டிஜிட்டல் உள்ளடக்க உலகில் யூடியூப் பல இளைஞர்களுக்கும் தொழில்முறை படைப்பாளிகளுக்கும் முக்கிய வருமான ஆதாரமாக விளங்குகிறது. ஆனால் சமீபத்தில் யூடியூப் நிறுவனம் அறிவித்த புதிய விதிமுறைகள், புதிதாக சேனலைத் தொடங்கி பணம் சம்பாதிக்க விரும்புவோருக்கு சவாலாக அமைந்துள்ளன. 

2018-க்குப் பிறகு முதல் முறையாக பெரிய அளவிலான மாற்றங்களை அறிமுகப்படுத்தியுள்ள யூடியூப், 2027 பிப்ரவரி 1 முதல் புதிய விண்ணப்பதாரர்களுக்கு தகுதி நிபந்தனைகளை இரட்டிப்பாக்கியுள்ளது. இதன்படி, விளம்பர வருவாய் மற்றும் யூடியூப் ப்ரீமியம் வருவாயைப் பெற புதிய சேனல்கள் குறைந்தபட்சம் 1,000 சந்தாதாரர்களுடன் கடந்த 365 நாட்களில் 8,000 தகுதிவாய்ந்த பார்வை மணி நேரங்களைப் பெற்றிருக்க வேண்டும். அல்லது ஷார்ட்ஸ் வீடியோக்களுக்கு கடந்த 90 நாட்களில் 2 கோடி (20 மில்லியன்) தகுதிவாய்ந்த பார்வைகளை எட்ட வேண்டும். 

முன்னதாக இவை முறையே 4,000 மணி நேரமும் 1 கோடி பார்வைகளுமாக இருந்தன. சந்தாதாரர் எண்ணிக்கை விதியில் மாற்றம் இல்லை. ஏற்கனவே பார்ட்னர் புரோகிராமில் உள்ளவர்களுக்கு இந்த நுழைவு நிபந்தனைகள் பொருந்தாது. அவர்கள் நீண்ட வடிவ வீடியோக்களில் தொடர்ந்து வருமானம் ஈட்டலாம். இருப்பினும் ஷார்ட்ஸ் வருவாயைத் தொடர்ந்து பெற, கடந்த 90 நாட்களில் 1 கோடி தகுதிவாய்ந்த ஷார்ட்ஸ் பார்வைகளைப் பராமரிக்க வேண்டும். அதற்குக் குறைந்தால் ஷார்ட்ஸ் வருவாய் தற்காலிகமாக நிறுத்தப்படும்; மீண்டும் எட்டியவுடன் தானாக மீண்டும் தொடங்கும். 

இதையும் படிங்க: மதுரை மீனாட்சியம்மன் கோயில் சொத்தை ஆட்டையைப் போட்ட விவகாரம்... துணை ஆட்சியருக்கு நேர்ந்த பரிதாபம்...!

சேனல் முழுவதும் புரோகிராமிலிருந்து நீக்கப்படாது. யூடியூப் இதற்குக் காரணமாக அன்றாடம் 200 பில்லியனுக்கும் அதிகமான ஷார்ட்ஸ் பார்வைகளும் டிவி திரைகளில் பில்லியன் மணி நேர பார்வையும் இருப்பதைக் குறிப்பிட்டுள்ளது. மூன்று மில்லியனுக்கும் அதிகமான கிரியேட்டர்கள் ஏற்கனவே புரோகிராமில் உள்ளனர். ஃபேன் ஃபண்டிங், சூப்பர் சாட், சேனல் மெம்பர்ஷிப், ஷாப்பிங் போன்ற அம்சங்களுக்குத் தகுதி விதிகள் மாறவில்லை. 

அவற்றை 500 சந்தாதாரர்கள் மற்றும் குறைந்த அளவு பார்வையுடன் அணுகலாம். இந்த மாற்றங்கள் தரமான, தொடர்ச்சியான உள்ளடக்கத்தை ஊக்குவிக்கும் என யூடியூப் தெரிவிக்கிறது. புதிய கிரியேட்டர்கள் இலக்கை எட்டுவதற்கு அதிக முயற்சி தேவைப்படும். தற்போதுள்ளவர்கள் தங்கள் ஷார்ட்ஸ் செயல்திறனைக் கண்காணித்து, பயனுள்ள வீடியோக்களைத் தொடர்ந்து உருவாக்க வேண்டிய நிலை ஏற்பட்டுள்ளது.
 

இதையும் படிங்க: 4 நாட்கள் சட்டசபை விடுமுறை.. 17ம் தேதி தொடங்கும் மானியக் கோரிக்கை விவாதம்!!