2026ம் ஆண்டுக்கான தமிழ்நாடு சட்டமன்ற தேர்தல் ஏப்ரல் 23ம் தேதி நடைபெற்று முடிந்தது. இந்த முறை திமுக, அதிமுக, நாம் தமிழர் கட்சி, தமிழக வெற்றிக் கழகம், டாக்டர் ராமதாஸ் - சசிகலா கூட்டணி என 5 முனை போட்டி நிலவுகிறது. இப்படியான நிலையில் திமுக தலைமையிலான கூட்டணியில் விசிக, தேமுதிக, இந்திய கம்யூனிஸ்ட், மதிமுக, காங்கிரஸ், மார்க்சிஸ்ட் கம்யூனிஸ்ட், இந்திய யூனியன் முஸ்லீம் லீக், முக்குலத்தோர் புலிப்படை என 25 கட்சிகள் இணைந்துள்ளது. எக்ஸிட் போல் கருத்துக்கணிப்புகளில் தவெக பெரும்பாலான இடங்களை கைப்பற்றும், தொங்கு சட்டசபை அமைந்தால் அதிமுகவுடன் கைகோர்த்து ஆட்சியைக் கைபற்றும் என தகவல்கள் வெளிவந்தன. குறிப்பாக விஜய் முதலமைச்சராக அரியணை ஏறுவார் என தவெகவினர் சோசியல் மீடியாக்களில் பரப்பி வருகின்றனர். இந்நிலையில் தான் விசிக தலைவர் திருமாவளவன் மருத்துவமனையில் இருந்தபடியே வெளியிட்டுள்ள வீடியோ ஒன்று அரசியல் வட்டாரத்தில் பரபரப்பைக் கிளப்பியுள்ளது. 

அதில், தமிழக சட்டமன்ற தேர்தலில் திமுக கூட்டணி வெற்றி பெறும் என்று விசிக தலைவர் திருமாவளவன் நம்பிக்கை தெரிவித்திருக்கிறார். மேலும் விஜய் ஆட்சி அமைக்க வாய்ப்பில்லை என்றும் அவர் திட்டவட்டமாக தெரிவித்திருக்கிறார். இன்று காலை திருமாவளவன் வெளியிட்டுள்ள வீடியோவில், பொதுவாக திராவிட கட்சிகளுக்கு திமுக அதிமுக ஆகிய இரு கட்சிகளுக்கு எதிரான ஒரு கருத்து இந்த அரசியல் களத்தில் நீண்ட காலமாக இருந்து வருகிறது. எதிர்ப்பு வாக்குகளும் இருந்து வருகின்றன. அந்த எதிர்ப்பு வாக்குகளை ஒவ்வொரு காலகட்டத்தில் அவ்வப்போது தோன்றிய மாற்று அரசியல் சக்தி என்று அடையாளப்படுத்திக் கொண்ட அரசியல் கட்சிகள் பெற்றிருக்கின்றன அல்லது பங்கு போட்டுருக்கின்றன.

ஆகவே இந்த முறை திமுகவை எதிர்த்து அல்லது திமுக கூட்டணியை எதிர்த்து களத்திலே நிற்கும் அதிமுக  தலைமையிலான கூட்டணி, விஜய் தலைமையிலான கட்சி சீமான் தலைமையிலான கட்சி இவர்கள் அத்தனை பேருக்குமே திமுக எதிர்ப்பு என்கிற ஒன்றுதான் பிரதானமான முதன்மையான அரசியல் அல்லது திமுக கூட்டணி எதிர்ப்பு என்பதுதான் முதன்மையான அரசியல். அவர்கள் மூவரும் அவரவர் சக்திக்கு ஏற்ப இந்த எதிர்ப்பு வாக்குகளை பகிர்ந்து கொள்கிறார்கள். பிரித்துக் கொள்கிறார்கள். விஜய் ஆட்சி அமைப்பதற்கான வாய்ப்பில்லை. தமிழக சட்டமன்ற தேர்தலில் திமுக கூட்டணி வெற்றி பெறும் என தெரிவித்துள்ளார். 

இதையும் படிங்க: வாக்குப்பதிவு அதிகரிக்கல..! SIR தான் காரணம்..! திருமாவளவன் கொடுத்த விளக்கம்..!!

தொடர்ந்து திமுக, அதிமுகவை பின்னுக்குத் தள்ளக்கூடிய அளவிற்கு தனித்த சக்தியாக விஜய் வளரவில்லை என்றும், அதேசமயம் திமுக, அதிமுக எதிர்ப்பு வாக்குகளை விஜய் பெருவாரியாக பெறுவார் என்றும் திருமாவளவன் திட்டவட்டமாக தெரிவித்துள்ளார். 

இதையும் படிங்க: விசிக-வில் சீட் கிடைக்காத எம்.எல்.ஏ-க்கள் அதிருப்தி!! கட்சி பதவி வழங்கி சரிகட்டும் திருமாவளவன்!!