வங்கதேசத்தில் கடந்த ஆண்டு (2024) மாணவர் போராட்டம் தீவிரமடைந்து அரசுக்கு எதிரான கலவரமாக மாறியது. அப்போதைய பிரதமர் ஷேக் ஹசீனா பதவியை ராஜினாமா செய்துவிட்டு நாட்டை விட்டு தப்பி இந்தியாவில் தஞ்சம் புகுந்தார். இந்நிலையில், ஹசீனாவை ஒப்படைக்க வேண்டும் என்று இடைக்கால அரசு தொடர்ந்து இந்தியாவிடம் கோரிக்கை விடுத்து வருகிறது.

மாணவர் போராட்டத்தை முன்னின்று நடத்திய முக்கிய தலைவர்களில் ஒருவரான ஷெரீப் ஒஸ்மான் ஹாடி கடந்த டிசம்பர் மாதம் சுட்டுக்கொல்லப்பட்டார். இந்த சம்பவத்தைத் தொடர்ந்து வங்கதேசத்தில் மீண்டும் பெரும் கலவரங்கள் வெடித்தன. குறிப்பாக இந்தியர்கள் மற்றும் இந்து சமூகத்தினர் குறிவைத்து தாக்கப்படும் சம்பவங்கள் அதிகரித்துள்ளன.

கடந்த 4 வாரங்களில் மட்டும் வங்கதேசத்தில் 11 இந்துக்கள் கொல்லப்பட்டுள்ளனர் என்று தகவல்கள் தெரிவிக்கின்றன. இதில் முதலில் ஜவுளி ஆலையில் பணியாற்றிய இந்து இளைஞர் தீபு சந்திர தாஸ் அடித்துக் கொல்லப்பட்டு, அவரது உடல் தீவைத்து எரிக்கப்பட்டது. அதன் தொடர்ச்சியாக சில இந்துக்கள் கொடூரமாக தாக்கப்பட்டு கொல்லப்பட்டனர்.

இதையும் படிங்க: இந்துக்களை விரட்டி வேட்டையாடும் கும்பல்!! வங்கதேசத்தில் மேலும் ஒரு இளைஞர் பலி!! அதிர்ச்சியூட்டம் சம்பவம்!

டிசம்பர் 31-ஆம் தேதி ஷரியத் பூர் மாவட்டத்தில் மருந்து கடை மற்றும் மணி டிரான்ஸ்பர் தொழில் செய்த தொழிலதிபர் கோகன் தாஸ் மிகக் கொடூரமாக தாக்கப்பட்டு தீவைத்து எரிக்கப்பட்டார். உயிர் தப்ப அவர் நீரோடையில் குதித்தார். இரண்டு நாட்கள் தீவிர சிகிச்சைக்குப் பிறகு அவர் பரிதாபமாக உயிரிழந்தார்.

அதன் பிறகு மிதுன் சர்க்கார் என்ற இந்து இளைஞர் மர்ம கும்பலால் தாக்கப்பட்டு விரட்டப்பட்டார். அவர்களிடமிருந்து தப்ப கால்வாயில் குதித்த அவர் பரிதாபமாக உயிரிழந்தார். அவரது உடலை போலீசார் மீட்டனர்.

இந்தப் பரபரப்பு அடங்குவதற்குள் இன்னொரு சோக சம்பவம் நடந்துள்ளது. சுனாம்கன்ஜ் மாவட்டத்தில் வசித்து வந்த 19 வயது இந்து இளைஞர் ஜாய் மஹாபாத்ரா கொடூர தாக்குதலுக்குப் பிறகு விஷம் குடித்து உயிரிழந்தார்.

படிப்பை முடித்துவிட்டு வேலை தேடி வந்த ஜாய், இந்திய ரூபாய் மதிப்பில் சுமார் 4,000 ரூபாய்க்கு ஒரு மொபைல் போனை அந்தப் பகுதியைச் சேர்ந்த கடைக்காரர் அமிருல் இஸ்லாம் அவரிடமிருந்து வாங்கினார். வாரந்தோறும் தவணையாக செலுத்தி வந்தார். கடைசி தவணையான சுமார் 360 ரூபாய் (500 டாகா) சரியாக செலுத்த தாமதமானது.

தாமதத்தைத் தீர்க்க கடைக்குச் சென்ற ஜாயை அமிருல் இஸ்லாமும் அவரது ஆட்களும் கொடூரமாக தாக்கினர். மற்றவர்கள் முன்னிலையில் அவமானப்படுத்தினர். மொபைலை பறித்துக்கொண்டனர். மேலும் விஷம் குடிக்கும்படி மிரட்டியதாகக் கூறப்படுகிறது. இதனால் ஜாய் விஷம் வாங்கி குடித்ததாக தெரிகிறது.

பலத்த காயங்களுடன் வீடு திரும்பிய ஜாய், தான் விஷம் குடித்துவிட்டதாக தாயிடம் கூறிவிட்டு மயங்கி விழுந்தார். உடனடியாக குடும்பத்தினர் அவரை உள்ளூர் மருத்துவமனைக்கு அழைத்துச் சென்றனர். பின்னர் மேல் சிகிச்சைக்காக சில்ஹட் (Sylhet) மருத்துவக் கல்லூரி மருத்துவமனைக்கு மாற்றப்பட்டார். அங்கு அவர் பரிதாபமாக உயிரிழந்தார்.

ஜாயின் தாய் அளித்த புகாரின் பேரில் போலீசார் அமிருல் இஸ்லாம் உள்ளிட்டோரிடம் விசாரணை நடத்தி வருகின்றனர். இந்த சம்பவத்தின் வீடியோ சமூக வலைதளங்களில் வைரலாகி, வங்கதேச இந்துக்களிடையே கடும் கொந்தளிப்பை ஏற்படுத்தியுள்ளது. கடைக்காரர் அமிருல் இஸ்லாம் குற்றச்சாட்டுகளை மறுத்து, “நாங்கள் விஷம் கொடுக்கவில்லை” என்று கூறியுள்ளார்.

இந்த தொடர் சம்பவங்கள் வங்கதேசத்தில் வசிக்கும் இந்து சமூகத்தினரின் பாதுகாப்பு குறித்து பெரும் கவலையை ஏற்படுத்தியுள்ளன. வங்கதேச இந்து மதத் தலைவர்களும், இந்திய அரசியல் தலைவர்களும் இந்துக்களின் பாதுகாப்பை உறுதி செய்ய வேண்டும் என்று வலியுறுத்தி வருகின்றனர். இந்திய வெளியுறவு அமைச்சகமும் இத்தகைய வன்முறைகளை கண்டித்து, நீதி வழங்க வேண்டும் என்று வங்கதேச அரசுக்கு அழுத்தம் கொடுத்து வருகிறது.

இதையும் படிங்க: மற்றொரு இந்து இளைஞர் அடித்து கொலை!! வங்கதேசத்தில் தொடரும் வன்முறை!! பற்றி எரியும் கலவரம்!