இமயமலைப் பிராந்தியத்தில் நிலவும் கடுமையான மற்றும் தீவிர இயற்கைச் சீற்றங்களைத் துல்லியமாகக் கணித்து, முன்கூட்டியே எச்சரிக்கை விடுப்பதற்காக, நாட்டின் ஏழாவது மண்டல வானிலை ஆய்வு மையத்தை (Regional Meteorological Centre) மத்திய அறிவியல், தொழில்நுட்பம் மற்றும் புவி அறிவியல் துறை அமைச்சர் டாக்டர் ஜிதேந்திர சிங் அவர்கள் ஜம்முவில் இன்று முறைப்படி திறந்து வைத்துள்ளார்.

இப்புதிய அதிநவீன மண்டல வானிலை ஆய்வு மையமானது, ஜம்மு காஷ்மீர், லடாக் மற்றும் இமாச்சலப் பிரதேசம் ஆகிய மூன்று முக்கியப் பகுதிகளுக்கான வானிலை சார்ந்த பிரத்யேக சேவைகளையும், அவசரப் பேரிடர் எச்சரிக்கைகளையும் வழங்கவுள்ளது. குறிப்பாக, இப்பகுதிகளில் வாழும் மக்களுக்கு மாவட்ட அளவிலான தினசரி வானிலை நிலவரங்கள், மலைப்பகுதி வானிலை அறிவிப்புகள் மற்றும் சுற்றுலாப் பயணிகளுக்கான அத்தியாவசிய பாதுகாப்பு அறிவுறுத்தல்களை இந்த மையம் உடனுக்குடன் வழங்கும். மேலும், இப்பிராந்தியத்தை அடிக்கடி அச்சுறுத்தும் பெரு வெள்ளம், திடீர் மேகவெடிப்பு (Cloudburst), பனிச்சரிவு மற்றும் நிலச்சரிவு போன்ற தீவிர இயற்கைச் சீற்றங்கள் குறித்த எச்சரிக்கைகளை முன்கூட்டியே துல்லியமாக வழங்கத் திட்டமிடப்பட்டுள்ளது.

விழாவில் பேசிய மத்திய அமைச்சர் ஜிதேந்திர சிங், கடந்த பத்து ஆண்டுகளில் இப்பகுதியின் வானிலை உள்கட்டமைப்பு பெருமளவு மேம்படுத்தப்பட்டுள்ளது. கடந்த 2014-ஆம் ஆண்டில் இப்பகுதியில் டாப்ளர் வானிலை ரேடார்கள் (Doppler Weather Radars) எதுவும் இல்லாத நிலை இருந்தது. ஆனால், தற்போதைய மோடி அரசின் தீவிர முயற்சியால் நான்கு அதிநவீன ரேடார்கள் பயன்பாட்டில் உள்ளன. மேலும், 'மௌசம்' (Mausam) திட்டத்தின் கீழ் இப்பகுதியில் கூடுதலாக ஐந்து ரேடார்கள் அமைக்கத் திட்டமிடப்பட்டுள்ளது" என்று பெருமிதத்துடன் குறிப்பிட்டார். இந்த புதிய வானிலை மையத்தின் சேவைகள் இமயமலைப் பிராந்தியத்தில் உள்ள லட்சக்கணக்கான விவசாயிகளுக்கும், அமர்நாத் மற்றும் வைஷ்ணோ தேவி உள்ளிட்ட ஆன்மீக யாத்ரிகர்களுக்கும், பேரிடர் மேலாண்மை முகமைகளுக்கும் (NDRF/SDRF) ஒரு மிகப்பெரிய வரப்பிரசாதமாக அமையும் என்பதில் ஐயமில்லை.

இதையும் படிங்க: 18 மாவட்டங்களுக்கு வெளுத்து வாங்கப்போகும் கனமழை! சென்னை வானிலை ஆய்வு மையம் எச்சரிக்கை!

இதையும் படிங்க: தமிழகத்தில் எங்கெங்கு கனமழை வெளுக்கப்போகுது..?? லிஸ்ட்ல உங்க ஊரு இருக்கா..??