வாஷிங்டன்: அமெரிக்க அதிபர் டொனால்ட் டிரம்ப், ரஷியாவிடம் இருந்து கச்சா எண்ணெய் மற்றும் பெட்ரோலிய பொருள்களை வாங்கும் நாடுகளுக்கு கடுமையான தண்டனை விதிக்கும் மசோதாவுக்கு ஆதரவு அளித்துள்ளார். இந்த மசோதா நிறைவேற்றப்பட்டால், அத்தகைய நாடுகளில் இருந்து அமெரிக்காவுக்கு இறக்குமதி செய்யப்படும் பொருள்களுக்கு 500 சதவீதம் வரை இறக்குமதி வரி விதிக்கப்படலாம்.

குடியரசுக் கட்சி செனட்டர் லிண்ட்சே கிரஹாம், அதிபர் டிரம்ப்புடன் நடத்திய சந்திப்புக்குப் பிறகு இந்தத் தகவலை வெளியிட்டார். அவர் தனது எக்ஸ் தளப் பதிவில், “அதிபர் டிரம்ப்புடன் பல்வேறு விவகாரங்கள் குறித்து நடத்திய மிகவும் பயனுள்ள சந்திப்பில், நானும் செனட்டர் ப்ளூமென்டாலும் மாதக்கணக்கில் உழைத்து தயாரித்த இரு கட்சிகளின் ஆதரவு பெற்ற ரஷிய தடை மசோதாவுக்கு அவர் ஒப்புதல் அளித்தார்” என்று குறிப்பிட்டார்.

இந்த மசோதா, ரஷிய அதிபர் புதினின் போர் நடவடிக்கைகளுக்கு நிதியுதவி செய்யும் வகையில் மலிவான ரஷிய எண்ணெயை வாங்கும் நாடுகளை தண்டிக்கும் வகையில் வடிவமைக்கப்பட்டுள்ளது. குறிப்பாக, சீனா, இந்தியா மற்றும் பிரேசில் போன்ற நாடுகளை ரஷிய எண்ணெய் கொள்முதலை நிறுத்த கட்டாயப்படுத்த இது அதிபருக்கு பெரும் அதிகாரம் வழங்கும் என்று செனட்டர் கிரஹாம் தெரிவித்தார்.

இதையும் படிங்க: ட்ரம்பின் வரிவிதிப்பு மிரட்டல் எதிரொலி!! ரஷ்ய எண்ணெய் ஏற்றுமதி வீழ்ச்சி! புடினுக்கு மிகப்பெரிய அடி!

உக்ரைன் போரில் அமைதி பேச்சுவார்த்தைகள் நடக்கும் நேரத்தில் ரஷியா தொடர்ந்து ஆக்கிரமிப்பு நடவடிக்கைகளில் ஈடுபடுவதால், இந்த மசோதா சரியான நேரத்தில் கொண்டுவரப்பட்டுள்ளது என்றும் அவர் கூறினார். அடுத்த வாரமே நாடாளுமன்றத்தில் இரு கட்சிகளின் வலுவான ஆதரவுடன் இந்த மசோதா வாக்கெடுப்புக்கு எடுத்துக்கொள்ளப்படும் என்று எதிர்பார்க்கப்படுகிறது.

ஏற்கனவே, ரஷிய எண்ணெய் வாங்குவதால் இந்தியாவுக்கு அமெரிக்கா கூடுதல் வரி விதித்துள்ள நிலையில், இந்த புதிய மசோதா உலக எரிசக்தி வர்த்தகத்தில் பெரும் தாக்கத்தை ஏற்படுத்தும் என்று அரசியல் நோக்கர்கள் கருதுகின்றனர்.

இதையும் படிங்க: மோடி நல்லவரு தான்!! ஆனா நான் சந்தோஷமா இல்ல! புலம்பலா? மிரட்டலா? ட்ரம்ப் புது ரூட்!