மேற்காசியப் போர் தொடங்கி ஒரு மாதத்துக்குள் அமெரிக்கா 16 போர் விமானங்கள் மற்றும் ட்ரோன்களை இழந்துள்ளதாக அதிர்ச்சி தகவல் வெளியாகியுள்ளது. இதில் பெரும்பாலானவை ஈரானின் நேரடித் தாக்குதலால் அல்ல, அமெரிக்காவின் சொந்த தவறுகள் மற்றும் விபத்துகளாலும் நிகழ்ந்துள்ளன என்பது குறிப்பிடத்தக்கது.
ஈரான் மீது அமெரிக்கா-இஸ்ரேல் இணைந்து பிப்ரவரி 28 அன்று தாக்குதலைத் தொடங்கியதிலிருந்து, ஈரான் தொடர் பதிலடி கொடுத்து வருகிறது. இந்த ஒரு மாத காலத்தில் அமெரிக்கா மொத்தம் 12 எம்.க்யூ.-9 ரக ட்ரோன்களை இழந்துள்ளது. இதில் 9 ட்ரோன்கள் ஈரான் ஏவுகணை தாக்குதலில் அழிக்கப்பட்டன. மீதமுள்ள 3 ட்ரோன்கள் விபத்து மற்றும் தரைவழித் தாக்குதலால் அழிந்தன.
குவைத் வான்வெளியில் ஈரான் ஏவுகணைகளை இடைமறிக்க முயன்றபோது, குவைத் வான் பாதுகாப்பு அமைப்பு தவறுதலாக 3 எப்-15 ரக போர் விமானங்களை சுட்டு வீழ்த்தியது. அதிர்ஷ்டவசமாக விமானிகள் பத்திரமாக பாராசூட் மூலம் தப்பினர்.
இதையும் படிங்க: ஹார்முஸ் நீரினையை கடக்க கட்டணம் வசூலிக்க திட்டம்!! ஈரான் நாடாளுமன்றத்தில் புதிய மசோதா தாக்கல்!
ஈராக் வான்வெளியில் இரண்டு கே.சி.-135 எரிபொருள் நிரப்பும் விமானங்கள் வானிலேயே மோதிக் கொண்ட சம்பவத்தில் 6 அமெரிக்க வீரர்கள் உயிரிழந்தனர். உலகின் அதிநவீன போர் விமானமான எப்-35 ரக விமானங்கள் சில, ஈரானிய தரைப்படை தாக்குதலால் சேதமடைந்து அவசரமாக தரையிறக்கப்பட்டன.
இதைத் தவிர, கத்தாரில் உள்ள நீண்ட தூர எச்சரிக்கை ரேடார் அமைப்பும், ஜோர்டானில் உள்ள ‘தாட்’ (THAAD) ஏவுகணை தடுப்பு அமைப்பின் முக்கிய ரேடாரும் ஈரானின் தாக்குதலில் முற்றிலும் அழிக்கப்பட்டுள்ளன. இதனால் அமெரிக்காவின் வான் பாதுகாப்பு கட்டமைப்பு பெரிதும் பலவீனமடைந்துள்ளது.
ஒரு மாதத்தில் மட்டும் 16 விமானங்கள் மற்றும் ட்ரோன்களை இழந்தது அமெரிக்க ராணுவத்துக்கு பெரும் பின்னடைவாகப் பார்க்கப்படுகிறது. ஈரானின் ஏவுகணை மற்றும் ட்ரோன் தாக்குதல் திறன் எதிர்பார்த்ததை விட அதிகமாக இருப்பதை இந்த இழப்புகள் உறுதிப்படுத்துகின்றன.
இந்த சம்பவங்கள் அமெரிக்க ராணுவத்தின் செயல்பாட்டு முறைகள் மற்றும் ஒருங்கிணைப்பில் குறைபாடுகள் இருப்பதை வெளிப்படுத்தியுள்ளதாக ராணுவ விமர்சகர்கள் கூறுகின்றனர். போர் தொடரும் நிலையில், அமெரிக்கா தனது வான் படை உத்திகளை மறுபரிசீலனை செய்ய வேண்டிய கட்டாயம் ஏற்பட்டுள்ளது.
இதையும் படிங்க: இந்தியா உட்பட 5 நாடுகளுக்கு மட்டுமே அனுமதி!! ஹார்முஸ் நீரினையை திறந்த ஈரான்!! நட்புக்கரம்!!