.தி.க., வி.சி.க. உள்ளிட்ட 22 கட்சிகள் இணைந்து மெகா கூட்டணியை அமைத்துள்ளன. அ.தி.மு.க. தரப்பில் பா.ஜ.க., பா.ம.க., அ.ம.மு.க. உள்ளிட்ட 12 கட்சிகள் இணைந்து வலுவான கூட்டணியை உருவாக்கியுள்ளன.

முதல்வர் வேட்பாளர்களான மு.க. ஸ்டாலின் கொளத்தூர் தொகுதியிலும், எடப்பாடி பழனிசாமி எடப்பாடி தொகுதியிலும், த.வெ.க. தலைவர் நடிகர் விஜய் திருச்சி கிழக்கு மற்றும் பெரம்பூர் தொகுதிகளிலும், நாம் தமிழர் கட்சி ஒருங்கிணைப்பாளர் சீமான் காரைக்குடி தொகுதியிலும் களத்தில் உள்ளனர். இந்த விஐபி தொகுதிகளில் பலத்த பாதுகாப்பு ஏற்பாடுகள் செய்யப்பட்டுள்ளன.

மொத்தம் 4,023 வேட்பாளர்கள் இந்தத் தேர்தலில் போட்டியிடுகின்றனர். வாக்குப்பதிவு மாலை 6 மணி வரை நடைபெறும். இன்றைய வாக்குப்பதிவு சதவீதம் எப்படி இருக்கும் என்பதை மக்கள் ஆவலுடன் எதிர்பார்த்துள்ளனர். 

தேர்தல் ஆணையம் அனைத்து வாக்குச்சாவடிகளிலும் பாதுகாப்பு மற்றும் வசதிகளை உறுதி செய்துள்ளது. வாக்காளர்கள் அடையாள ஆவணங்களுடன் சரியான நேரத்தில் வருகை தருமாறு அறிவுறுத்தப்பட்டுள்ளது. 

இதையும் படிங்க: பறக்கும் படைக்கிட்ட சிக்காம பணப்பட்டுவாடா செய்வது எப்படி? அரசியல் மகளிருக்கு ஸ்பெஷல் டிரெய்னிங் !!