சர்வதேச சந்தையில் கச்சா எண்ணெய் விலையில் ஏற்பட்டுள்ள மாற்றங்களால், இந்தியாவில் பெட்ரோல் மற்றும் டீசல் விலை உயர்ந்து வருகிறது. இதன் நேரடி பாதிப்பாக, முன்னணி உணவு விநியோக நிறுவனமான சொமேட்டோ (Zomato) தனது டெலிவரி கட்டணத்தை உயர்த்துவதாக அறிவித்துள்ளது.
உணவு டெலிவரி செய்யும் ஊழியர்களின் (Delivery Partners) எரிபொருள் செலவு அதிகரித்துள்ளதைக் கருத்தில் கொண்டு இந்த முடிவு எடுக்கப்பட்டுள்ளது. எரிபொருள் விலை உயர்வால் டெலிவரி ஊழியர்களின் வருமானம் பாதிக்கப்படாமல் இருக்க, வாடிக்கையாளர்களிடமிருந்து வசூலிக்கப்படும் டெலிவரி கட்டணத்தில் சிறு தொகையை நிறுவனம் உயர்த்தியுள்ளது.
இந்தக் கட்டண உயர்வு தூரம் மற்றும் நேரத்தைப் பொறுத்து மாறுபடும் எனத் தெரிகிறது. குறிப்பாக, பீக் ஹவர்ஸ் (Peak Hours) எனப்படும் அதிகப்படியான ஆர்டர்கள் வரும் நேரங்களிலும், மழைக்காலங்களிலும் இந்தக் கட்டணம் மேலும் அதிகரிக்க வாய்ப்புள்ளது. ஏற்கனவே பிளாட்பார்ம் கட்டணம் (Platform Fee) வசூலிக்கப்பட்டு வரும் நிலையில், தற்போது டெலிவரி கட்டணமும் உயர்ந்திருப்பது வாடிக்கையாளர்களுக்குக் கூடுதல் சுமையாக அமைந்துள்ளது.
இதையும் படிங்க: பெட்ரோல், டீசலுக்கு தட்டுப்பாடு இல்லை! மக்களவையில் அமைச்சர் ஹர்தீப் சிங் புரி அதிரடி விளக்கம்!
சொமேட்டோவின் இந்த அதிரடி முடிவைத் தொடர்ந்து, அதன் போட்டி நிறுவனமான ஸ்விக்கி (Swiggy) உள்ளிட்ட பிற உணவு விநியோக நிறுவனங்களும் தங்களது கட்டணத்தை உயர்த்த வாய்ப்புள்ளதாகத் தொழில் துறை வல்லுநர்கள் கணித்துள்ளனர்.
எரிபொருள் விலை உயர்வு சாமானிய மக்களின் சமையலறை பட்ஜெட்டை மட்டுமல்லாமல், ஆன்லைன் உணவு ஆர்டர்களையும் இப்போது பதம் பார்க்கத் தொடங்கியுள்ளது.
இதையும் படிங்க: பாட்டிலில் பெட்ரோல் வாங்க தடை! பதுக்கலை தடுக்க தமிழக அரசு அதிரடி நடவடிக்கை!